GÉNESIS 15 - Dios Rimashca Shimicunami

Taita Diosca Abramman shuj churita cunata ari nishcami

¹ Tucui chaicuna tucushca q'uipami Mandaj Diosca muscuipi shina ricurishpa Abramtaca: –Abram, ama manchaichu. Cambaj escudoca ñucami cani. Can japina cashcaca tucuita yalli jatunmari– nirca.

² Shina nijpi Abramca: –Mandaj Jatun Dioslla ñucaman huahuata mana cushca jahuaca ¿imapajtaj imata cugringui? Ñuca imalla charishcacunataca damasceno Eliezer ñuca huasita ricuj mayordomollami japinga– nirca.

³ Abramca cashnapishmi nirca: –Quiquin, ñucaman mana huahuata cushcamantaca ñuca imalla charishcacunataca, ñuca huasipi huacharishca ñucapajta rurajllamari japinga– nircami.

⁴ Chai q'uipaca Mandaj Diospaj rimashca paipajman shamushpami: –Can imalla charishcacunataca mana chai runachu japinga. Ashtahuanpish cambaj quiquin churimi japinga– nirca.

⁵ Mandaj Diosca, Abramtaca canllaman llujshichishpami: –Jahua pachata ricui. Yupai tucushpaca, chai luzerocunata yupai– nirca. Mandaj Diosca: –Cambaj huahua huahuacunaca chashnamari canga– nircami.

⁶ Abramca Mandaj Dios chashna nishcataca crircami. Chaimantami cashcata rurajta shina chasquirca.

⁷ Mandaj Diosca: –Ñucaca caldeocuna causacun Ur pueblomanta canta llujshichimuj Mandaj Diosmi cani. Cai llajtata canman cungapajmi llujshichimurcani– nircami.

⁸ Chaimi Abramca: –Mandaj Jatun Dioslla, cai llajtata ñuca japinataj cashcataca ¿ima shinataj yachashari?– nirca.

⁹ Shina nijpimi Mandaj Diosca: –Quimsa huatayuj huarmi bizita, quimsa huatayuj chivata, quimsa huatayuj carnerota, shuj urpita, shuj palomata apamui– nirca.

¹⁰ Abramca tucui chai animalcunata japishpa chaupishpaca, shuj chaupitaca shuj ladoman, caishuj chaupitaca caishuj ladomanmi ch'imbapura churarca. Ashtahuanpish urpita, palomataca mana chaupircachu.

¹¹ Chai siricuj aichacunaman ullahuangacuna uriyamujpimi, Abramca chaicunataca manchachishpa cachacurca.

¹² Ña inti huashicucuitami Abramtaca yallitaj dorminai japirca. Paipaj jahuamanca yallitaj amsa shamujpimi achcata mancharirca.

¹³ Chaipimi Mandaj Diosca Abramtaca: –Cambaj huahua huahuacunaca shujtaj llajtapimi causagringa. Chai llajtapi causajcunapajta rurajmi canga. Paicunaca 400 huatacunatami yallitaj llaquichishca causangacuna. Chaica chashnatajmi canga nirca.

¹⁴ Ashtahuanpish cambaj huahua huahuacunata paicunapajta rurachij llajtataca ñucami llaquichisha. Chai q'uipaca yallitaj achca charinacunayujmi llujshimungacuna.

¹⁵ Canca yuyajyangacama sumajta causashpa ima llaqui illajllami huañungui. Chashnami canca cambaj ñaupa yayacunahuan tandanacugringui.

¹⁶ Amorreocunaca manaraj yallitaj millaita rurancunachu. Chashna cashcamanta cambaj huahua huahuacunaca chuscu yayacunapaj q'uipami tigramungacuna– nircami.

¹⁷ Ña tutayashpa ashtahuan amsayajpica, Abramca shuj hornomanta cushni llujshicujta, aichacunata chaupishpa ishqui ladoman churashca chaupitaca, nina sindi pasarijtami ricurca.

¹⁸ Chai punllallatajmi Mandaj Diosca, Abramman cunata ari nishpa cashna nirca: –Cambaj huahua huahuacunamanca cai llajtatami cusha. Egipto jatun yacumanta callarishpaca, Éufrates jatun yacuta catishpa,

¹⁹ ceneocunapaj, cenezeocunapaj, cadmoneocunapaj,

²⁰ heteocunapaj, ferezeocunapaj, refaitacunapaj,

²¹ amorreocunapaj, cananeocunapaj, gergeseocunapaj, jebuseocunapaj llajtacunatami cusha– nircami.