GÉNESIS 45 - Dios Rimashca Shimicunami

Joseca paipaj huauquicunaman rijsichirishcami

¹ Chaimi Joseca huacanai atijpi tucui chaipi cajcunapaj ñaupajpi mana huacai tucushpaca: “Ñuca ñaupajmanta tucuicunata llujshichi” nishpa caparirca. Ña pi mana chaipi cajpimi, Joseca paipaj huauquicunamanca paicunapaj huauqui cashcata huillarca.

² Chaipica paica jatuntami huacarca. Chaitaca egipciocunapish yachaj chayarcami. Faraonpaj mandana huasipi cajcunapish yachaj chayarcami.

³ Joseca paipaj huauquicunataca: –Ñucaca Josemi cani. Ñuca yayaca causacunrajchu– nijpi, paipaj huauquicunaca paipaj ñaupajpi yallitaj musparishca cashcamanta imata mana ni tucurcacunachu.

⁴ Chaimi Joseca paicunataca: –Cunanca ñucapajman c'uchuyamuichij– nirca. Paicuna c'uchuyajpimi Joseca: –Ñucaca cancuna c'atushpa Egiptoman cachashca cancunapaj huauqui Josemari cani.

⁵ Ashtahuanpish cunanca cancunaca ama llaquirichijchu. Ñucataca mana cancunapaj munaimantachu c'atushpa cacharcanguichij. Cancunapaj causaita quishpichingapajmi Taita Diosca ñucataraj caiman ñaupachishpa cacharca.

⁶ Ñamari ishqui huatacunata cai pachapica jatun yaricai tiyan. Pichca huatacunahuan yaricai tiyangarajmi. Tucui chaipimari yapuipish, cozichaipish illanga.

⁷ Cancunapaj huahua huahuacuna q'uipa punllacunapi cai pachapi causajcuna tiyachun. Cancunatapish cancunapaj huahua huahuacunatapish causaita quishpichingapajmi Taita Diosca ñucataraj caiman ñaupachishpa cacharca. Chashnami Taita Diosca ima shinapish quishpichinataj tucushca.

⁸ Shina cajpica, mana cancunachu caimanca cacharcanguichij. Ashtahuanpish Taita Diosmari cacharca. Paimari ñucataca faraonpaj yaya shinata, paipaj huasitapish mandajta, tucui Egipto llajtatapish mandajta churangapaj pushamurca.

⁹ Chaimanta cunanca ñuca yayapajman utca rishpa: Cambaj churi Joseca cashnami nin nigrichij: Ñucataca Taita Diosmi tucui cai Egipto llajtata mandaj cachun churarca. Ama uniyashpa ñucapajman shamupai.

¹⁰ Canpish, cambaj huahuacunapish, paicunapaj huahuacunapish, tucui animalcunandij, tucui imalla charishcacunandij cai llajtapi caj Gosenpi causanguichij. Chaipi causashpami ñucapaj c'uchullapi cangui.

¹¹ Chaillapi cajpimi pichca huatacunahuan yaricai tiyai huatacunapica canmanpish, cambaj huasi ucupuramanpish, tucui canhuan cajcunamanpish yaricaihuan ama huañuchun carasha ninmi ninguichij.

¹² Cunanca cancunapish ñuca huauqui Benjaminpish, cancunapaj ñahuihuantajmi ñucata ricunguichij. Ñuca ima nishcatapish cancunatajmi uyanguichij.

¹³ Cunanca ñuca yayamanca cai Egiptopi ñuca mandacushcata, tucui ima shinalla cashcata ricushcatapish huillagripaichij. ¡Utca rishpa ñuca yayataca caiman pushamugrichij!– nircami.

¹⁴ Joseca paipaj huauqui Benjaminta ugllarishpa huacajpi, Benjaminpish paipaj huauqui Joseta ugllarishpami ishquindijtaj huacarcacuna.

¹⁵ Joseca paipaj tucui caishuj huauquicunatapish ugllarishpa muchashpami huacarca. Chai q'uipami Josepaj huauquicunaca paihuan parlarca.

¹⁶ Josepaj huauquicuna shamushcata faraonpish, faraonpajta rurajcunapish yachaj chayashpaca cushicurcacunami.

¹⁷ Faraonca, Josetaca: –Cambaj huauquicunataca cashna ni: Cancunapaj animalcunaman trigota apachishpa, Canaanman utca tigrashpa,

¹⁸ cancunapaj yayatapish, paipaj tucui huasi ucupuracunatapish ñucapajman pushashpa tigramugrichij. Ñucaca paicunamanca cai Egiptopica alli llajtatami cusha. Chaipimi paicunaca yallitaj achca micunata charingacuna.

¹⁹ Chaimanta cunanca caita rurai: Huahuacunata, huarmicunata pushamungapajca cai Egiptomanta carrocunata apashpa rishpa cancunapaj yayata pushamuchun mandai.

²⁰ Canaanpi imalla tiyajcunamantaca ama llaquirishpa shamuchunlla. Cai Egiptopi imalla tiyashcacunami paicunapaj canga– nircami.

²¹ Israelpaj churicunaca chashnami rurarcacuna. Joseca faraón mandashca shinallatajmi carrocunata cacharca, ñanpi micuchunpish micunata cacharcami.

²² Paipaj huauquicunamanca tucuicunamanmi mushuj churanacunata curca. Benjaminmancarin, 300 cullquita, pichca mushuj churanacunatami curca.

²³ Paipaj yayapajca, Egiptopi tiyaj tucuita yalli sumajcunatami chunga burrocunapi apachishpa cacharca. Paipaj yaya shamucushpa ñanpi micuchunpish chunga burracunapimi trigota, tandata, ima shujtaj micunatapish apachishpa cacharca.

²⁴ Chai q'uipami Joseca paipaj huauquicunata caya minchacama nishpa paicuna ña rigrijpica: –Ñanpi ama p'iñanacunguichij– nirca.

²⁵ Egiptomanta huichiyashpa Canaanman chayashpaca yaya Jacobpajman chayashpami,

²⁶ paicunaca Jacobmanca: “Joseca causacushcamari, paica tucui Egipto llajtata mandajmari” nishpa huillarcacuna. Ashtahuanpish Jacobca upayajta mancharishpaca mana crircachu.

²⁷ Paicunaca José imallata nishcacunatami cutinllataj parlarcacuna. Paita pushamuchun José cachashca carrocunata ricushpa yuyai shujtajyashpa cushicushpami,

²⁸ Israelca: “¡Imatataj ashtahuan shuyashari! ¡Ñuca churi Joseca causacushcarajmari! Ñuca manaraj huañushpa paita ricunaman utca rishalla” nirca.