GÉNESIS 31 - Dios Rimashca Shimicunami

Jacobca Labanpaj pacalla rinata yuyarishcami

¹ Labanpaj churicunaca: “Jacobca ñucanchij yaya imalla charishcacunatami japishca. Ñucanchij yayapaj charishcacunahuanmi cai tucuitaca charijyashca” ninacushcami Jacobpica uyarishca.

² Jacobca, Labanpish ña mana ñaupa shina c'uyaj ñahuihuan paita ricucushcatami ricurca.

³ Chaimi Mandaj Diosca Jacobtaca: “Cambaj yaya mamapish, cambaj familiacunapish causacun llajtallamantaj tigrailla. Ñucami canhuan casha” nirca.

⁴ Chaimi Jacobca Raqueltapish, Leatapish paipaj ovejacuna maipi canman cayachishpa,

⁵ paicunataca: –Cancunapaj yayaca ñucataca, ña mana ñaupa shina c'uyaj ñahuihuan ricunchu. Shina cajpipish, ñuca yayapaj Taita Diosca ñucahuanmi.

⁶ Ñuca tucui fuerzahuan cancunapaj yayapajta rurashpa causacushcataca yachanguichijmi.

⁷ Cancunapaj yayaca ñucata umashpami, paipajta rurashcamanta ñuca japina cashcataca chunga cutin shujtajyachishca. Taita Diosmari ñucata llaquichichunca mana saquihuashca.

⁸ Labanca: Ñucapajta rurashcamantaca yana ovejacunaca tucuimi cambaj canga nijpica, tucui ovejacunami yanacunallata huacharca. Muru ovejacunami tucui cambaj canga nijpica, tucui ovejacunami murucunallata huacharca.

⁹ Chashnami Taita Diosca cancunapaj yayapaj animalcunata quichushpa ñucaman curca.

¹⁰ Ñucaca ovejacuna japinacuna punllacunapi muscuipi shina ricushpaca, huarmi ovejacunata japicuj c'ari ovejacunaca tucuicuna yanajlla, puzujlla, murujlla cajtami ricurcani.

¹¹ Chai muscuipimi Taita Diospaj angelca ñucataca: Jacob nijpi: Ñucaca caipimi cani nircani.

¹² Chaipimi angelca: Jacob, canta ima shina Labán llaquichicujtaca allimi yachani. Ashtahuanpish cunan can ricucujpi japinacucuj ovejacunaca tucuicunami yanata, puzuta, muruta huachanga.

¹³ Ñucaca Bet-elpi canman ricurij Taita Diosmi cani. Chaipimi canca shuj rumi jahuapi aceiteta tallishpa, ñucapajta rurana tucurcangui. Chaimanta cunanca canca cai llajtamanta llujshishpa, can huacharishca llajtallamantaj tigrai ninmi– nircami.

¹⁴ Chaimi Raquelpish, Leapish: –Shinashpaca ñucanchij yayapajta imalla japina cashcataca, ña mana charinchijchu.

¹⁵ Ashtahuanpish ñucanchij yayaca ñucanchijtaca, maimanta shamushcata shinami charin. Ñucanchijtapish canmanca c'atushcamari. Ñucanchijmanta can trabajashcahuanmari charijyashca.

¹⁶ Ñucanchij yaya tucui imalla charishcacunata Taita Dios quichushcaca ñucanchijpajpish, ñucanchij huahuacunapajpishmari tucushca. Chaimanta Taita Dios imallata canman nishcata rurailla– nircacuna.

Labanpajmanta Jacob pacalla rishcami

¹⁷ Chashna parlanacushpami Jacobca paipaj churicunatapish, huarmicunatapish camellocunapi tiyachishpa,

¹⁸ Padan-arampi Labanpajta rurashcamanta pai japina cashcamanta japishca animalcunatapish, tucui imalla charishcacunatapish tandachishpa, Canaanpi caj paipaj yaya Isaacpajman tigrangapaj ñanpi yaicurca.

¹⁹ Labanca paipaj ovejacunata rutunaman rishca cajpimi, Raquelca paipaj yayapaj dioscunata shuhuashpa rirca.

²⁰ Jacobca arameo Labanmanca pai rina tucushcataca mana huillashpami pacalla rirca.

²¹ Jacobca pai imalla charishcacunata tucuita apashpa pacalla rishpaca, Éufrates jatun yacuta ch'imbashpami Galaad urcuman rirca.

Labanca Jacobta catishpa rishcami

²² Jacob pacalla rishcataca, quimsa punlla q'uipami Labanmanca huillarcacuna.

