GÉNESIS 47 - Dios Rimashca Shimicunami

¹ Faraonpajman José rishpaca: “Ñuca yayapish, ñuca huauquicunapish paicunapaj ovejacunandij, vacacunandij, tucui imalla charishcacunandijmi Canaanmanta shamushca. Paicunaca Gosenpimi” nishpami huillarca.

² Joseca paipaj huauquicunamanta pichcata agllashpaca, faraonpaj ñaupajmanmi pusharca.

³ Chaipimi faraonca Josepaj huauquicunataca: –¿Imata rurajcunataj canguichij?– nijpi paicunaca faraonmanca: –Cambajta ruraj ñucanchijca, ñucanchij ñaupa yayacuna shinallataj ovejacunata michijcunami canchij– nircacuna.

⁴ Paicunaca faraontaca: –Cai llajtapi causangapajmi shamurcanchij. Canaanpica, jatun yaricai cashcamanta cambajta rurajcunapaj ovejacunata michinapish mana tiyanchu. Chaimanta cunanca cambajta ruraj ñucanchijtaca Gosenpi causachun saquichunmi roganaman shamunchij– nircapishmi.

⁵ Chaimi faraonca, Josetaca: –Cambaj yayapish, cambaj huauquicunapish canhuan tandalla cangapajmari shamushcacuna.

⁶ Tucui Egipto llajtami cambaj ñaupajpi. Cambaj yayatapish, cambaj huauquicunatapish tucuimanta yalli alli caj Gosenpi causachun mandai. Paicunapurapi q'uipu caipaj cajcunata ricui. Tiyajpica ñuca animalcunata michijcunata mandaj cachun churai– nircami.

⁷ Joseca paipaj yaya Jacobtapish faraonpajman pushashpami faraonmanca caimi ñuca yaya nirca. Jacobca faraontaca alli cashca cachun nijpimi,

⁸ faraonca Jacobtaca: –¿Mashna huatacunatataj charingui?– nijpi,

⁹ Jacobca: –Ñucaca, 130 huatacunatami caita chaita purishpa causacuni. Ñuca causaipica ashaca alli ashaca mana allimi cashca. Ñucaca ñuca ñaupa yayacuna caita chaita purishpa causashca huatacunamanca manaraj chayanichu– nircami.

¹⁰ Jacobca faraonta alli cashca cachun nishpaca, paipaj ñaupajmanta rircallami.

¹¹ Joseca paipaj yayamanpish, huauquicunamanpish faraón mandashca shinallatajmi Egiptopi caj ashtahuan yalli alli llajtata cushpa Ramesés pueblopi causachun churarca.

¹² Joseca paipaj yayamanpish, huauquicunamanpish, paipaj yayapaj huasi ucupuracunamanpish mashna cashcapaj pajtatami micunata caraj cararca.

¹³ Tucui llajtacunapimi ima micuna mana tiyarca. Yallitaj jatun yaricai tiyashcamantami Egiptopipish, Canaanpipish yaricaihuan huañunalla tucurcacuna.

¹⁴ Egipciocunapish, cananeocunapish Joseman granocunata randishpa cushca cullquitaca, Joseca tucuita japishpami faraonpaj huasipi huaquichirca.

¹⁵ Egipciocunapish, cananeocunapish cullqui ña tucurijpimi, tucui egipciocunaca Josepajman shamushpaca: –Cullqui tucurishcallamantaca ¿maitataj cambaj ñaupajpi yaricaihuan huañushunri? Micunata cuhuai– nircacuna.

¹⁶ Chaimi Joseca: –Cancunapaj cullqui ña tucurishca cajpica, cancunapaj animalcunata apamuichij. Cancunapaj animalcunamantaca ñuca trigota cushallami– nirca.

¹⁷ Chaimi paicunaca paicunapaj animalcunata Josepajman apamurcacuna. Joseca paicunapaj caballocunamanta, ovejacunamanta, vacacunamanta, burrocunamantaca micunacunatami curca. Tucui chai huataca Joseca paicunapaj animalcunamantami micunata curca.

