GÉNESIS 41 - Dios Rimashca Shimicunami

Faraón muscushca imata nisha nishcata José huillashcami

¹ Chashna tucushcamanta ishqui huatapica faraonmi shuj muscuita muscurca. Paica jatun yacu c'uchupi cashcata,

² jatun yacumantaca sumaj ricunanqui huirayashca canchis vacacuna llujshishpa, q'uihua pambapi micucujta,

³ chaicunapaj q'uipaca jatun yacullamantataj p'iñanana yallitaj irqui canchis vacacuna llujshishpa, jatun yacu c'uchu uripi caj sumaj vacacunapaj c'uchupi shayarishpa,

⁴ p'iñanana yallitaj irqui vacacunaca, huirayashca sumaj canchis vacacunata millpujta muscushpami faraonca rijcharirca.

⁵ Cutinllataj dormirishca q'uipaca: Shuj ramallapi canchis caspa racu sumaj trigota,

⁶ chaipaj q'uipaca inti llujshin ladomanta shamuj rupaj huaira japishcamanta fichuyashca canchis caspa trigota,

⁷ chai fichuyashca canchis caspacunaca, grano junda canchis racu caspacunata millpujta muscushpami faraonca rijcharirca. Pai rijcharishpaca, chaicunaca muscuilla cashcatami ricurca.

⁸ Ashtahuanpish chai tutamantaca paipaj espiritupica llaquillami carca. Chaimi Egiptopi causaj jatun yachajcunata, yumbucunata cayachishpa pai imallata muscushcata parlarca. Paicunaca chai imata nisha nishcataca faraonmanca pi mana huillai tucurcachu.

⁹ Chaipimi copacunata pasachijcunata mandajca, faraonmanca: –Cunanmari yuyarini. Ñucaca mana allita rurashpami puricuni.

¹⁰ Faraón canca cambajta ruraj ñucanchijhuan p'iñarishpaca, canta cuidaj soldadocunata mandajpaj huasipi tiyaj carcelpimi ñucatapish, tandata rurajcunata mandajtapish prezu churarcangui.

¹¹ Paipish, ñucapish chaipi cashpami shuj tutaca ishquindijtaj ch'ican ch'icanta muscurcanchij. Chai muscushcacunaca ishquindijtajmi imata nisha nishcata charirca.

¹² Chaipica soldadocunata mandajpajta ruraj hebreo shuj mosomi ñucanchijhuan carca. Ñucanchij muscushcata paiman parlajpimi, ñucanchij cada quiquin muscushcataca chai imata nisha nishcata cada quiquinman huillarca.

¹³ Ñucanchijca pai nishca shinallatajmi tucurcanchij. Ñucaca ñaupaman shinallataj ñuca rurana cashcamanmi tigrarcani. Ashtahuanpish tandata rurajcunata mandajtaca huañuchishpa huarcushcami carca– nircami.

¹⁴ Chaimi faraonca Joseta cayamuchun cacharca. Paitaca carcelmanta utca llujshichijpimi, barbasta tucui rasparishpa, shujtaj churanacunata churarishpa faraonpajman shamurca.

¹⁵ Faraonca Josetaca: –Ñucami shuj muscuita charircani. Chaita huillajmari pi mana tiyan. Ashtahuanpish muscushcacunata huillajpi chaita uyashpaca canca chai imata nisha nishcata huillanlla nijtami uyani– nirca.

¹⁶ Chaimi Joseca faraonmanca: –Chaitaca mana ñucachu huillai tucuni. Ashtahuanpish Taita Diosmari chai imata nisha nishcataca can faraonpaj allipaj huillachinga– nirca.

¹⁷ Chaimi faraonca, Josemanca: –Ñucaca chai muscuipica jatun yacu uripi ñuca shayacujpi,

¹⁸ jatun yacumantaca huirayashca sumaj ricunanqui canchis vacacuna llujshishpa q'uihua pambapi micucujtami muscurcani.

¹⁹ Chaicunapaj q'uipaca cai Egiptopica maipi manataj ricushca p'iñanana yallitaj irqui canchis vacacuna llujshijtami muscurcani.

