GÉNESIS 5 - Dios Rimashca Shimicunami

Adanpaj huahua huahuacunami

¹ Adanpaj huahua huahua callari yayacunapaj shuticunata quillcashcaca caicunami: Taita Diosca runata ruracui punllaca, paiman rijchajtami rurarca.

² Taita Diosca c'arita huarmita rurashpaca, paicunata rurashca punllallatajmi Adán shutita shutichishpa alli cashca cachun nirca.

³ Adanca, 130 huatayuj cashpami paiman rijchaj, paitajlla shuj c'ari huahuata charirca. Chai huahuataca Settami shutichirca.

⁴ Set churita charishca punllamantaca Adanca, 800 huatacunahuanmi causarcaraj. Churicunatapish ushushicunatapish charircarajmi.

⁵ Adanca tucuimantaca, 930 huatacunata causashpami huañurca.

⁶ Setca, 105 huatayuj cashpami, Enós shuti churita charirca.

⁷ Enós churita charishca punllamantaca, 807 huatacunahuanmi Setca causarcaraj. Churicunatapish ushushicunatapish charircarajmi.

⁸ Setca tucuimantaca, 912 huatata causashpami huañurca.

⁹ Enosca iscun chunga huatayuj cashpami Cainán shuti churita charirca.

¹⁰ Cainán churita charishca punllamantaca Enosca, 815 huatacunahuanmi causarcaraj. Churicunatapish ushushicunatapish charircarajmi.

¹¹ Enosca tucuimantaca, 905 huatata causashpami huañurca.

¹² Cainanca canchis chunga huatayuj cashpami, Mahalaleel shuti churita charirca.

¹³ Mahalaleel churita charishca punllamantaca Cainanca, 840 huatacunahuanmi causarcaraj. Churicunatapish ushushicunatapish charircarajmi.

¹⁴ Cainanca tucuimantaca, 910 huatata causashpami huañurca.

¹⁵ Mahalaleelca sujta chunga pichca huatayuj cashpami Jared shuti churita charirca.

¹⁶ Jared churita charishca punllamantaca Mahalaleelca, 830 huatacunahuanmi causarcaraj. Churicunatapish ushushicunatapish charircarajmi.

¹⁷ Mahalaleelca tucuimantaca, 895 huatata causashpami huañurca.

¹⁸ Jaredca, 162 huatayuj cashpami, Enoc shuti churita charirca.

¹⁹ Enoc churita charishca punllamantaca Jaredca, 800 huatacunahuanmi causarcaraj. Churicunatapish ushushicunatapish charircarajmi.

²⁰ Jaredca tucuimantaca, 962 huatata causashpami huañurca.

²¹ Enocca sujta chunga pichca huatayuj cashpami, Matusalén shuti churita charirca.

²² Enocca, Matusalén churita charishca punllamantaca, 300 huatacunahuanmi Taita Dioshuan purirca. Churicunatapish ushushicunatapish charircarajmi.

²³ Enocca tucuimantaca, 365 huatacunatami causarca.

²⁴ Enocca Taita Dioshuanmi purirca. Taita Dios apajpimi paica ñapish chingarircalla.

²⁵ Matusalenca, 187 huatayuj cashpami, Lamec shuti churita charirca.

²⁶ Lamec churita charishca punllamantaca, Matusalenca 782 huatacunahuanmi causarcaraj. Churicunatapish ushushicunatapish charircarajmi.

²⁷ Matusalenca tucuimantaca, 969 huatata causashpami huañurca.

²⁸ Lamecca, 182 huatayuj cashpami, shuj c'ari huahuata charirca.

²⁹ Chai huahuataca: “Mandaj Dios allpata mana alli nishcamanta, ñucanchij maquihuan allpapi imata rurashpapish sinchita trabajashpa llaquita apacunmantaca cai huahuami samachinga” nishpami, Noé shutita shutichirca.

³⁰ Lamecca Noé churita charishca punllamantaca, 595 huatacunahuanmi causarcaraj. Churicunatapish ushushicunatapish charircarajmi.

³¹ Lamecca tucuimantaca, 777 huatacunata causashpami huañurca.

³² Noeca, 500 huatacunayuj cashpami Sem, Cam, Jafet shuti churicunata charirca.