²³ Labanca, paipaj familiacunata tandachishpa paihuan pushashpami Jacobta catishpa rirca. Canchis punllata purishpami Galaad urcupi japirca.

²⁴ Ashtahuanpish chai tutallatajmi Taita Diosca arameo Labanman muscuipi ricurishpaca: “Jacobtaca ama imata ninguichu” nirca.

²⁵ Labanca, Galaad urcupi maipimi carpa huasicunata shayachishpa Jacob tiyacun chaipi cati japishpami paipish carpa huasicunata shayachishpa paipaj familiacunandij chaipi tiyarirca.

²⁶ Chaipimi Labanca, Jacobtaca: –¿Imatataj rurashcanguichu, imamí? ¿Ima nishpataj ñucapaj pacalla, ñuca ushushicunataca jatun macanacuipi mishashpa prezu apajcuna shina pushamurcangui?

²⁷ ¿Ima nishpataj ñucaman mana huillashpa pacalla callpamurcangui? Can shamusha nishcata ñuca yachashca cashpaca tamborpi, arpapi tocashcacunahuan cantashcacunahuan cushicushpamari, sumaj micuita rurashpa caya minchacama nishpa cachaiman carcani.

²⁸ Ñuca nietocunata, ñuca ushushicunata muchashpa caya minchacama nichunllapish mana saquishcanguichu. Cai cutinca canca loco shinamari utca shamushcangui.

²⁹ Chashna rurashcamanta cancunataca imata rurashpapish ñuca maquihuan llaquichi tucunimi. Shina cajpipish cunan tutamari cambaj yayapaj Taita Diosca: Jacobtaca ama imata ninguichu nirca.

³⁰ Cambaj yayapaj huasiman tigranata munashcamanta tigracushpapish ¿ima nishpataj ñuca dioscunata shuhuamurcangui?– nirca.

³¹ Chaimi Jacobca, Labantaca: –Cambaj ushushicuna mana saquirisha nicujpipish ñucata quichushpa saquichingallatajmari nishpa manchashpami mana huillarcani.

³² Caipi cajcuna maijanpish cambaj dioscunata charicujta can japijpica chaica huañungatajmi. Ñucapaj cajcunapi mashcashpa cambaj imalla cajcunata japishpaca, ñucanchij familiacunapaj ñaupajpi ricuchishpa apailla– nircami. Jacobca Raquel paipaj yayapaj dioscunata shuhuamushcataca manataj yachashcamantami chashna nirca.

³³ Labanca Jacobpaj carpa huasiman, Leapaj carpa huasiman, Leapajta, Raquelpajta ruraj huarmicunapaj carpa huasicunaman yaicushpa mashcashpaca imata mana japircachu. Leapaj carpa huasimanta llujshishpaca, Raquelpaj carpa huasimanmi yaicurca.

³⁴ Raquelca rurashcalla dioscunataca camello parejo ucupi churashpami, chai jahuapi tiyarirca. Chaimi Labanca tucui carpa huasicunapi mashcashpapish maipi mana japirca.

³⁵ Raquelca paipaj yayataca: –Ñuca amito, ñucaca quilla ungüihuan cashpami, caimantaca mana jatari tucuni. Ama p'iñaripangui– nircami. Chaimi Labanca tucuipi callarishpa mashcashpapish, rurashcalla paipaj dioscunataca maipi mana japirca.

³⁶ Imata mana japijpimi, Jacobca achcata p'iñarishpa Labantaca: –¿Ima mana allitataj rurarcaniri? Nina sindirij shina p'iñarishpa ñucata catishpa shamuchunca ¿ima juchatataj rurashcani?

³⁷ Ñuca imalla charishcacunapica, ñami tucuita mashcangui. Cambaj huasimanta imata apamushca cajpi japishpaca, ñucahuan cajcunapaj ñaupajpi, canhuan cajcunapaj ñaupajpi ricuchihuailla. Chaimi paicuna ricushpaca ñucanchij ishquimanta maijan mana allita ruraj cashcata ricungacuna.

³⁸ Ñucaca ishqui chunga huatacunatami cambajta rurashpa causarcani. Chaipica cambaj ovejacunapish, cambaj chivocunapish mana shullurcachu. Cambaj canlla ovejamanta shuj carnerollatapish huañuchishpa mana micurcanichu.

³⁹ Sacha animalcuna cambaj animalcunata huañuchijpipish, mana cambajman apamurcanichu. Chaipaj randica ñucami shujtajta churajlla carcani. Tuta cashpa punlla cashpa cambaj animalcunata shuhuajpica pagachijtajmi carcangui.

