Filemón 1 - Dios Rimashca Shimicunami

Allillachu canguichij nishcami

¹ Jesucristomanta prezu caj Pablo, huauqui Timoteondijmi, ñucanchijta ayudaj c'uyashca Filemonman quillcanchij.

² Cambaj huasipi tandanacushca crijcunaman, c'uyashca pani Apiaman, alli huillaita huillashpa ñucanchij shinallataj macanacuj Arquipomanpishmi quillcanchij:

³ Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cachun ninchijmi.

Filemón ima shina c'uyaj cashcapish crij cashcapish

⁴ Diosta mañacushpa canta yuyarishpaca ñuca Diostaca pagui nicunillami.

⁵ Cantaca Mandaj Jesusta alli crij cashcata, jucha illaj tucuicunatapish alli c'uyaj cashcatami uyani.

⁶ Chaita uyashpaca can alli crij cashcata ricushpa, crijcunaca Cristo Jesusmantaca Dios cushca allicunata charishcata alli yachachun nishpami Diosta mañacuni.

⁷ Huauqui, canca c'uyaj cashcamantami jucha illajcunapaj shungutaca achcata cushichishcangui. Chaita yachashpami ñucanchijpish achcata cushicushpa imatapish ashtahuan rurashun ninchij.

Pabloca Onesimota chasquichun mingashcami

⁸ Can chashna alli cajpimi ñucaca Cristohuan cashcamantaca, can imata rurana cashcata mandai tucushpapish,

⁹ mana mandashpa c'uyaimanta roganilla. Ñucaca, ña yuyaj Pablomi cani. Cunancarin Jesucristomanta prezupishmi cani.

¹⁰ Ñuca huahua Onesimomantami rogani. Paica prezupi ñuca cajpimi, Jesucristota crishpa ñuca huahua tucurca.

¹¹ Paica ñaupa punllacunaca cambajca ima allita mana rurajmi carca. Ashtahuanpish cunanca cambajpish, ñucapajpish allita rurajmari tucushca.

¹² Cambajmanmi cutin tigrachishpa cachani. Canca ñucata chasquij shinallataj chasquipai.

¹³ Alli huillaimanta prezu cajpi, cambaj randi ñucapajta rurachun, ñucahuan saquirinman yuyanimi.

¹⁴ Ashtahuanpish can manaraj imata nijpica, imata mana rurasha ninichu. Can allita rurasha nishpaca, ama ñuca nishcallamanta, ashtahuanpish cambaj quiquin munaimanta rurangui.

¹⁵ Onesimoca huañungacama can chasquichunchari, canmantaca ashacama ch'icanyarca.

¹⁶ Cunanca ña mana cambajta ruraj shinallachu. Ashtahuanpish cambajta rurajtapish yalli c'uyashca huauquimari. Ashtahuantajca ñucapajmi chashna cambajcarin cambajta ruraj cashcamantapish, Mandaj Jesusta crij cashcamantapish ashtahuan allimari.

¹⁷ Chaimanta can shinallataj ñucapish cashcata yuyashpaca, ñucata chasquij shinallataj paitaca chasquipai.

¹⁸ Pai ima mana allita rurashca cajpi, mana cashpaca debeshca cajpica, ñucami pagasha.

¹⁹ Pablomi, ñuca quiquin maquihuan quillcani: Ñucami pagasha canpish ñucamanca debenguimi. Shina cajpipish chaitaca mana yuyachisha nircanichu.

²⁰ Ari huauquicu, Mandaj Jesusta crij cashcamanta ñuca nishca allita rurapai. Chashna rurashpaca Mandaj Jesuspaj cashcamanta ñuca shunguta cushichipai.

²¹ Canca cazunataj cajpimi quillcani. Ñuca nishcataca, ashtahuan yallita rurana cashcatapish yachanimi.

²² Ñuca samarinatapish allichipai. Cancuna Diosta mañacushcamantaca, cancunapajman cachana cashcatami shuyacuni.

Tucuchingapaj allilla canguichij nishpa Dios allicunata cuchun nishcami

²³ Cristo Jesusmanta, ñucahuan prezu caj Epafras,

²⁴ ñucata ayudajcuna Marcos, Aristarco, Demas, Lucaspishmi alli cashca cachun nincuna.

²⁵ Ñucanchijta Mandaj Jesucristopaj, mana c'uyaipajta c'uyaj canaca, cancunapaj espirituhuan cashca cachun. Chashna cachun.