GÉNESIS 39 - Dios Rimashca Shimicunami

Josepish Potifarpaj huarmipish

¹ Josetaca Egiptomanmi pusharcacuna. Chaimi faraonta cuidaj soldadocunata mandaj Potifar runaca Joseta randirij ismaelitacunaman randirca.

² Mandaj Diosca Josehuanmi carca. Chaimi paica tucui imapipish alli llujshirca. Paica paipaj amo Potifarpaj huasipimi causarca.

³ Josepaj amoca Mandaj Diosca Josehuan cashcamanta, tucui pai imalla charishcacunapish yallitaj achcayashcatami ricurca.

⁴ Joseca chashnami paipaj amopi alli ricurishpa paipajta alli ruraj tucurca. Chaimi Potifarca paipaj huasipi mayordomo cachun churashpa, tucui pai imalla charishcacunata Josepaj maquipi churarca.

⁵ Chai egipcio paipaj huasita, tucui pai imalla charishcacunata Josepaj maquipi churai punllamantami Mandaj Diosca Josemanta chai runapaj huasipica, huasipipish, chagracunapipish achcata mirachirca.

⁶ Potifarca tucui pai imalla charishcacunata Josepaj maquipi churashpaca, imata mana sustarishpa micunallatami yuyarirca. Joseca sumaj ñahui, munananqui huambrami carca.

⁷ Ña uni huatacunata chaipi causacujpimi, Josepaj amopaj huarmica Joseta ricurashpa purishpa paita munashpa: –Ñucahuan dormishun– nirca.

⁸ Ashtahuanpish Joseca, mana chaita rurasha nishpami paipaj amopaj huarmitaca: –Ñuca amoca paipaj huasipi tucui imalla tiyashcacunata ñuca alli cuidajta ricushpami, paica imata mana sustarishpa tucui imalla charishcacunataca ñuca maquipi churarca.

⁹ Cai huasipica ñucata yalli tucuita ricujca, pi mana tiyanchu. Ñuca amoca tucui paipaj ima charishcacunatapish tucuitami ñuca maquipi churarca. Canllatami mana ñuca maquipi churarca. Chashna cashcamanta ñucaca maitataj jatun millaita rurashpa, Taita Diosta p'iñachishpa juchallishari– nircami.

¹⁰ Chai huarmica Josetaca punllantami chashna nicurcalla. Ashtahuanpish Joseca chai huarmihuanca mana siririsha nircachu. Paipaj c'uchupi canallatapish mana munarcachu.

¹¹ Shuj punllami Joseca pai imalla rurana cashcata rurangapaj huasiman yaicurca. Chai punllallatajmi chai huasimantaca tucuicuna illarca.

¹² Chaimi chai huarmica, churanapi japishpa Josetaca: –Cunantajca ñucahuan dormishunllari– nijpi Joseca, churanata chai huarmipaj maquipi shitashpa callpashpa rirca.

¹³ Churanata paipaj maquipi saquishpa callpajpimi,

¹⁴ chai huarmica huasipi imatapish rurajcunata cayashpaca: –Riquichij, cai hebreo runataca ñucanchijta chanzata rurachunmari apamushca. Ñuca tiyacun ucuman yaicushpa ñucahuan dormishun nijpimi, ñucaca sinchita caparircani.

¹⁵ Sinchita caparijpimi, paipaj churanata caipi shitashpa callpashpa rin– nirca.

¹⁶ Paipaj cusa shamungacamami Josepaj churanataca paipaj c'uchupi charicurca.

¹⁷ Cusa chayajpica, huasipi cajcunaman huillashca shinallatajmi: –Ñucanchijpajta rurachun can apamushca hebreo runaca ñucapajman shamushpami, ñucata japirisha nirca.

¹⁸ Paica sinchita ñuca caparijpimi, paipaj churanata caipi shitashpa callpashpa rirca.

¹⁹ Cambajta ruraj runaca chashnamari ruran nishpa paipaj huarmi huillajta uyashpami, Josepaj amoca nina sindirij shina p'iñarirca.

²⁰ Chaimi Josepaj amoca Josetaca jatun mandaj prezu churashcacuna tiyacun carcel-llapitaj prezu churachirca. Chaipimi prezu saquirirca.

²¹ Prezupi cajpipish Mandaj Diosca Josehuan cashpa paita llaquijpimi, carcelpi cajcunata ricujcunata mandajpica allita ruraj ricurirca.

²² Carcelpi cajcunata ricujcunata mandajca Josetaca chaipi caj prezucunata cuidachunmi paipaj maquipi churarca. Joseca, prezucuna tiyana carcelpi imalla rurana cashcataca tucuitami rurarca.

²³ Joseca Mandaj Dios paihuan cajpimi, tucui pai imata rurashcapish alli llujshirca. Chaimi carcelpi cajcunata ricujcunata mandajca José ima shina ruracujta ricunataca mana yuyarca.