¹⁸ Chai huata ña tucurijpi cati huatapish cutinllataj Josepajman shamushpami paitaca: –Ñucanchij amomanca mana llullanchijchu. Cullquipish tucurintajmi. Ñucanchij animalcunapish ñami tucui can ñucanchij amopaj. Ñucanchij amo canmanca imata caita cushun mana ni tucunchijchu. Tucui ñucanchijca, ñucanchij allpacunandijllami cambaj ñaupajpi saquirishcanchij.

¹⁹ Ñucanchijpish ñucanchij allpacunapish ¿maitataj cambaj ñaupajpica chingarishunyari? Chaipaj randica ñucanchijtapish, ñucanchij allpacunatapish trigohuan randilla. Ñucanchijpish ñucanchij allpacunapish faraonpajta rurajcunami cashun. Ñucanchij ama huañuchun, llajtapish ama shitashca saquichunca granocunata cuhuai– nircacunami.

²⁰ Chashnami Joseca, Egipto llajta allpacunataca tucuita faraonpaj cachun randirca. Egipciocunaca yallitaj ashtahuan jatun yaricai llaqui cajpimi, tucuicuna paicunapaj allpacunataca chashna c'aturcacuna. Chashnami allpacunaca faraonpaj tucurca.

²¹ Egipciocunataca tucuicunatami pueblocunapi causachun churarca. Egipto llajta ucupi causajcunataca tucuicunatami chashna churarca.

²² Curacunapaj allpacunallatami mana randirca. Curacunaca faraón cushcata japijcuna cashcamantami allpacunataca mana c'aturcacuna. Paicuna micuchunca faraonmi cuj carca.

²³ Joseca egipciocunataca: –Cancunataca cancunapaj allpacunandijmi, faraonpaj cachun randircani. Riqui, muyucunaca caipimi allpacunapi tarpuichij.

²⁴ Chai p'ucushca granocunamanta chunga costalmanta ishquitaca faraonman cunguichij. Shinallataj cancuna tarpunapajpish, cancunapaj huahuacunapajpish, cancunapaj huasipi cajcunapajpish micungapajca, chunga costalmantaca pusajta japinguichij– nircami.

²⁵ Chaimi paicunaca: –Can amitotajmari, ñucanchijpaj allicunata rurashpa causaita cushcangui. Faraonpajta rurajcuna cashunllami– nircacuna.

²⁶ Joseca granocuna p'ucushcataca chunga costalmanta ishquitaca faraonman cunami nishca mandashcatami tucui Egipto llajtapi chashna churarca. Chai mandashcaca cunan punllacamami chashnallataj. Curacunapaj allpacunallami faraonpaj mana tucurca.

Jacobca ñucataca ama cai Egiptopica pambanguichijchu nishcami

²⁷ Israelcunaca Egiptopica Gosenpi allpacunata japishpami chaipi causarcacuna. Chaipimi paicunaca yallitaj achcata mirarircacuna.

²⁸ Jacobca Egiptopica, chunga canchis huatacunahuan causashpami, ña 147 huatacunayuj tucurca.

²⁹ Israelca paipaj causai ña tucurigrijpimi paipaj churi Joseta cayashpaca: –Canpi ñuca alli cashca cajpica, cunanca cambaj maquita ñuca changa jahuapi churashpa can ñucata llaquishpa chaitataj pajtachina cashpaca Egiptopi ñucata amataj pambangapaj ari nichunmi rogapani.

³⁰ Ñuca yayacunahuan ñuca ña dormijpica, ñuca aichataca cai Egiptomanta apashpa ñaupa yayacunata churashcallapitaj ñucatapish churahuangui– nijpimi Joseca: –Can nishca shinami rurasha– nirca.

³¹ Israelca: –Chaitaca rurashatajmi niyari– nijpimi Joseca: –Chashna rurashatajmi– nijpi Israelca, cama saunapi cumurirca.