Gálatas 4 - Dios Rimashca Shimicunami

¹ Caitapishmi nisha nini: Herenciata japij huahuaraj cashpaca, tucui charishcacunapaj dueño cashpapish, amopajta ruraj shinallatajmi.

² Chashna cashpami, yaya ricuchina punlla pajtangacama ricujcunapaj, cuidajcunapaj ucupiraj.

³ Ñucanchijpish huahuaraj cashpaca, cai pachapaj yanga yachachishcacunallapimi esclavocuna carcanchij.

⁴ Ashtahuanpish cachana punlla pajtajpica, Diosca paipaj churitami cacharca. Paica Mandashca ucupimi, shuj huarmimanta huacharirca.

⁵ Mandashca ucupi ñucanchij cajpimi, paipaj huahuacuna tucuchun randishpa cacharichingapaj cacharca.

⁶ Chaimantami paipaj huahuacuna canguichij. Diosca cancunapaj shungucunamanca paipaj Churipaj Espiritutami cacharca. Paimi: “¡Ñuca Yayitu!” nishpa caparicun.

⁷ Chaimanta ña mana esclavochu cangui. Ashtahuanpish Diospaj huahuami cangui. Paipaj huahua cashpaca, Cristomanta Diospaj herenciatapish japijmi cangui.

Esclavo canaman ama tigrachun yuyachishpa rimashcami

⁸ Ñaupaca, Diosta manaraj rijsishpaca, manapish dioscunapajtami rurajcuna carcanguichij.

⁹ Ashtahuanpish cunanca ña Diosta rijsijcuna, Dios rijsishcacuna cashca jahuaca ¿ima shinataj irquicunapaj, imatapish mana rurai tucuj huajchacunapaj esclavo tucungapaj cutin tigrashun ninguichij?

¹⁰ Punllacunata, quillacunata, fiestacunata, huatacunatapish yuyaricunguichijrajmi.

¹¹ Chaimantami cancunapurapi, ñuca trabajashca yanga tucunata manchani.

¹² Huauquicuna, cancunapish ñuca shina tucuchunmi rogani. Ñucapish cancuna shinami tucurcani. Ñucataca imata mana llaquichircanguichijchu.

¹³ Alli huillaita cancunaman callaripi huillashpaca, aichapi ungushca cashpapishmi huillarcani. Chaitaca cancunallataj yachanguichijmi.

¹⁴ Ñuca cuerpopi ungushca pruebahuan cajpipish mana yanganchircanguichijchu, mana p'iñarcanguichijchu. Chaipaj randica, Diospaj angelta shina, Cristo Jesusta shinami chasquircanguichij.

¹⁵ ¿Maipitaj chashna cushicuita charishcaca? Caitami cancunamanta huillani. Ima shina llujshichishpa cunalla cajpica, cancunapaj ñahuitapish llujshichishpa cuna shinami carcanguichij.

¹⁶ ¿Mana llullashpa nishcamantachu, cancunata p'iñaj tucushcani?

¹⁷ Mana cancunapaj allipajchu cancunataca munancuna. Ashtahuanpish cancunataca ñucanchijmanta ch'icanyashpa paicunata catijcuna cachunllami munancuna.

¹⁸ Alli caimanta c'uyaita ricuchishpa catinaca allimi. Mana ñuca cancunahuan cajllapi c'uyaitaca ricuchinachu canguichij.

¹⁹ Ñuca huahuacunalla, cancuna Cristo shina tucungacamami, cancunamantaca huachana nanaicunahuan shina cutin llaquita apacuni.

²⁰ Cancunamanta imata mana ruraipaj cashpami, shujtaj shina yuyachingapaj cunanllataj cancunahuan canata munani.

Saramanta Agarmanta ch'imbapurashpa parlashcami

²¹ Mandashca ucupi casha nijcuna, ñucaman huillaichij: ¿Mandashcataca manachu uyashcanguichij?

²² Abraham ishqui huahuacunata charishcamantaca, cashnami quillcashca tiyacun: Shujtaca, esclava huarmipi caishujtaca quiquin huarmipimi charirca.

²³ Esclavamantaca aicha munaimantami huacharirca. Ashtahuanpish quiquin huarmimantaca, Dios cusha nishca pajtajpimi huacharirca.

²⁴ Chaicunaca, ch'imbapurashpa parlashcami. Chai huarmicunaca ishqui cutin ari ninacushcatami ricuchin. Shujca Sinaí urcupi cushca, nisha ninmi. Chaica Agarmi. Paimi esclavocuna cachun huahuacunata cun.

²⁵ Agar huarmica, Arabiapi tiyaj Sinaí urcu shinami. Sinaí urcu shinaca, cunan Jerusalenmi. Jerusalenmi cunanca, paipaj huahuacunandij tandalla esclavocuna.

²⁶ Ashtahuanpish jahua pachapi caj Jerusalenca, tucui ñucanchijpaj mamami. Paica mana esclavachu.

²⁷ Cashnami quillcashca tiyacun: “¡Cushicui, mana chichuj, mana huachaj. Canca huachana nanaita mana charishcamanta jatunta cushicushpa capari! Shitashca huarmipajca, cusayuj huarmipajta yalli achca huahuacunami” ninmi.

²⁸ Chaimanta huauquicuna, ñucanchijca Isaac shinamari, Dios cusha nishcamanta huahuacuna canchij.

²⁹ Ashtahuanpish aicha munaimanta huacharishcaca, Espiritumanta huacharishcatami catirashpa llaquichirca. Cunan punllacunapish chai shinallatajmi.

³⁰ Ashtahuanpish ¿Quillcachishcaca ima nintaj?: “Esclavataca, paipaj churindij llujshichishpa cachai. Esclavapaj churica, quiquin huarmipaj churihuanca, herenciata mana japingachu” ninmi.

³¹ Chaimanta huauquicuna, mana esclavapaj huahuacunachu canchij. Ashtahuanpish quiquin huarmipaj huahuacunami canchij.