GÉNESIS 24 - Dios Rimashca Shimicunami

Abrahamca Isaacpaj huarmi cachun huarmita mashcashcami

¹ Abrahamca achca huatacunayuj, yallitaj yuyajmi carca. Mandaj Diosca Abrahamtaca tucuipimi bendiciarca.

² Abrahamca, paipajta rurajcunamanta ashtahuan yalli yuyaj paipajta rurajcunatapish mandaj, tucui pai imalla charishcacunatapish cuidaj runata cayashpami: –Cunanca cambaj maquita ñuca changapi churashpa,

³ ñuca churi Isaactaca, ñuca causacun cai Canaán llajtapi causaj huarmicunapurahuan cazarachun mana saquinata jahua pachata, cai pachata Mandaj Taita Diospaj ñaupajpi ari ni.

⁴ Ashtahuanpish ñuca quiquin llajtaman rishpa, ñuca familiacunapuramanta shuj huarmita ñuca churi Isaacpaj huarmi cachun pushamunata ari ni– nirca.

⁵ Chaimi paipajta ruraj runaca: –Pushanaman rijpipish pi huarmi ñucahuan mana shamusha nij imajpica ¿cambaj churitachu can maimanta llujshimushca llajtaman pushangapaj tigramusha?– nirca.

⁶ Shina nijpi Abrahamca: –¡Ñataj ñuca churita chai llajtaman pushanguiman!

⁷ Ñucataca jahua pacha Mandaj Taita Diosmi ñuca yayapaj huasimanta, ñuca familiacunapuramanta pushamushpa ñucamanca: “Cai llajtataca cambaj huahua huahuacunaman cushatajmi” nirca. Ñuca churipaj shuj huarmita chai llajtamanta pushamuchunpish pai Diosllatajmi paipaj angelta canta ñaupachishpa cachanga.

⁸ Shina cajpipish pi huarmi canhuan mana shamusha nijpica, ñucaman ari nishcata ña pajtachishcamanta canca ima juchachina illajllami saquiringui. Ashtahuanca ñuca churi Isaacllata chai llajtaman ama pushangui– nircami.

⁹ Shina nijpi paipajta ruraj runaca, paipaj amo Abrahampaj changapi maquita churashpami, chai ari ninacushcataca pajtachishatajmi nirca.

¹⁰ Chai q'uipaca paipajta ruraj runaca paipaj amo Abraham charishcacunataca tucuimanta yalli alli camaricunata agllashpa, amopaj chunga camellocunata japishpa chaicunaman apachishpa ñanpi yaicushpaca, Mesopotamiapi caj Nacor causacun pueblomanmi chayarca.

¹¹ Ña chishiyacuitami puebloman yaicunllapi caj pugyu c'uchupi, camellocunata cungurichishpa samachicurca. Chaica chai pueblopi causaj solteracuna yacuta huishinaman rina horasmi carca.

¹² Chaipimi paica: “Ñuca amo Abrahamta Mandaj Taita Dios, ñuca cunan pihuan tupashcaca alli cashca cachun. Ñuca amo Abrahamta c'uyashcata ricuchihuai nirca.

¹³ Cunanca cai pugyu c'uchullapimi shuyagrini. Cai pueblopi causajcunapaj ushushicuna yacuta huishinaman shamujpica,

¹⁴ maijan solteratami ñuca: Cambaj puñuta uricuchishpa yacuta ñucaman ubyachihuai nijpi paica: Ubyailla, cambaj camellocunamanpish ubyachisha nij huarmimi, cambajta ruraj Isaacman quiquin cushca huarmi canga. Chaita ricushpami, ñuca amota quiquin c'uyashcataca yachasha” nircami.

¹⁵ Pai chashna mañacujpirajmi Rebeca solteraca puñuta rigra jahuapi churashca shamucurca. Paica Betuelpaj ushushimi carca. Betuelpaj yayaca Nacormi carca. Nacorca Abrahampaj huauquimi carca. Nacorpaj huarmica Milcami carca.

