GÉNESIS 10 - Dios Rimashca Shimicunami

Noepaj huahua huahuacunami

¹ Noepaj huahua huahua callari yayacunaca: Sem, Cam, Jafet shuticunami carca. Paicunami yacu juillu tiyashca q'uipaca huahuacunata charircacuna.

² Jafetpaj churicunaca: Gomer, Magog, Madai, Javán, Tubal, Mesec, Tiras shuticunami carca.

³ Gomerpaj churicunaca: Askenaz, Rifat, Togarma shuticunami carca.

⁴ Javanpaj churicunaca: Elisa, Tarsis, Quitim, Dodanim shuticunami carca.

⁵ Tucui paicunaca mama cucha uricunapimi causarcacuna. Paicunaca quiquin rimaita rimajcuna, paicunapaj familia ima shina cashca shina, ch'ican ch'ican llajtacuna tucushpami causarcacuna.

⁶ Campaj churicunaca: Cus, Mizraim, Fut, Canaán shuticunami carca.

⁷ Cuspaj churicunaca: Seba, Havila, Sabta, Raama, Sabteca shuticunami carca. Raamapaj churicunaca: Seba, Dedán shuticunami carca.

⁸ Cusca Nimrod churitami charirca. Paimi cai pachapica punta, tucuita yalli c'ari c'ari runa carca.

⁹ Nimrodca Mandaj Diospaj ñaupajpica, animalcunata japishpa huañuchij c'ari c'ari runami carca. Chaimantami: “Nimrod shina animalcunata japishpa huañuchij c'ari c'ari runa Mandaj Diospaj ñaupajpica caichigari” nincuna.

¹⁰ Nimrod mandacun llajtacunaca ashtahuan alli llajtacuna Sinarpi caj Babel, Erec, Acad, Calne shuti jatun pueblocunami carca.

¹¹ Chai llajtamantaca Asiria llajta ladoman rishpami, chaipica Nínive nishca, Rehobot nishca, Cala nishca pueblocunata shayachirca.

¹² Nínive pueblohuan Cala pueblohuan chaupipica, Resén shuti jatun pueblotami shayachirca.

¹³ Mizraimca: Ludim, Anamim, Lehabim, Naftuhim,

¹⁴ Patrusim, Casluhim, Caftorim churicunatami charirca. Caftorimmantami filisteocunaca mirarirca.

¹⁵ Canaanca Sidón, Het shuti churicunatami charirca. Canaanpaj punta churica Sidonmi carca.

¹⁶ Canaanpaj huahuacunamantami jebuseocunapish, amorreocunapish, gergeseocunapish,

¹⁷ heveocunapish, araceocunapish, sineocunapish,

¹⁸ arvadeocunapish, zemareocunapish, hamateocunapish mirarircacuna. Canaanpaj huahua huahuacunaca caita chaita rishpami causarcacuna.

¹⁹ Cananeocunapaj llajtaca Sidón pueblomanta callarishpaca Gerarman rina ladota catishpa Gaza pueblocama, shinallataj Sodomaman, Gomorraman, Admaman, Zeboimman rina ladota catishpaca Lasa pueblocamami carca.

²⁰ Campaj huahua huahuacunaca chai llajtacunapimi paicunapaj familiacunapuralla shujtaj shujtaj llajta tucushpa, quiquin rimaita rimashpa causarcacuna.

²¹ Jafetpaj punta huauqui Sempish churicunata charircami. Semca, Heberpaj huahua huahuacunapaj ñaupa yayami.

²² Sempaj churicunaca: Elam, Asur, Arfaxad, Lud, Aram shuticunami carca.

²³ Arampaj churicunaca: Uz, Hul, Geter, Mas shuticunami carca.

²⁴ Arfaxadpaj churica Sala shutimi carca. Salapaj churica Heber shutimi carca.

²⁵ Heberca ishqui churicunatami charirca: Punta churica Pelegmi carca, paipaj huauquica Joctanmi carca. Peleg causai punllacunapimi allpata chaupishpa ch'ican causanata callarircacuna. Chaimantami paitaca Pelegta shutichirca.

²⁶ Joctanpaj churicunaca: Almodad, Selef, Hazar-mavet, Jera,

²⁷ Adoram, Uzal, Dicla,

²⁸ Obal, Abimael, Seba,

²⁹ Ofir, Havila, Jobab shuticunami carca. Joctanpaj churicunaca tucui chaicunami carca.

³⁰ Paicunaca Mesa llajtamanta callarishpaca, Sefarman rina ñanta catishpa inti llujshin ladoman caj urcucunacamami causarcacuna.

³¹ Sempaj huahua huahuacunaca chai llajtapimi quiquin familia ima shina cashca shina, quiquin rimaita rimashpa, shujtaj shujtaj llajtacuna tucushpa causarcacuna.

³² Noepaj churicunapaj huahua huahua mirarishpa shujtaj shujtaj llajta tucushpa causaj huahua huahuacunaca chaicunami. Yacu juillu tiyashca q'uipaca tucui paicunami caita chaita rishpa tucui cai pachapi shujtaj shujtaj llajta tucushpa causarcacuna.