GÉNESIS 46 - Dios Rimashca Shimicunami

Yaya Jacobpish paipaj familiacunapish Egiptopi cashcami

¹ Yaya Israelca tucui pai imalla charishcacunandijmi llujshirca. Beersebaman ña chayashpaca paipaj yaya Isaacpaj Taita Diosmanmi animalcunata cushpa huañuchirca.

² Chai tutami Taita Diosca yaya Israelman muscuipi shina ricurishpaca: –Jacob, Jacob– nijpi paica: –Caipimi cani– nirca.

³ Chaipimi Taita Diosca: –Ñucaca cambaj yayapaj Taita Diosmi cani. Egiptoman uriyanataca ama manchaichu. Chaipimi canmantaca jatun llajtata rurasha.

⁴ Egiptomanca canhuanmi uriyasha. Ñucallatajmi tigrachimusha. Cambaj ñahuicunataca Josepaj maquimi huichcanga– nirca.

⁵ Jacob, Beersebamanta llujshigrijpica, paipaj churicunaca yaya Jacobtapish paicunapaj huahuacunatapish, paicunapaj huarmicunatapish faraón apanaman cachashca carrocunapimi huichiyachirca.

⁶ Canaanpi charishcacunataca animalcunatapish, charinacunatapish tucuita apashpami rircacuna. Jacobca paipaj huahua huahuacunahuanca Egiptomanca caicunahuanmi rirca:

⁷ Paipaj churicunahuan, paipaj nietocunahuan, paipaj ushushicunahuan, paipaj nietacunahuanmi rirca. Jacobca paipaj huahua huahuacunataca tucuicunatami Egiptoman pushashpa rirca.

⁸ Israelpaj huahua huahuacuna Jacobhuan paipaj churicunandij Egiptoman yaicujcunapaj shuticunaca caicunami: Jacobpaj punta churica Rubenmi carca.

⁹ Rubenpaj churicunaca: Hanoc, Falú, Hezrón, Carmi shuticunami carca.

¹⁰ Simeonpaj churicunaca: Jemuel, Jamín, Ohad, Jaquín, Zohar, Saúl shuticunami carca. Saulca Canaanmanta caj huarmipi huacharishcami carca.

¹¹ Levipaj churicunaca: Gersón, Coat, Merari shuticunami carca.

¹² Judapaj churicunaca: Er, Onán, Sela, Fares, Zara shuticunami carca. Er, Onán runacunaca Canaanllapitajmi huañurcacuna. Farespaj churicunaca Hezrón, Hamul shuticunami carca.

¹³ Isacarpaj churicunaca: Tola, Fúa, Job, Simrón shuticunami carca.

¹⁴ Zabulonpaj churicunaca: Sered, Elón, Jahleel shuticunami carca.

¹⁵ Paicunaca Padan-arampi Jacob causacushpa Lea huarmihuan charishca churicunami carca. Dina shuti ushushitapishmi charirca. Churicunatapish ushushicunatapish tucuita yupajpica quimsa chunga quimsami carca.

¹⁶ Gadpaj churicunaca: Zifión, Hagui, Ezbón, Suni, Eri, Arodi, Areli shuticunami carca.

¹⁷ Aserpaj churicunaca: Imna, Isúa, Isúi, Bería shuticunami carca. Paicunapaj panica Sera shutimi carca. Beriapaj churicunaca: Heber, Malquiel shuticunami carca.

¹⁸ Chaicunaca Zilpa huarmihuan Jacob charishca huahuacunami carca. Zilpaca Labanpajta rurajmi carca. Paitaca Labanllatajmi paipaj ushushi Leapajta rurachun curca. Tucui paicunata yupajpica chunga sujtami carca.

¹⁹ Jacobpaj huarmi Raquelpaj huahuacunaca: José, Benjamín shuticunami carca.

²⁰ Joseca Egiptopi cashpami Asenat paipaj huarmipica Manasés, Efraín shuti churicunata charirca. Asenatca On pueblopi causaj Potifera curapaj ushushimi carca.

²¹ Benjaminpaj churicunaca: Bela, Bequer, Asbel, Gera, Naamán, Ehi, Ros, Mupim, Hupim, Ard shuticunami carca.

²² Tucui chaicunami Jacobpaj huarmi Raquelpaj huahuacuna carca. Paicunata tucuita yupajpica, chunga chuscumi carca.

²³ Danca Husim shuti churillatami charirca.

²⁴ Neftalipaj churicunaca: Jahzeel, Guni, Jezer, Silem shuticunami carca.

²⁵ Paicunaca Labán paipaj ushushi Raquelpajta rurachun cushca Bilha huarmihuan Jacob charishca churicuna. Chai churicunapaj huahua huahuacunami carca. Tucui paicunaca canchismi carca.

²⁶ Jacobpaj huahua huahuacunaca, paicunapaj huarmicunata mana yupashcami sujta chunga sujta carcacuna. Tucui paicunami Egiptoman Jacobhuan rircacuna.

²⁷ Josepaj ishqui churicunaca, Egiptopimi huacharircacuna. Paicunandij Jacobpaj huasi ucupuracunata tucuita yupajpica, canchis chungami Egiptoman yaicurcacuna.

²⁸ Jacobca paipaj churi José Gosenpi tupanaman shamuchunmi Judata ñaupachishpa cacharca. Paicunaca Gosenmanmi chayarca.

²⁹ Joseca paipaj carropi rishpami, paipaj yaya Israeltaca Gosenpi tupagrirca. Yayata ricushpaca, cungapi ugllarishpami unicama huacarca.

³⁰ Israelca Josetaca: –Canca causacushcanguitajmi. Cunanca ñahui ñahuimi ricuni. Cunantajca ña huañunallami cani– nirca.

³¹ Chaipimi Joseca paipaj huauquicunatapish, paipaj yayapaj huasi ucupuracunatapish: –Cunanca faraonpajman huichiyashpami yachaj chayachigrini. Paimanca: Canaanpi caj ñuca huauquicunapish, ñuca yayapaj tucui huasi ucupuracunapishmi ñucapajman shamushcacuna.

³² Paicunaca animalcunata michishpa causajcunallami. Chashna cashpami vacacunatapish, ovejacunatapish pushashpa, tucui imalla charishcacunatapish apashpa shamushcacuna nishpami yachaj chayachigrini.

³³ Faraón cancunata cayashpa: Imata rurajcunataj canguichij nishpa tapujpica,

³⁴ cancunaca: Cambajta ruraj ñucanchijca ñucanchij ñaupa yayacuna shinallataj huambramantapacha animalcunata michishpa huiñachishpa causajcunami canchij nishpa huillanguichij. Chashna nishpallami, Gosenpica causai tucunguichij. Egipciocunapajca ovejacunata michij canaca yallitaj millananami– nishpami yachachirca.