¹⁶ Chai solteraca sumaj ñahui, c'arihuan manaraj chayarinacushcami carca. Paica pugyuman uriyashpa paipaj puñupi yacuta huishishpami ña tigragrirca.

¹⁷ Chaimi Abrahampajta ruraj runaca paipajman callpashpa rishpaca: –Cambaj puñumanta asha yacuta ñucaman ubyachihuai– nishpa rogarca.

¹⁸ Shina nijpi paica: –Ñuca amitolla ubyailla– nishpami, puñuta uricuchishcahuan paipaj maquihuan charishpa ubyachirca.

¹⁹ Chai runa ña ubyajpica, paica: –Cambaj camellocunapish mana nijta ubyachun pugyumanta yacuta llujshichisha– nircami.

²⁰ Shina nishpaca, yacuta ubyachina rumipi puñumanta yacuta tallishcahuanmi, tucui camellocuna mana nijta ubyangacama yacuta llujshichishpa ashtacurcalla.

²¹ Chai runaca achcata mancharishpa upalla shayashpami, pai shamushcataca Mandaj Diosca yangallata ruragrishcata, allita ruragrishcata yachasha nishpa shayacurca.

²² Camellocuna yacuta ña mana nijta ubyajpica, Abrahampajta ruraj runaca Rebecamanca chaupi siclota pezaj curi shuj argollata, chunga siclota pezaj curi ishqui brazaletecunata cushpami,

²³ cashna nirca: –Canca ¿pipaj ushushitaj cangui? ¿Cambaj yayapaj huasipi cunan tuta ñucanchij samaringapaj samarina tiyanchu?– nishpami tapurca.

²⁴ Chaimi paica: –Ñucaca Betuelpaj ushushimi cani. Ñuca yayapaj yayaca Nacormi, mamaca Milcami– nirca.

²⁵ Cashnapishmi nirca: –Ñucanchij huasipica cunan tuta cancuna maipi samarinapish ujshapish, q'uihuapish achcami tiyan– nircami.

²⁶ Shina nijpi chai runaca cumurishpami Mandaj Diostaca:

²⁷ “Ñuca amo Abrahamta Mandaj Taita Diostaca alli nishca cachun. Paica ñuca amota c'uyashpa, pai imata nishcata pajtachishpami, ñucataca tucui ñanta pushashpa ñuca amopaj huauquicunapaj huasiman pushamushca” nishpami adorarca.

²⁸ Chai solteraca, huasiman callpashpa rishpami, pihuan tupashcata tucuita paipaj mamaman huillarca.

²⁹ Rebeca solteraca, Labán shuti turitami charirca. Paica huasimanta llujshishcahuan callpashpa rishpami, yacu pugyu c'uchupi caj runapajman rirca.

³⁰ Paipaj panitaca curi argollata aparishcata, maquicunapipish curi brazaletecunata aparishcata ricushpa: “Chai runa imalla nishcatapish huillashcata uyashpami” chai runa maipi canman rirca. Pai rishpaca yacu pugyu c'uchupi camellocunandij shayacujta japishpaca,

³¹ cashnami nirca: –Mandaj Dios alli nishca runa jacupai. ¿Maitataj caipica pacaringuiyari? Cancuna samarina huasitapish, camellocunata maipi churanatapish ñamari allichimuni– nirca.

³² Chaimi chai runaca, Labanpaj huasiman shamurca. Labanca camellocuna aparishcacunata uricuchishpami, ujshatapish q'uihuatapish cararca. Chai runapaj chaquicunata maillanapajpish, paihuan shamujcunapaj chaquicunata maillanapajpish yacuta curcami.

³³ Micunata carajpimi Abrahampajta ruraj runaca: –Ñuca imapaj shamushcata manaraj huillashpaca, mana micui tucunichu– nijpimi, Labanca: –Imata nina cashpaca nihuailla– nirca.

³⁴ Chaimi chai runaca: –Ñucaca Abrahampajta ruraj runami cani.

