GÉNESIS 40 - Dios Rimashca Shimicunami

Ishqui runacuna muscushca imata nisha nishcata José huillashcami

¹ Tucui chaicuna chashna tucushca q'uipami, Egiptota jatun mandajpaj copacunata pasachijcunata mandajpish, tandata rurajcunata mandajpish paicunapaj amopajta mana allita rurarcacuna.

² Faraonca copacunata pasachijcunata mandajhuanpish, tandata rurajcunata mandajhuanpish yallitaj p'iñarishpami,

³ paita cuidaj soldadocunata mandajpaj huasipi prezu churagrichun mandarca. Josepish chai carcel-llapitajmi carca.

⁴ Soldadocunata mandajca, chai ishqui runacunataca José ricuchun churajpimi, paica paipaj randi cuidarca. Chai ishqui runacunaca unitami prezu carca.

⁵ Egiptota jatun mandajpaj copacunata pasachijpish, tandata rurajpish prezu tiyacushpami ishquindijtaj paicunaca chai tutallataj, ch'ican ch'icanta muscurcacuna. Chai muscushcacunaca paicuna ima tucunallatataj ricuchijmi carca.

⁶ Tutamanta paicunata ricunaman José yaicushpaca, llaquijllacuna cajtami ricurca.

⁷ Chaimi Joseca, paipaj amopaj huasipi prezu caj faraonpajta ruraj mandajcunataca: –¿Ima nishpataj cancunaca chashna llaquijlla ñahuicuna canguichigari?– nishpa tapurca.

⁸ Chaimi paicunaca: –Cunan tutamari ñucanchijca shuj muscuita muscurcanchij. Chai imata nisha nishcata pi mana huillaipaj cajpimari llaquijlla canchij– nijpimi, Joseca: –Chaicuna imata nisha nishcataca Taita Diosllamari huillachin nishpami, parlaichigari– nirca.

⁹ Chaimi copacunata pasachijcunata mandajca pai imata muscushcata Josemanca: –Ñucaca ñuca ñaupajpi shuj uva yura cajta,

¹⁰ chai yuraca quimsa ramacunayuj cajta, ramacunaca p'angacunayuj tucushpa sisashpa uvata p'ucujta,

¹¹ faraonpaj copaca ñuca maquipi cajta, uvata japishpa faraonpaj copapi capishpaca faraonpaj maquipi churacushcatami muscurcani– nirca.

¹² Chaimi Joseca: –Chai muscuica caitami nisha nin: Quimsa ramacunaca quimsa punllacunami.

¹³ Cunanmanta quimsa punllapimi faraonca cantaca caimanta llujshichishpa sarunman can maipi cashcallapitaj churajpi, canca copata pasachijcunata mandaj cashpa ruraj cashca shinallataj faraonpaj maquipi copata churangui.

¹⁴ Cunanca ñucaca, can ña alli cashpaca ñucata yuyarichun, faraón ñucata caimanta llujshichichun ñucamanta parlachunmi rogapani.

¹⁵ Ñucaca hebreocunapaj llajtamanta shuhuamushcami carcani. Carcelpi ñucata churachunca cai llajtapipish ñucaca ima mana allitaca mana rurarcanichu– nirca.

¹⁶ Tandata rurajcunata mandajpish chai muscushcaca allipaj cashcata José huillajta uyashpami Josemanca: –Ñucaca quimsa yuraj canastacunapi tandata uma jahuapi apacushcata,

¹⁷ chai canastacunapaj jahuapi caj punta canastapica faraonpaj tucui laya sumaj tandacuna cajta, chai canastapi caj tandacunataca pajarocuna shamushpa ñuca uma jahuallapitaj micucujtami muscurcani– nirca.

¹⁸ Chaimi Joseca: –Chai muscuica caitami nisha nin: Quimsa canastacunaca, quimsa punllacunami.

¹⁹ Cunanmanta quimsa punllapimi faraonca cantaca cungata p'itishpa huañuchishpa huarcujpi cambaj aichataca pajarocuna micungacuna– nircami.

²⁰ Chashna huillashca quimsa punllapica jatun mandaj faraonca pai huacharishca punlla pajtajpimi, pai churashca mandajcunahuan micungapaj sumaj micuita rurarca. Tucui chaipi cajcuna ricucujpimi, copacunata pasachijcunata mandajtapish, tandata rurajcunata mandajtapish carcelmanta llujshichinaman cacharca.

²¹ Copacunata pasachijcunata mandajtaca, pai maipi cashcallapitaj churajpimi, paica faraonpaj maquipi copata churashpa catirca.

²² Tandata rurajcunata mandajtaca, José huillashca shinallataj huañuchishpami huarcurca.

²³ Ashtahuanpish copacunata pasachijcunata mandajca, Josetaca mana yuyarircachu cungarircallami.