GÉNESIS 34 - Dios Rimashca Shimicunami

Leapaj ushushi Dinata cananeocuna llaquichishpa pingaichijpi paicunatapish llaquichishcami

¹ Leaca Jacobpajtaca, Dina shuti ushushitami charirca. Chai solteraca chai llajtapi causaj solteracunata rijsinamanmi rirca.

² Paitaca chai llajtata mandaj heveo Hamorpaj churi Siquem moso ricushpami mana nicujllatataj pushashpa paihuan dormishpa pingaichirca.

³ Siquemca Leapaj ushushi Dinapi shunguta churashpa yallitaj munashcamantami, Dinapish paita c'uyachun nishpa sumajta rimarca.

⁴ Chaimi Siquemca paipaj yaya Hamortaca: –Cai soltera ñuca huarmi cachun, paipaj yayata mañagripai– nirca.

⁵ Jacobca, paipaj ushushi Dinahuan Siquem moso dormishpa pingaichishcata yachashpapish, paipaj churicuna michinamanta tigramungacama upalla carcallami.

⁶ Chaicamaca Siquempaj yaya Hamorca, Jacobhuan parlanacungapajmi rirca.

⁷ Jacobpaj churicunaca michinamanta tigramushpami, paicunapaj pani ima tucushcata yachaj chayarcacuna. Paicunapaj yaya Jacobpaj ushushihuan Siquem moso dormishpaca, manapish rurana cashcata rurashpa israelcunata jatun pingaipi churashcamantami achcata llaquirishpa yallitaj p'iñarircacuna.

⁸ Hamor runa paicunahuan parlashpaca: –Ñuca churi Siquemca cambaj ushushipi shunguta churashpami yallitaj munan. Chaimanta paitaca ñuca churipaj huarmi cachun cuchunmi rogani.

⁹ Ñucanchijca cancunapaj ushushicunata, cancunapish ñucanchij ushushicunata quiquin huarmicuna cachun japishpa, familiapura tucushunchijlla.

¹⁰ Chashna rurashpa ñucanchijhuan causashunchijlla. Cai llajtapica maipipish cancuna munashcapi causaichijlla. Imatapish c'atushpa randishpa causaichijlla– nircami.

¹¹ Siquem mosopish Dinapaj yaya Jacobta, turicunataca: –Ñuca mañashcata cancuna ari nijpica, cancuna ima mañashcatami cusha.

¹² Shuj huarmimanta cuna cashcacunatapish, convidana cashcacunatapish ashtahuan yallihuan mañaichijlla. Ñucaca cancuna mashnata mañashcata cushallami. Ashtahuanca solterata ñuca huarmi cachun cupaichij– nircami.

¹³ Jacobpaj churicunaca, paicunapaj pani Dinata llaquichishpa pingaichishcamantaca Siquemtapish, paipaj yaya Hamortapish umangapajmi,

¹⁴ cashna nircacuna: –Ñucanchijpurapica circuncisionta mana rurachishca c'arihuan cazarachinaca yallitaj millananami. Ñucanchij panitaca cambaj huarmi cachunca mana cui tucunchijchu.

¹⁵ Cunanca cancuna cashna rurajllapimi ñucanchij panitaca cui tucunchij: Cancunaca ñucanchij shinallataj cangapajca, cancunapurapi caj tucui c'aricunami circuncisionta rurachina canguichij.

¹⁶ Chashna rurajllapimi ñucanchij ushushicunataca cancunaman cushun, ñucanchijpish cancunapaj ushushicunata japishpa cancunahuan causashpa shuj pueblolla tucushun.

¹⁷ Ashtahuanpish ñucanchij nishcata mana uyashpa circuncisionta mana rurachijpica, ñucanchij panita pushashpa cai llajtamanta rishunllami– nircacunami.

¹⁸ Paicuna chashna nishcaca alli yuyachijpimi, Hamorpish paipaj churi Siquempish chashna rurashun nircacuna.

¹⁹ Siquem mosoca Jacobpaj ushushita yallitaj munashcamantami mana uniyashpalla, circuncisionta rurachirca. Paipaj yayapaj huasi ucupurapica, Siquem mosollami tucuicunata yalli alli nishca carca.

²⁰ Chaimi yaya Hamorpish, paipaj churi Siquempish puebloman yaicuna pungu c'uchullaman rishpa chaipi caj tucuicunaman cashna nishpa parlarcacuna:

²¹ –Chai runacunaca ñucanchijhuanca allicunami. Cai llajtaca paicuna causanalla yallitaj achcami. Chaimanta paicunaca cai llajtapimi c'atushpa randishpa causangacuna. Ñucanchijca paicunapaj ushushicunata ñucanchij huarmi cachun japishun, ñucanchijpish ñucanchij ushushicunatami paicunapaj huarmi cachun cushun.

²² Chai runacunaca ñucanchij caita rurajllapimi ñucanchijhuan causashpa shuj pueblolla tucungacuna: Paicunaca circuncisionta rurashca cashcamantaca ñucanchijtapish tucui c'aricunatami circuncisionta rurachichun nincuna.

²³ Ñucanchij chashna rurajpica paicunapaj huagracunapish, imalla charishcacunapish, animalcunapish tucuimi ñucanchijpaj canga. Chaimanta ñucanchijca paicuna nishcataca chashna ruranaca allimi ninallami canchij. Chashnami paicunapish, ñucanchijpish tandalla causashun– nircacunami.

²⁴ Hamorhuan paipaj churi Siquemhuan nishcacunataca chai pueblo punguta llujshicujcunaca tucuicuna allimi nishpa cazushpami, chai pueblo punguta llujshijcunaca tucuicuna circuncisionta rurachircacuna.

²⁵ Circuncisionta rurachishca quimsa punllapica paicuna ashtahuan nanaihuan cajpirajmi, Jacobpaj ushushi Dinapaj turicunamanta Simeonhuan, Levihuanca paicunapaj espadata apashpa chai pueblopi causajcunapajman cungaillapi rishpa tucui c'aricunata huañuchircacuna.

²⁶ Hamortapish paipaj churi Siquemtapish espadahuan huañuchishpami, paicunapaj pani Dinataca Siquempaj huasimanta pushashpa tigrarcacuna.

²⁷ Jacobpaj churicunaca paicunapaj panita llaquichishpa pingaichishcamantami, chai pueblopi caj huañushcacunapaj jahuata saru saru purishpa, tucui chaipi causajcuna imalla charishcacunata apashpa rircacuna.

²⁸ Ovejacunata, vacacunata, burrocunata, chai pueblopi tucui imalla tiyajcunata, chagracunapi imalla tiyajcunatapishmi tucuita aparcacuna.

²⁹ Huarmicunata, huahuacunatapish, paicuna imalla charishcacunandijmi prezu aparcacuna. Huasicunapi tucui imalla tiyashcacunatapish shuhuashpami aparcacuna.

³⁰ Chaimi Jacobca, Simeontapish Levitapish: –Cancuna chashna rurashpaca, ñucatamari cai llajtapi causaj cananeocunapi, ferezeocunapi p'iñaipi churashpa, jatun llaquipi churanguichij. Ñucaca ashalla gentecunatamari charini. Chaimanta cunanca paicuna tandanacushpami ñucatapish, ñuca huasi ucupuracunatapish huañuchishpa chingachingacuna– nircami.

³¹ Chaimi paicunaca: –Ñucanchij panitaca ¿maitataj huainayashcahuan causaj huarmita shinaca rurana carcari?– nircacuna.