³⁵ Mandaj Diosmi ñuca amomanca achca allicunata cushpa achcata charijyachishca. Chaimi paica ovejacunata, vacacunata, cullquita, curita, paipajta ruraj c'aricunata, huarmicunata, camellocunata, burrocunatapish achcata charij tucurca.

³⁶ Ñuca amopaj huarmi Saraca yuyaj pachapimi, ñuca amopajtaca shuj c'ari huahuata huacharca. Ñuca amoca pai tucui imalla charishcacunatami chai churiman curca.

³⁷ Ñuca amoca ñucataca: Ñuca churitaca cunan ñuca causacun cai llajtapi causaj cananeocunapaj ushushicunahuanca amataj cazarachingui.

³⁸ Ashtahuanpish ñuca yayapaj huasiman, ñuca familiapurapajman rishpa ñuca churipaj huarmi cachunca shuj huarmita pushamungui nishpami, chashnataj ruranata ari nichirca.

³⁹ Chaimi ñucaca: Pi huarmi ñucahuan mana shamusha nij imajpica nircani.

⁴⁰ Chaimi paica: Ñucaca tucui causaipimi Mandaj Diospaj ñaupajpi purini. Paillatajmi canhuanpish paipaj angelta cachajpi paica tucui ñanpi canta cuidajpi alli ringui. Chaimi ñuca yayapaj huasimanta, ñuca familiapuramantaca ñuca churipaj shuj huarmita pushamungui.

⁴¹ Can ñuca yayapaj huasi familiapurapajman rijpi, paicunapaj ushushita mana cujpica, ari nishcata pajtachishcamanta canca ima juchachina illajllami saquiringui nircami.

⁴² Chaimantami ñucaca cai puebloman yaicuna yacu pugyu c'uchuman chayamushpaca cashna mañarcani: “Ñuca amo Abrahamta Mandaj Taita Dios cunan ñuca caiman shamushca ama yanga cachun quiquin allita rurashpaca,

⁴³ cai pugyu c'uchullapi ñuca shayacujpi maijan solterata cai pugyumanta yacuta apanaman pushamupai. Paitaca ñucaca: Riqui asha yacuta ñuca ubyangapaj cambaj puñumanta cuhuai nishami.

⁴⁴ Shina nijpi paica: Caillahuan ubyapai, cambaj camellocunamanpish yacuta huishishpa ubyachisha nij huarmimi, cambajta ruraj Isaacman quiquin cushca huarmi canga nishpami mañacurcani”.

⁴⁵ Ñuca shungupi chashna mañacujpirajmi, Rebecaca puñuta rigra jahuapi churashca shamucushca carca. Paica pugyuman uriyashcahuan, yacuta huishishpa tigragrijpimi: “Yacuta ñucaman ubyachihuai” nishpa rogarcani.

⁴⁶ Shina nijpi paica rigra jahuamanta puñu yacuta uricuchishcahuanmi: Caillahuan ubyapai, cambaj camellocunamanpish yacuta ubyachisha nishpa ñucamanpish yacuta curca. Camellocunamanpish yacuta ubyachirca.

⁴⁷ Chaimi ñucaca: Canca ¿pipaj ushushitaj cangui? nijpi paica: Ñucaca Betuelpaj ushushimi cani, ñuca yayapaj yayaca Nacormi, mamaca Milcami nijpi ñucaca paipaj singapica shuj argollata churachircani. Maquicunapica brazaletecunata huatachircani.

⁴⁸ Chai q'uipaca ñuca amopaj churipaj huarmi cachunca paipaj huauquipaj ushushita pushachun tucui ñanpi cuidashpa pushamushcamantami ñuca amo Abrahamta Mandaj Taita Diospaj ñaupajpica cumurishpa allimari cangui nishpa adorarcani.

⁴⁹ Chaimanta cunanca ñuca amota llaquishcamanta paipaj allita rurasha nishpapish mana rurasha nishpapish mana llullashpalla huillapaichij. Ñucapish imata rurana cashcata yuyaringapaj– nircami.

