Gálatas 6 - Dios Rimashca Shimicunami

¹ Huauquicuna, ima juchapi maijan urmashca cajpica, Diospajlla cajcuna manso shunguhuan ayudaichij. Can chashna tucushcata shina yuyashpa ayudangui. Ñataj canpish chashnallataj tucunguiman.

² Caishujpaj chaishujpaj llaquicunata, apajcuna caichij. Cristopaj mandashcataca, chashna rurashpa pajtachichij.

³ Maijanca manapish ima cashpa, yachajmi cani nijca, paillatajmi umarin.

⁴ Chaimanta ima shina ruracushcataca, cada quiquin alli ricurichun. Chashna cashpami imamanta jatunyarina cajpica, mana shujtajpaj rurashcapi jatunyarishpa, quiquin rurashcapi jatunyaringa.

⁵ Paicuna imata rurashcamantaca, cada quiquinmi chasquingacuna.

⁶ Diospaj Shimita maijanpish yachacujca, paita yachachijman tucui imalla charishcamanta cuchun.

⁷ Ama umarichijchu. Diostaca pi mana chanzata rurai tucunchu. Maijan imata tarpujca, chaillatatajmi tandanga.

⁸ Maijanpish quiquin aichapaj tarpujca, aichamantaca ismujllatami tandanga. Ashtahuanpish Espiritupaj tarpujca, Espiritumantaca huiñai causaitami tandanga.

⁹ Allita ruranataca ama shaicushunchij. Mana shaicushpa allita rurashpaca, tandana pajtajpica tandashunmi.

¹⁰ Chashna cajpica, ima ruranata charishpaca tucuicunapaj allita rurashunchij. Ashtahuantajca crijcunapaj allita rurashunchij.

Cristopaj cruzpi Pablo jatunyarishcami

¹¹ Riquichij, ñuca quiquin maquihuanmi jatun letracunahuan quillcani.

¹² Maijanpish aichapi alli ricurishun nijcunami, cancunataca circuncisionta rurachichuntaj munancuna. Cristopaj cruzmanta catirashpa llaquichijpi, ama llaquita apangaraicullami chashna rurancuna.

¹³ Circuncisionta rurachijcunallatajpish, Mandashcataca mana huaquichincunachu. Ashtahuanpish cancuna circuncisionta rurachijpi, cancunapaj circuncisionmanta jatunyangapajllami chashna nincuna.

¹⁴ Chaipica ñucaca mana jatunyarinichu. Ashtahuanpish ñucanchijta Mandaj Jesucristopaj cruzpimi jatunyarini. Ñucapajca paimantaca cai pachaca, cruzpimi huañurca. Ñucapish cai pachapajca, huañushcami cani.

¹⁵ Cristo Jesushuan shujlla cajpica, circuncisionta rurachishca cashpa, mana rurachishca cashpapish ima mana canchu. Ashtahuanpish tucuimanta yallica mushujyachishca canami alli.

¹⁶ Maijanpish cai mandashcapi nishca shina purijcunahuan, Diospaj israelcunahuanca sumaj causaipish, llaquij canapish cashca cachun.

¹⁷ Cunanmanta pacha ñucataca, pi ama p'iñachichun. Ñuca aichapica, Mandaj Jesusmanta chugrichishcacuna alliyashcatami charini.

Allicunata cushca cachun nishpa tucuchishcami

¹⁸ Huauquicuna, ñucanchijta Mandaj Jesucristopaj mana c'uyaipajta c'uyaj canaca, cancunapaj espirituhuan cashca cachun. Chashna cachun.