⁴⁰ Chaimantami rupai punlla yallitaj ruparicushpapish, casa tuta chirihuan cashpapish mana dormishpa alli cuidarcani.

⁴¹ Chashnami ñucaca ishqui chunga huatacunata cambajta rurashpa causarcani. Chunga chuscu huatacunataca cambaj ishqui ushushicunamantami, cambajta rurarcani. Sujta huatacunataca cambajta cai ñuca japishca animalcunamantami cambajta rurarcani. Shina cajpipish ñucaman cusha nishcataca shuj cutinllapish mana chaitataj pajtachishpami, chunga cutin shujtajyachircangui.

⁴² Abrahampaj Taita Dios, ñuca yaya Isaac manchashpa cazuna Taita Dios mana ñucahuan cashca cajpica, ñucataca chushaj maquillatami tigrachishpa cachanguiman carca. Ashtahuanpish ñuca maquicunahuan c'uyaillata cambajta trabajacujta ricuj Taita Diosmi, cunan tuta canman ricurishpa ama imata rurachun jarcashca– nircami.

Jacobpish Labanpish mana p'iñanacunata ari ninacushcami

⁴³ Chaimi Labanca Jacobtaca: –Cambaj huarmicunaca ñuca ushushicunami. Paicunapaj huahuacunapish ñuca churicunami. Cambaj ovejacunapish ñuca ovejacunami. Tucui caipi can imallatami charicungui, tucui chaicunami ñucapaj. Shina cajpipish ñuca ushushicunatapish, paicuna huachashca churicunatapish imata mana rurai tucunichu.

⁴⁴ Ashtahuanpish cunanca canpish ñucapish alli tucunacushcata ricuchij shuj ruranata ari ninacushun– nirca.

⁴⁵ Shina nijpimi Jacobca, Labanhuan ari ninacushcata ricuchij cachun shuj rumita japishpa shayachishpaca,

⁴⁶ tucui paipaj huasi ucupuracunataca: –Rumicunata japichij– nijpi, tucuicuna rumicunata japishpa chai jahuallapitaj montonarcacuna. Chai q'uipaca rumicunata montonashca jahuapimi micurcacuna.

⁴⁷ Chaitaca Labanca Jegar Sahadutami shutichirca. Jacobca Galaadtami shutichirca.

⁴⁸ Chaimi Labanca Jacobtaca: –Cai rumi montonmi ñucanchij ishqui ari ninacushcata ricuchij canga– nishpami, chai pambataca Galaadta shutichishpa,

⁴⁹ Mizpa shutitapish shutichishpaca Jacobtaca: –Canpish ñucapish ch'icanyashpa carupi causacujpica, Mandaj Dios cantapish ñucatapish cuidachun ninimi.

⁵⁰ Ñuca ushushicunata llaquichijpipish, mana cashpaca ñuca ushushicunata charishca jahua shujtaj huarmicunata cambaj huarmi cachun japijpipish, canpish ñucapish mana tandalla cajpipish cantapish ñucatapish ricucuj Taita Dios imatapish nichun ninimi– nircami.

⁵¹ Labanca Jacobtaca cashnapish nircarajmi: –Riqui, cai rumi montonta rurashpa shayachishca canhuan ñucahuan chaupipi cajmi canhuan ñucahuan ari ninacushcata ricuchij canga.

⁵² Cai rumi montonmi canpish ñucata llaquichinaman cai rumi montonta mana pasana cashcata, ñucapish canta llaquichinaman cai rumi montonta mana pasana cashcata ricuchij canga.

⁵³ Ñucanchij chashnataj rurashunmi ninacushcataca cambaj abuelo Abrahampajpish, ñuca abuelo Nacorpajpish Taita Diosllataj chaitataj pajtachina yuyaita cushca cachun– nircami. Shina nijpimi Jacobca, paipaj yaya Isaac cazushpa manchana Taita Diospaj shutipi chashnataj pajtachinata ari nirca.

⁵⁴ Chai q'uipami Jacobca, chai urcupi Taita Diosman animalcunata cushpa huañuchishpa rupachirca. Jacobca tucui paipaj familiacunatami micuchun cayarca. Paicunaca chaipi micushpaca chai tutaca chaillapitajmi dormircacuna.

⁵⁵ Labanca utcata jatarishpami paipaj ushushicunatapish, paipaj nietocunatapish muchashpa alli cashca canguichij, caya minchacama nishpa paipaj llajtallamantaj tigrarca.