²⁰ Chai yallitaj irqui p'iñanana vacacunaca, ñaupaman llujshij huirayashca canchis vacacunata millpujtami muscurcani.

²¹ Chashna millpushpapish, chai vacacunaca mana micushca shinallatajmi carca. Ashtahuanpish ñaupaman cashcatapish yalli ashtahuan irquicunallatajmi carca. Chashnata muscushpami rijcharircani.

²² Chai q'uipaca cutinmi: Shuj ramallapi canchis caspa alli sumaj trigohuan junda huiñajta muscurcani.

²³ Chai q'uipapish inti llujshin ladomanta shamuj rupaj huaira japishcamanta fichuyashca canchis caspa trigo huiñajtami muscurcani.

²⁴ Chai fichuyashca canchis caspa trigoca, caishuj canchis caspa alli sumaj trigohuan junda caj caspacunata millpujtami muscurcani. Chai imata nisha nishcata huillanata yachajcunaman huillajpipish chai imata nisha nishcata huillajca mana tiyanchu– nircami.

²⁵ Chaimi Joseca faraontaca: –Can faraón ishqui cutin muscushcaca chaillatatajmi nisha nin. Taita Diosmi can faraonmanca, pai imata rurasha nicushcata ricuchishca.

²⁶ Huirayashca canchis vacacunaca, canchis huatacunami. Alli sumaj trigohuan junda caspacunapish, canchis huatacunallatajmi. Chai muscui imata nisha nishcaca ishquitaj chaillatatajmi nisha nin.

²⁷ Q'uipata llujshij p'iñanana yallitaj irqui canchis vacacunaca, canchis huatacunallatajmi. Inti llujshin ladomanta shamuj rupaj huaira japishcamanta fichuyashca canchis caspa trigopish, canchis huatacunallatajmi. Chaicunaca canchis huatata jatun yaricai tiyanatami ricuchin.

²⁸ Taita Diosca pai imata rurasha nishcatami can faraonmanca ricuchishca. Chaica cashnami canga.

²⁹ Cai Egiptopica, yallitaj achca alli granocunata p'ucuna canchis huatacunami shamugrin.

³⁰ Chai q'uipaca jatun yaricai canchis huatacunami shamugrin. Egiptopi ñaupaman alli grano p'ucuj cashcataca pi mana yuyaringacunachu. Jatun yaricaica tucui llajtapimi canga.

³¹ Chai yaricaica yallitaj jatun llaqui cashcamanta ñaupaman alli granocunata p'ucuj cashcaca nunca mana p'ucuj cashca shinami canga.

³² Can faraón ishqui cutin muscushcaca Taita Diosca ruranataj cashcata ña ruragrishcatami ricuchin.

³³ Chaimanta can faraonca cai Egiptopica alli yuyaiyuj, alli yachaj runata mashcashpa churanami alli canga.

³⁴ Can faraonca cai Egiptopi canchis huatacunata yallitaj achca alli granocunata p'ucucujpica, cada chungamanta ishquita japishpa huaquichijcunata mandajcunata tucui llajtapi churai.

³⁵ Alli granocunata p'ucucui huatacunapi tandashca granocunataca llajtacunapi causajcuna micunapaj cachun tucuita tandachishpa can faraonpaj maquipi churai.

³⁶ Granocunata huaquichinacunapica cai Egiptopi canchis huatacunata jatun yaricai tiyanapaj pajtata huaquichi. Chaimi cai llajtapi causajcunaca jatun yaricaipi mana huañungacuna– nircami.

Egiptopi q'uipa mandaj José tucushcami

³⁷ José chashna nishcaca faraonpipish, paita ayudajcunapipish alli ricurijpimi,

³⁸ faraonca paita ayudajcunataca: –Taita Diospaj espirituta charij cai runa shina pi shujtajtaca mana japishunchu– nirca.

³⁹ Faraonca Josetaca: –Tucui caicunataca Taita Diosmari canmanca yachachishca. Chaimanta can shina alli yachaj, alli yuyaiyujca pi mana tiyanchu.

