GÉNESIS 9 - Dios Rimashca Shimicunami

Taita Diosca Noehuan imallata ruranata ari nishcami

¹ Taita Diosca Noetapish, paipaj churicunatapish alli cashca cachun nishpaca: “Huahuacunayuj tucushpa, alli huiñachishpa achcata mirarishpa cai pachapi jundarichij.

² Cai pachapi tiyaj tucui animalcunaca huairata purij alasyuj animalcunapish, pambapi purij animalcunapish, mama cuchapi causaj animalcunapish tucuicunami cancunata manchacuj tucungacuna. Tucui chaicunataca cancunapaj maquipimi churani.

³ Causaiyuj caj tucui animalcunaca cancuna micunapajmi. Chashnallataj yacu granocunatapish, verdi q'uihuacunatapish tucuitami cancunaman cuni.

⁴ Ashtahuanpish causaita cuj yahuarndij aichataca ama micunguichij.

⁵ Chashna cashcamanta maijanpish shujtajta huañuchijtaca, llaquichingapaj catishatajmi. Shinallataj maijan animalpish maijan runata huañuchijtaca llaquichingapaj catishatajmi. Runata huañuchijtaca pi cachunpish llaquichingapaj catishatajmi.

⁶ Maijanpish shuj runapaj yahuarta jichajtaca, paitapish shujtaj runami yahuarta jichanga. Runataca Taita Dios paiman rijchajta rurashcamanta pi mana yahuarta jichanallachu.

⁷ Ashtahuanpish cancunaca huahuacunayuj tucushpa, alli huiñachishpa achcata mirarichij. Cai pachapica achca huahuacunayuj tucushpa tucuipi jundarichij” nircami.

⁸ Taita Diosca Noeta, paipaj churicunataca cashnapishmi nirca:

⁹ Ñucaca cancunahuanpish, cancunapaj q'uipa huahua huahuacunahuanpish, shuj ruranatami chashnataj cachun ari nini.

¹⁰ “Cancunahuan caj causaiyujcunahuanca: Huambuj huasimanta llujshishpa cancunahuan caj huairata purij alasyuj animalcunahuanpish, sacha animalcunahuanpish, charina animalcunahuanpish shuj ruranatami ruragrini.

¹¹ Ñuca cancunaman ari nishcaca caimi: Cai pachapi causaiyuj caj tucuicunataca ña mana cutinca yacu juilluhuan chingachishachu. Cai pachapi imalla tiyajcunata chingachingapajca yacu juilluca ña mana ashtahuan tiyangachu”.

¹² Taita Diosca cashnapishmi nirca: “Cancunapajpish, cai pachapi caj causaiyuj animalcunapajpish ñuca ari nishcata ricuchijca caimi:

¹³ Ñuca cuichitami jahua p'uyupi churani. Chai cuichimi cai pachapi causajcunapaj ñuca rurasha nishpa ari nishcata ricuchijca canga.

¹⁴ Cai pachaman p'uyuta ñuca cachajpica, cashnami tucunga. Ñuca churashca cuichimi chai p'uyupica ricuricungalla.

¹⁵ Chaita ricushpami ñucaca cancunapajpish, cancunahuan caj causaiyuj tucui laya animalcunapajpish ñuca rurasha nishpa ari nishcataca yuyarisha. Causaiyuj caj tucuicunata chingachingapajca yacu juilluca ña nunca mana tiyangachu.

¹⁶ P'uyupi cuichita ricushpaca, causaiyuj caj tucuicunapaj ñuca rurasha nishpa huiñaipaj ari nishcatami yuyarisha”.

¹⁷ Taita Diosca Noetaca: “Cai pachapi causaiyuj caj tucuicunapaj ñuca rurangapaj ari nishcata ricuchijta churashcaca chaimi” nircami.

Noé machashcami

¹⁸ Huambuj huasimanta llujshij Noepaj churicunaca Sem, Cam, Jafetmi carca. Cam runaca, Canaanpaj yayami.

¹⁹ Chai quimsa runacunami Noepaj churicunaca. Paicunamantami tucui cai pachapi mirarishpa catirca.

²⁰ Noeca allpapi cutinllataj trabajai callarishpaca uvatami tarpurca.

²¹ Chai uva vinota ubyashpa machashpami Noeca, paipaj carpa huasi chaupi ucupi lluchulla siricurca.

²² Canaanpaj yaya Cam runaca, paipaj yaya lluchulla siricujta ricushpami, canllaman caj paipaj ishqui huauquicunaman chaita huillarca.

²³ Chaimi Sempish, Jafetpish churanata japishpa paicunapaj rigra jahuapi churashpa, huashaman purishpa paipaj yaya lluchulla cashcataca tapachircacuna. Chashnami paicunapaj yaya lluchulla cashcataca mana ricurcacuna

²⁴ Noeca machai cacharirishpa rijcharishpami, paipaj q'uipa churi Cam imata rurashcata yachaj chayashpa,

²⁵ cashna nirca: “¡Canaanca mana alli nishca cachun! ¡Cambaj ishqui huauquicunapajta rurajcunapajta ruraj cachun ninimi!” nirca.

²⁶ Noeca cashnapishmi nirca: “¡Semtaca ñuca Mandaj Taita Dios, alli nichun. Canaanca, cambajta ruraj cachun!

²⁷ ¡Jafettaca Taita Diosca jatunyachishca cachun. Jafetca Sempaj carpa huasicunapi causachun. Canaanca, Jafetpajta ruraj cachun!” nircami.

²⁸ Noeca yacu juillu tiyashca q'uipaca, 350 huatacunahuanmi causarca.

²⁹ Noeca tucuimantaca, 950 huatacunata causashpami huañurca.