HABACUC 1 - Dios Rimashca Shimicunami

Yallitaj millaitami rurancuna nishpa Diosman Habacuc huillashcamanta

¹ Dios ima nishcata huillaj Habacucman imalla tucunata ricuchishcami.

² Mandaj Dioslla, ¿maicamataj mañacushallari? manataj uyahuanguica. ¿Maicamataj llaquicunataca huillacushallari? manataj quishpichihuanguica.

³ ¿Ima nishpataj ñuca mana ricunachishca millaita ruranacunataca ricuchihuanguiyari? Ñuca ñahuipica chingachijcunapish, llaquichijcunapish, rimajcunapish, c'amijcunapishmi ricurin.

⁴ Shinallataj mandashcapish mana allichu, imallata rurashcata ricujpipish mana chai shinallataj alli llujshinchu. Ashtahuanpish Diosta mana manchaj runaca, cashcata ruraj runataca llaquichinllami. Chashnami cashcata ruranataca manataj rurancuna.

Judá llajtataca caldeocuna llaquichina cashcamanta

⁵ “Shujtaj llajtacunata ricuichigari, mancharichigari. Ñucaca cancuna causai punllacunapica, shuj ruranatami rurasha. Chai rurashcata pi huillajpipish, cancunaca manataj cringuichijmanchu.

⁶ Riquichij, ñucaca caldeocunatami cancunapajman cachagrini. Paicunaca huañuchijcunami, utca imatapish mana allita rurajcunami. Paicunaca, cai pachata tucuita purishpa, shujtajcunapaj allpacunata, huasicunata quichujcunami.

⁷ Paicunaca, mancharina jatun runacunami. Paicunaca cashcata ruranatapish, alli nishca canatapish paicunallatajmi mandashcacunapica churancuna.

⁸ Paicunapaj caballocunaca leopardotapish yalli callpajcunami cangacuna. Tuta purij atujcunatapish yalli p'iñacunami cangacuna. Macanacujcunapish chai caru llajtamantaca caballocunapimi tiyarishpa yallitaj achcacuna shamungacuna. Paicunaca, aguilacuna huañuchinaman callpacuj shinami callpamungacuna.

⁹ Tucuicunami aichata micunaman shamungacuna. Paicuna shamushpaca, tucuicunatami manchachinga. T'iyu allpata tandaj shinami, prezu apashpa ringacuna.

¹⁰ Jatun mandajcunatapish mana cazungacunachu, pushajcunatapish chanzata rurashpami asingacuna. Pueblo muyundij jatun pircata ricushpapish asingacunami, pata huashapi allpata jundachishpa, pata jahuaman huichiyangallacunami.

¹¹ Chai q'uipaca, acapana shinami yaicungacuna. Paicunaca rurashcalla diostami, fuerzata cuchunpish mañangacuna” nircami.

Habacucca Taita Diosta rimashcamanta

¹² Ñucata Mandaj jucha illaj Taita Dioslla, canca imapish manaraj tiyaimantapachami causacungui. Chashna cashcamanta, ñucanchijca manataj huañushunchu. Mandaj Dioslla, llaquichichunmari paicunataca caipica churarcangui. Ñuca jatun Rumilla, llaquichichunmari paicunataca callarichircangui.

¹³ Canca ima jucha illaj cashpami, millaitaca manataj ricunachingui. Ima millaita manataj ricui tucunguichu. ¿Ima nishpataj llaquichicujtaca ricucunguillari? Canta mana manchaj runaca, paita yalli cashcata ruraj runata juchachishpa llaquichicunmari. ¿Ima nishpataj chaitaca ricucunguillari?

¹⁴ ¿Ima nishpataj runacunataca, mama cuchapi tiyaj chalhuacunata shina, pambata llucashpa purij mandaj illaj animalcunata shina saquinguiyari?

¹⁵ Paicunaca, tucuicunatami anzuelohuan llujshichingacuna. Paicunapaj linchihuanmi japingacuna. Chai q'uipaca, mallacunapimi tandangacuna. Ña tucuita tandachishpaca, cushicushpami asingacuna.

¹⁶ Chashna tandachishcamantami, linchimanca animalcunata cushpa huañuchingacuna. Mallacunamanca sahumeriocunatami rupachingacuna. Chaicunahuanmi achcata charijyarcacuna. Chaimantami micunatapish achcata charircacuna.

¹⁷ ¿Paicunaca chai linchimantaca tallingacunachu? Llajtacunata jahuanpi jahuanpi chingachinataca ¿manachu llaquinachingacuna?