GÉNESIS 17 - Dios Rimashca Shimicunami

Circuncisionta rurachishcaca Dioshuan ari ninacushcata ricuchijmi

¹ Abram ña iscun chunga iscun huatayuj cajpimi, Mandaj Diosca paiman ricurishpaca: –Ñucaca tucuita rurai tucuj Diosmi cani. Ñuca ñaupajpi puri. Ima pandata ama rurai.

² Canhuanca shuj ruranatami rurasha. Canmantaca achcatami mirachisha. Yallitajmi mirachisha– nirca.

³ Chaimi Abramca cungurishpa pambaman tupajta cumurijpi, Taita Diosca cashnapish nircaraj:

⁴ –Ñuca canman imata ari nishcaca caimi: Canca achcacunapaj yayami tucungui.

⁵ Cunanca ña mana Abramchu cangui. Ashtahuanpish cantaca achcacunapaj yaya tucuchun churashcamanta Abrahammi cangui.

⁶ Canmantaca achcatami mirachisha. Yallitajmi mirachisha. Canmantami achca llajtacuna tucunga. Llajtacunata jatun mandajcunapish canmantami llujshinga.

⁷ Canhuanca shuj ruranatami rurasha. Cambaj huahua huahuacunahuanpish, paicunapaj huahua huahuacunahuanpish huiñaita ruracushallami. Cambajpish, cambaj huahua huahuacunapajpish, paicunapaj huahua huahuacunapajpish huiñaipaj Taita Dios cangapajmi chashna rurasha.

⁸ Canmanpish, cambaj huahua huahuacunamanpishmi cunan can maillata causashpa puricun tucui Canaan llajtataca huiñaipaj cusha. Ñucaca paicunapaj Taita Diosmi casha– nircami.

⁹ Abrahamtaca Taita Diosca cutinmi cashna nirca: –Ñuca canhuan ari ninacushcataca canpish, cambaj huahua huahuacunapish, paicunapaj huahua huahuacunapish pajtachicuchunlla.

¹⁰ Ñucahuan canhuan, cambaj huahua huahuacunahuan, paicunapaj huahua huahuacunahuan ari ninacushcata ruranaca caimi: Cancunapurapi caj c'aricunaca tucuicunami circuncisionta rurana canguichij.

¹¹ Tucuicunami cancuna charishca aicha carata p'itina canguichij. Ñucahuan cancunahuan ari ninacushcata pajtachina cashcata ricuchijca chaimi canga.

¹² Cancunapurapi huacharij c'ari huahuacunataca huacharishcamanta pusaj punllapimi tucuicunata chai circuncisionta rurana canguichij. Chaitaca huahua huahua ruracuchunlla. Shujtaj llajtamanta cajcunata cullquihuan cancuna randishcacunapurapi cancunapaj huasipi huacharijpipish tucuicunatami chashnallataj rurana canguichij.

¹³ Cancunapaj huasipi huacharishcacunaca, cancunapaj huahuacuna cashpapish, shujtaj llajtamanta cajcunata randishcacunapaj huahuacunata cashpapish circuncisionta rurachishcami cana can. Cancuna chashna cancunapaj aichapi rurachishcami ñucahuan cancunahuan huiñaipaj ruranata ari nishcata pajtachinataj cashcataca ricuchinga.

¹⁴ Maijan cashpapish pai charishca aicha mirga carata mana p'itichijca, ñucahuan ari ninacushcata p'aquishcamanta cancunapuramanta anchuchishca cachun– nircami.

¹⁵ Taita Diosca Abrahamtaca cashnapishmi nirca: –Cambaj huarmitaca ña ama Sarai ningui. Ashtahuanpish cunamanta paipaj shutica Sarami canga.

¹⁶ Paitaca ñucami ashtahuan alli cashca cachun nisha. Paimantami canmanpish shuj c'ari huahuata cusha. Paica achca llajtacunapaj mamami tucunga. Llajtacunata jatun mandajcunapish paimantami huacharinga– nircami.

¹⁷ Chaimi Abrahamca pambaman tupajta cumurishpa paipaj shungupi asishpa: “Ña patsaj huatayuj yuyaj runaca ¿maitataj huahuayuj tucungari? Sarapish iscun chunga huatayuj huarmica ¿chichungachari?” nirca.

¹⁸ Abrahamca Taita Diostaca: –Ñuca churi Ismael, quiquinpaj ñaupajpi causangapishchari– nircami.

¹⁹ Chaimi Taita Diosca: Cambaj huarmi Saramari shuj c'ari huahuata huachanga. Paitaca Isaacta shutichingui. Ñuca ari nishcataca paipi sinchita callarichishpami, paipaj huahua huahuacunahuanpish, paicunapaj huahua huahuacunahuanpish huiñaipaj pajtachicushalla.

²⁰ Ismaelmanta can mañashcatapish uyanimi. Paitapish alli cashca cachun nishami. Huahuacunayuj tucushpa, alli huiñachishpa yallitaj achcata mirarichunmi churasha. Paimantaca chunga ishqui mandajcunami llujshinga. Chashnami paimantaca jatun llajtata rurasha.

²¹ Ñuca ari nishpa pajtachisha nishcataca shamuj huata cai punllacuna shinallapitajmi, Sara huachashca Isaachuan callarichisha– nircami.

²² Taita Diosca Abrahamhuan ña tucui parlanacushpaca rircallami.

²³ Abrahamca chai punllallatajmi Taita Dios mandashca shinallataj paipaj churi Ismaeltapish, paipaj huasipi huacharishca paipajta rurajcunatapish, paipajta rurachun cullquihuan randishcacunatapish tucui c'aricunata paicuna charishca aicha mirga carata p'itirca.

²⁴ Abrahamca pai charishca aicha mirga carata p'itinapajca iscun chunga iscun huatayujmi carca.

²⁵ Paipaj churi Ismaelca, pai charishca aicha mirga carata p'itinapajca chunga quimsa huatayujmi carca.

²⁶ Abrahamtapish, paipaj churi Ismaeltapish chai punllallatajmi circuncisionta rurarca.

²⁷ Paipaj huasipi huacharishca paipajta rurajcunatapish, paipajta rurachun cullquihuan shujtaj llajtamanta randishcacunatapish, tucui c'aricunatami Abrahamhuan chai punllallataj circuncisionta rurarcacuna.