⁵⁰ Chaimi Labanpish, Betuelpish: –Tucui chaicunaca Mandaj Diospaj munaimi chashna cashca. Chaimanta ñucanchijca allimi, mana allichu mana ni tucunchijchu.

⁵¹ Riqui, cunanca Rebecallataj caipimi. Paitaca Mandaj Dios nishca shinallataj cambaj amo Abrahampaj churipaj huarmi cachun pushashpa ringuilla– nircacuna.

⁵² Chaita uyashpami Abrahampajta ruraj runaca, Mandaj Diospaj ñaupajpi pambaman tupajta cumurirca.

⁵³ Chai q'uipami Abrahampajta ruraj runaca cullquimanta, curimanta rurashca sumajcunatapish, churanacunatapish llujshichishpa Rebecaman curca. Paipaj turi Labanmanpish, paipaj mamamanpish tucui laya sumajcunatami curca.

⁵⁴ Abrahampajta ruraj runapish, paihuan cajcunapish micushpa, ubyashpaca chai tutaca chaipimi dormircacuna. Cayandij tutamantaca utcata jatarishpami Abrahampajta ruraj runaca: –Ñuca amopajman ña cachapaichij– nirca.

⁵⁵ Chaimi Rebecapaj turipish, mamapish: –Chunga punllacunallahuanpish huambra ñucanchijhuanraj cachun shuyapayari. Chai q'uipaca ringallami– nircacuna.

⁵⁶ Abrahampajta ruraj runaca: –Mandaj Diosca ñuca shamushcataca mana yangata rurashcachu. Chaimanta ñucataca ama jarcapaichijchu. Ñuca amo maipi canman tigrangapaj utca cachapaichijlla– nirca.

⁵⁷ Chaimi paicunaca: –Shinashpaca, huambrata cayashpa tapushunchij– nircacuna.

⁵⁸ Rebecata cayashpaca: –¿Canca cai runahuan risha ninguichu?– nijpi paica: –Ari, rishallami– nircami.

⁵⁹ Chaimi Rebecataca paita huiñachij huarmindij, Abrahampajta ruraj runahuan, paihuan shamujcunahuanpish richun saquircacuna.

⁶⁰ Paicunaca alli cashca cachun nishpami Rebecataca: “Ñucanchij paniculla, canca huaranga huarangacunapaj mama tucushpa alli canguiman. Cambaj huahua huahuacunaca paicunata p'iñajcunahuan macanacushpa pueblocunata quichushpa alli canman” nircacuna.

⁶¹ Rebecaca, paipajta ruraj solteracunandij camellocunapi tiyarishpaca, Abrahampajta ruraj runata catishpa rircallami. Chashnami Abrahampajta ruraj runaca, Rebecata pushashpa tigrarca.

⁶² Isaacca, Neguevpimi causarca. Paica: “Ñucata ricuj causacuj Diospaj pugyu” shuti c'uchumantami tigracurca.

⁶³ Isaacca ña chishiyacui shinatami, pueblomanta canllaman ashata puringapaj llujshishca carca. Chaipimi paica huichilla ricushpaca, camellocuna shamucujta ricurca.

⁶⁴ Rebecapish Isaacta ricushcahuan camellomanta uriyashpami,

⁶⁵ Abrahampajta ruraj runataca: –Chai pambata ñucanchijpajman shamucuj runaca ¿pitaj?– nijpi, Abrahampajta ruraj runaca: –Paimari ñuca amo– nijpimi, Rebecaca pai ch'ungullirina linsohuan ñahuindij ch'ungullirirca.

⁶⁶ Abrahampajta ruraj runaca tucui ima shinalla tucushcatami Isaacmanca parlarca.

⁶⁷ Isaacca, Rebecataca paipaj mama Sarapaj carpa huasimanmi pusharca. Isaacca, Rebecataca paipaj huarmi cachun japishpaca achcata c'uyashpami causarca. Paipaj mama huañujpi llaquilla cashcamantaca Rebecahuan cazarashpami cushicurca.