Filipenses 2 - Dios Rimashca Shimicunami

Runa shinalla tucujpimi Cristotaca jatunyachishca

¹ Chaimanta, Cristomanta cushicuna, c'uyaihuan animachina, Espiritumanta shuj yuyailla cana, ucu shungumanta c'uyanacuna, llaquij canapish tiyajpica,

² chai shinallataj cashcata yuyashpa, chai c'uyaillahuantaj c'uyanacushpa, shuj munailla, shuj shinalla yuyashpa ñucata ashtahuan cushichipaichij.

³ Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj c'uyanacuichij.

⁴ Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij.

⁵ Cristo Jesuspi tiyashca shinallataj cancunapipish cai yuyai tiyachun:

⁶ Paica, Dios shinallataj cashpapish, imata chariraj shina, Dios shina canataca mana munaj shinami carca.

⁷ Chaipaj randica, paillatajmi tucuita saquishpa servij shina tucurca. Runacuna shinallatajmi tucurca.

⁸ Runa caj shinallataj tucushpami, paillataj mana jatun tucurca. Huañungacama Diosta cazushpami, cruzpi huañurca.

⁹ Chaimantami Diospish, tucui ima tiyajcunapaj jahuapi jatunyachirca. Tucui shuticunapaj jahuapi shuj jatun shutitapishmi curca.

¹⁰ Jahua pachapi cajcuna, cai pachapi cajcuna, allpa ucupi cajcunapish tucuicuna Jesuspaj shutipi cungurichunmi chai shutitaca curca.

¹¹ Dios Yaya sumajyarichunca tucui c'allucunami Jesucristotaca Mandajmi nishpa huillangacuna.

Cai pachapi achijyachijcunami canguichij nishcami

¹² Chaimanta ñuca c'uyashcacunalla, cazucujlla cashca shinallataj cazucuichijlla. Ama ñuca chaipi cajllapi cazujcuna caichijchu. Ashtahuanpish cunancarin ñuca mana chaipi cajpica, ashtahuan alli cazujcuna caichij. Cancunaca quishpichishca cashcamanta manchaihuan, chujchuihuan causaichij.

¹³ Allita ruranatapish, allita munanatapish Diosmi pai munashcamanta cancunapica rurachicun.

¹⁴ Ama huashalla parlanacushpa, ama rimanacushpa tucui imatapish alli ruraichij.

¹⁵ Mana alli shungu, millai runacunapaj chaupipica, Diospaj huahuacuna mapa illaj, pi mana juchachipaj alli shungu caichij. Paicunapaj chaupipica cai pachapi achijyachijcuna shina achijyachichij.

¹⁶ Ñuca purishca, ñuca trabajashca ama yanga cachun. Cristo shamui punllapi ñuca cushicungapaj, causaipaj shimita chariraichij.

¹⁷ Cancuna crishcamantaca, ñuca sacrificacushca jahuapi, ñucata huañuchina cajpipish, tucui cancunahuanmi cushicuna shinataj cushicuni.

¹⁸ Chai shinallataj cancunapish, ñucahuan cushicuna shinataj cushicuichij.

Timoteopish Epafroditopish

¹⁹ Ñucapish cancuna ima shina cajta yachashpa, ashtahuan animaringapajmi, Mandaj Jesús munajpica, Timoteota cancunapajman utca cachasha nicuni.

²⁰ Ñuca yuyashca shina yuyajtaca, pi shujtajta mana charinichu. Pai shina cancunamanta sustarijtajca mana tiyanchu.

²¹ Tucuicunami paicunapaj allipajlla mashcancuna, Cristo Jesuspajca mana yuyancunachu.

²² Ashtahuanpish pai alli cashcataca ñami yachanguichij. Yayandij churindij shinami, alli huillaipica servircanchij.

²³ Chaimantami paita cachanata yuyacuni. Ñuca ima tucuna cashcata yachanga camallami shuyacuni.

²⁴ Ñucapish cancunapajman utca rinatami Mandaj Jesuspi shunguta churashpa shuyacuni.

²⁵ Chashna yuyacushpapish Epafroditota cancunapajman ña cachanami, ñucapajca allitaj yuyachirca. Paica ñucata ayudaj, alli huillanapi tandalla macanacuj ñuca huauquimi. Paitami cancunaca ñucapaj ima illashcacunata ayudachun cachashca carcanguichij.

²⁶ Paica tucui cancunata ricuna munaitami achcata charirca. Pai ungushcata cancuna yachaj chayashca cajpimi, achcata llaquirirca.

²⁷ Paica ungushcataj huañunallami carca. Chashna cajpipish, Diosmi paitaca llaquirca. Mana paillatachu llaquirca, ashtahuanpish llaquicunata ama jahuanpi jahuanpi charichunmi, ñucatapish llaquirca.

²⁸ Ñucapish ama ashtahuan llaquilla cangapajmi, cancuna cutin ricushpa cushicuchun, utcashpa cachasha nini.

²⁹ Paitaca tucui cushicuihuan Mandaj Jesuspi chasquichij. Pai shinacunahuapish c'uyaita charichij.

³⁰ Paica Cristopajta ruracushcamantaca huañunallami carca. Cancuna ñucaman mana servi tucujpimi, paipaj aicha ungüi tucushpapish cancunapaj randi servirca.