Filipenses 3 - Dios Rimashca Shimicunami

Chayana cashcamanmi caticuni nishcami

¹ Chaimanta huauquicuna, Mandaj Jesuspi cushicuichij. Chaillatataj cutin quillcanapish ñucataca mana p'iñachinchu. Cancunapaj alli cana cajpimi quillcani.

² Allcu shinacunamanta huaquichirichij. Pandata yachachij millaicunamanta huaquichirichij. Cuerpota p'itirijcunamanta huaquichirichij.

³ Ñucanchijmi circuncisionta rurashcacuna, Espiritupi Diospajta rurajcuna canchij. Aichata p'itichishcapica mana shunguta churashpami, Cristo Jesuspi jatunyarinchij.

⁴ Maijanpish aichapi ima shina cashcallahuan alli ricurisha nijpica, ñucacarin aichapi ima shina cashcahuan alli ricurinataca ashtahuanmi charini.

⁵ Ñucaca huacharishcamanta pusaj punllapi circuncisionta rurachishcami cani. Israelpuramanta Benjaminpaj aillupurami cani. Hebreo yaya mamapaj huahua cashcamanta hebreotajmi cani. Mandashcata pajtachij fariseotajmi carcani.

⁶ Chaita pajtachichuntaj nishpami tandanacushca crijcunata catirashpa llaquichij carcani. Mandashcapi nishca shinataj cashcata ruraj, pi mana juchachipajmi carcani.

⁷ Ashtahuanpish ñaupaca, tucui chaicunami ñucapajca achca valij carca. Cunanca Cristopaj c'uyaimantami tucui chaicunataca chingachircani.

⁸ Cristo Jesús ñucata Mandajta rijsishcamantami, tucui chaicunataca yangataj cashcata yachani. Paita c'uyashcamantami tucuita chingachircani. Cristo ñucapi cachunmi, tucui chaicunataca ñucu shinata rurarcani.

⁹ Paihuanmi shujlla casha nini. Mandashcapi nishca shinata rurashpa ñuca quiquin justificarinataca mana yuyanichu. Ashtahuanpish justificashca canataca, Cristopi crishpami japircani. Chaica Diosmantami shamun, crishpallami japina.

¹⁰ Cristota, paita causachij podertapishmi ashtahuan rijsisha nini. Pai shinallataj tucungacamami llaquicunata apashpa, pai shinallataj huañusha nini.

¹¹ Huañushcacunapaj chaupimanta causarinacama ima shinapish chayana yuyaillami cani.

¹² Mana ña tucuita pajtachishcamanta, cashcata ruraj cashcamantachu chashnaca nini. Ashtahuanpish chayana cashcaman chayachun, Cristo Jesús paipajta rurashcamantaca, chayangacama caticunillami.

¹³ Huauquicuna, ñucaca ñami chayarcani mana ni tucunichu. Ashtahuanpish caitami ruracuni: Huashaman saquirijtaca cungarishpami, ñaupajman cajta japingapajtaj chutaricuni.

¹⁴ Cristo Jesusta crishpa, jahua pachapi caj japina cashcata japichunmi, ñucataca Diosca cayarca. Chaimantami chayana cashcaman caticuni.

¹⁵ Ñaqui cashcata rurajcunami canchij ninchij, shinashpaca chai shinallataj yuyashunchij. Cancuna shujtaj shina yuyajpipish, chaitaca Diosmi ricuchinga.

¹⁶ Caicama yachashcataca chai shinallataj shuj yuyailla catishunchij. Shuj shinalla yuyashunchij.

¹⁷ Huauquicuna, ñucata ricushpa catijcuna caichij. Ñucanchij ima shina cajta ricushpa purijcunatapish ricushpa catichij.

¹⁸ Shina cajpipish tauca huillajcunami puricuncuna. Paicunamantami tauca cutin huillarcani. Cunanpish huacashpami nini. Paicunaca Cristopaj cruzta p'iñajcunami.

¹⁹ Paicunaca causai tucuripica, chingaringacunami. Paicunapaj diosca huijsami. Paicunaca pingarinapaj randica jatun tucuncunami. Paicunaca cai allpapaj cajllatami yuyancuna.

²⁰ Ashtahuanpish ñucanchij causanaca, jahua pachapimi. Quishpichij, Mandaj Jesucristotaca chaimanta shamujtami shuyacunchij.

²¹ Ñucanchij huañujlla cuerpotaca, shujtajyachishpami paipaj cuerpoman rijchaj, sumaj cuerpota ruranga. Tucui imatapish cazuchij poderhuanmi, paillataj chashna ruranga.