GÉNESIS 49 - Dios Rimashca Shimicunami

Jacobca paipaj churicuna q'uipa punllacunapi ima shinalla canata huillashcami

¹ Jacobca, paipaj churicunata cayashpaca: “C'uchuyamuichij q'uipa punllacunapi cancuna ima shina canatami ñucaca huillagrini” nishpaca paica cashnami nirca:

² Jacobpaj churicuna c'uchuyamuichij, uyaichij. Cancunapaj yaya Israelta uyaichij.

³ Rubén, canca ñuca punta churimi cangui. Ñuca c'ari c'ari cashcata ricuchij ñuca punta fuerzarishcami cangui. Canmi alli nishca canatapish, mandana podertapish charircangui.

⁴ T'imburicuj yacu shina cashcamanta ña mana punta churichu cangui. Yayapaj camaman huichiyashcamanta ña mana punta churichu cangui. Camaman huichiyashpa ñucata yanganchishcamanta ña mana punta churichu cangui.

⁵ Simeonpish, Levipish, huauquindijcunami. Paicunapaj macanacunacunaca jatun llaquita rurachijmi.

⁶ Paicunapaj yuyarinacushcataca ñuca almaca mana munanchu. Ñuca espirituca paicunapaj tandanacuitaca mana munanchu. Yallitaj p'iñarijcuna cashcamantami runacunataca huañuchircacuna. P'iñarishca cashcamantaca huagracunapaj garroncunacamami p'itircacuna.

⁷ Paicuna p'iñarishcaca yallitaj millai cashcamanta mana alli nishcami. Paicuna p'iñarishcaca yallitaj sinchimi carca. Jacobpajpurapica caipi chaipi causachunmi churasha. Israelpica urata janajtami cachasha.

⁸ Judá, cantaca cambaj huauquicunami alabanga. Cambaj maquica canta p'iñajcunapaj jahuapimi canga. Cambaj yayapaj churicunaca cambaj ñaupajpimi cumuringacuna.

⁹ Judaca huahua leonmi. Ñuca huahualla, aichata japishpami huichiyarcangui. León shinallatajmi curpayashpa siringui. Jatun leonta shinallataj ¿pitaj rijchachi tucungari?

¹⁰ Judapaj mandana caspitaca manataj quichushca cangachu. Pai mandana varatapish paipaj chaqui chaupimantaca manataj quichushca cangachu. Siloh mandaj shamungacamami tucuicuna paipajllaman tandanacungacuna.

¹¹ Paipaj c'ari burrotaca uvapimi huatanga. Huahua burrotaca uva troncopimi huatanga. Paipaj churanataca vinopimi tajshanga. Paipaj jahua churanataca uvapaj yahuarpimi tajshanga.

¹² Paipaj ñahuicunaca vinota yalli pucanicujmi canga. Paipaj quirucunaca lecheta yalli yurajnicujmi canga.

¹³ Zabulonca mama cucha uripimi causanga. Jatun barcocuna chayanapish llujshinapishmi canga. Cambaj llajtaca Sidoncamami canga.

¹⁴ Isacarca fuerzasapa burromi. Corralpimi samaringa.

¹⁵ Samarinapaj alli cajta ricushpa, llajtapish sumaj cajta ricushpami aparishpa causaj tucunga. Huatashca shina rurajmi tucunga.

¹⁶ Danca, Israel shuj aillu shinallatajmi mandaj tucunga.

¹⁷ Danca ñan c'uchupi caj culebra shinami canga. Ñan c'uchupi caj culebra shinallataj caballopaj talonta canishpa, caballopi tiyarishca ricujta allagman urmachijmi canga.

¹⁸ Mandaj Dioslla, can quishpichinallatami shuyashpa catini.

¹⁹ Gadtaca shuj llajta soldadocunami shuhuashpa llaquichinga. Ashtahuanpish q'uipataca paimi cungaillapi llaquichinga.

²⁰ Aserca alli fuerzata cuj micunacunayujmi canga. Jatun mandajcuna micuna sumaj micunacunatami charinga.

²¹ Neftalica taruga shina cacharishcami canga. Paica sumaj huahuacunayujmi canga.

²² Joseca achca granota p'ucuj yurami canga. Yacu c'uchupi tiyaj yurami canga. Paipaj ramacunaca pata jahuata rijmi canga.

²³ Paitaca p'iñachingacunami. Puntajlla caspicunahuanmi shitangacuna. Arcohuan shitajcunami p'iñachingacuna.

²⁴ Ashtahuanpish paipaj arcoca tucuitami mishanga. Paipaj maquicunaca sinchimi canga. Jacobpaj Sinchi maquicunamantami chashna canga. Israelcunata Michijmanta, israelcunata Pacaj rumimantami chashna canga.

²⁵ Cambaj yayapaj Taita Diosmantami chashna cangui. Paimi cantaca ayudanga. Pailla Tucuita Rurai Tucuj Taita Diosmantami chashna cangui. Paimi cantaca alli cashca cachun ninga. Jahuaman tiyajcunahuanmi alli cashca cachun ninga. Ucuman cajcunahuanmi alli cashca cachun ninga. Huijsamanta, chuchumantami alli cashca cachun ninga.

²⁶ Cambaj yaya alli cashca cachun nishcaca, ñaupa yayacuna alli cashca cachun nishcata yallimi. Huiñaipaj caj urcucuna puntacamami. Tucui chaicunaca Josepaj jahuapimi. Tucui huauquicunamanta ch'icanchishca Josepaj jahuapimi.

²⁷ Benjaminca quichuj atujmi. Tutamantamanca quichumushcatami micunga. Chishitaca shujtajcunamanmi chaupinga nircami.

Jacob huañushcami

²⁸ Tucui chaicunami Israelpaj aillucuna. Tucuica chunga ishquimi. Paicunapaj yaya cada ailluman alli cashca cachun nishpa saquicushpaca tucui chai alli cashca cachun nishcacunahuanmi saquirca.

²⁹ Chai q'uipaca paipaj churicunataca cashna nishpami mandarca: “Ñucaca ñuca ñaupa yayacunahuanmi tandanacugrini. Ñucataca heteo Efronpaj allpapi caj jutcupi, ñuca ñaupa yayacunata maipi churashcallapitaj churanguichij.

³⁰ Chai allpataca Abrahammi, paipaj huahua huahuacuna pambana cachun, Macpela nishca pambana jutcucunandij heteo Efronman randirca. Chai allpaca Canaanpi caj Mamre pueblomantaca inti llujshin ladomanmi.

³¹ Chaipimi Abrahamtapish, paipaj huarmi Saratapish, Isaactapish, paipaj huarmi Rebecatapish churarca. Leataca chaillapitajmi ñucapish churarcani.

³² Chai allpatapish chaipi caj jutcucunatapish Hetpaj huahuacunaman randishcami” nircami.

³³ Jacobca paipaj churicunata chashna mandashpaca, camapi siririshpa chaquicunata tandashpa samaita aisashpaca paipaj ñaupa yayacunahuan tandanacugrircallami.