⁴⁰ Ñuca huasitaca canmi mandangui. Tucui ñuca mandacun llajtami can mandashcata cazungacuna. Jatun tiyarinallapimi ñucalla tiyasha– nircami.

⁴¹ Chashna nishpaca Faraonca Josetaca: –Ñucaca cantaca tucui Egipto llajtata mandaj cachunmi churani– nircami.

⁴² Faraonca, paipaj maquimanta sortijasta llujshichishpaca Josepaj maquipimi churachirca. Ashtahuan alli lino sumaj churanatami churachirca. Cungapipish curimanta rurashca sumaj huallcatami apachirca.

⁴³ Faraonca Josetaca, pai purina carropaj cati carropi huichiyachishpami chaipaj ñaupajtaca: “¡Cungurichij!” nishpa caparishpa ñaupajta churarca. Chashnami Joseca tucui Egipto llajtapaj mandaj saquirirca.

⁴⁴ Chaipimi faraonca Josetaca: –Ñuca faraón cajpipish, tucui cai Egiptopica can mandajllapimi pi cashpapish paicunapaj maquita paicunapaj chaquita alzangacuna– nircami.

⁴⁵ Faraonca Josetaca Zafnat-paneatami shutichirca. Josepaj huarmi cachunca On pueblopi causaj Potifera curapaj ushushi Asenattami curca. Chashnami Joseca, Egiptopi causaj tucuicunata mandaj saquirirca.

⁴⁶ Joseca Egiptota jatun mandaj faraonpaj ñaupajman pushanapajca quimsa chunga huatayujmi carca. Paica faraonpajmanta rishpaca, Egiptopi tiyaj tucui pueblocunatami ricushpa purirca.

⁴⁷ Chai canchis huatacunatami Egiptopica yallitaj achca granocunata p'ucurca.

⁴⁸ Joseca Egiptopi canchis huatacunata yallitaj achca granocunata p'ucucui huatacunapica, tucuita tandachishpami pueblocunapi huaquichirca. Pueblo muyundijcunapi p'ucushcacunataca cada chai pueblopimi huaquichirca.

⁴⁹ Joseca yacu uripi tiyaj t'iyu allpata shinami trigotaca tandachirca. Mana yupai tucuipaj cashcamanta mana yupai tucuipajmi carca.

⁵⁰ Jatun yaricai huata manaraj chayamujpimi, Joseca ishqui churicunata charirca. Paicunataca On pueblopaj cura caj Potiferpaj ushushi Asenatmi huacharca.

⁵¹ Joseca, punta churitaca Manasestami shutichirca. Paica: “Taita Diosca ñuca llaquicunataca cungachircami. Ñuca huasi ucupuracunatapish cungachircami” nishpami, chashna shutichirca.

⁵² Q'uipa churitaca Efraintami shutichirca. Paica: “Taita Diosca ñucataca llaquita apacushca llajtapimari churicunayujta rurahuan” nishpami, chashna shutichirca.

⁵³ Egiptopi canchis huatacunata alli granocunata p'ucucushca tucurishpaca,

⁵⁴ José huillashca shinallataj canchis huata jatun yaricaimi callarirca. Tucui llajtacunapimi jatun yaricai tiyarca. Ashtahuanpish Egiptopica micunaca tiyarcami.

⁵⁵ Tucui Egipto llajtapi causajcunaca yaricaihuan cashpami, faraontaca micunata mañarcacuna. Chaimi faraonca tucui egipciocunataca: “Josepajman richij. Pai imalla nishcata ruraichij” nirca.

⁵⁶ Jatun yaricaica, tucui Egipto llajtata mirarishpa catijpimi, Joseca maillapi trigota huaquichishcata pascashpa egipciocunaman c'aturca. Egiptopi jatun yaricai cajpimi chashna carca.

⁵⁷ Tucui shujtaj llajtacunapipish jatun yaricai cashcamantami tucui llajtacuna Egiptopi Joseman granocunata randinaman shamurcacuna.