EZEQUIEL 47 - Dios Rimashca Shimicunami

Diospaj huasimanta llujshicuj yacucunamanta

¹ Chai q'uipaca ñucataca, Diospaj huasi pungumanmi tigrachishpa pusharca. Chaimantaca chai pungu umbral ucumanta yacu llujshicujtami ricurcani. Chai yacuca inti llujshin ladomanmi callpacurca. Diospaj huasipish inti llujshin ladollamantajmi shayacurca. Chai yacuca, Diospaj huasi alli lado altar uranijtami callpacurca.

² Chai q'uipaca Diospaj huasimantaca, janaj ladoman caj zaguantami llujshichishpa pusharca. Chaimanta inti llujshin ladoman caj zaguancamami tigrachishpa pusharca. Chaipipish alli ladomanta yacu llujshicujtami ricurcani.

³ Shinallataj inti llujshin ladoman shuj runa cordelta maquipi aisashca rijtami ricurcani. Chai runaca, 525 metro yacutami medirca. Chai yacuta pasachicujpica, sanpicamami pambarircani.

⁴ Cutinllatajmi, 525 metro yacuta medirca. Chai yacuta pasachicujpica, cunguricamami pambarircani. Cutinllatajmi, 525 metro yacuta medirca. Chaipica cinturacama pambarishpami, chai yacutaca pasarcani.

⁵ Cutinllatajmi, 525 metro yacuta medirca. Jatun yacu cashcamantami, chai yacutaca ña mana pasai tucurcani. Yallitaj achca yacu cashcamantami, chaitaca ña mana chaquillahuan pasai tucurcani. Chaitaca huambushpallami, pasai tucuipaj carca.

⁶ Chaimanta ñucataca cashnami nirca: “Huañujlla aichayuj runalla, ¿caicunataca allichu ricushcangui?” nircami. Chai q'uipaca, chai jatun yacu uritami pushashpa rirca.

⁷ Chai jatun yacu uripica, achca yuracunami tiyarca. Chai yuracunaca, yacu ishqui lado uripimi tiyarca.

⁸ Chaimantaca ñucataca cashnami nirca: Cai jatun yacucunaca, inti llujshin llajtamantami callpacun. Arabá pambaman uriyashpaca, jatun cuchamanmi yaicunga, mama cucha yacuca mishqui yacumi tucunga.

⁹ Cai ishqui yacucuna yaicucunpi tucui causaita charijcuna huambushpaca, causangatajmi. Cai yacucuna jatun cuchaman yaicushcamantami, chalhuacunapish yallitaj miraringa. Chai mishqui yacutami ubyangacuna. Cai jatun yacucunaman yaicujcunaca tucuicunami causanga.

¹⁰ Shinallataj chalhuata japijcunapish, chai yacu c'uchupimi canga. En-gadi pueblomantaca, En-eglaim pueblocamami linchicunatapish churangacuna. Jatun Cuchapi tiyaj chalhuacuna shinallataj cai yacupipish, tucui laya chalhuacunaca achcami tiyanga.

¹¹ Guzu yacucunapish, uchilla cucha yacucunapish mana mishqui yacucunachu canga. Ashtahuanpish cachi yacucunallami canga.

¹² Cai yacu ishqui lado uripipish, tucui laya frutacunata p'ucuj yuracunami huiñanga. Chai yura p'angacunaca manataj urmangachu, micunapish manataj illangachu. Diospaj huasimanta yacu llujshicushcamantami, chai yuracunaca p'ucuna punllacunami micuna frutacunata p'ucungalla, p'angacunapish jambimi canga.

Israelcunapaj llajta maillata canamanta

¹³ Mandaj Jatun Dios ñucatajmi cashna nini: Chunga ishqui Israel aillucunaca, paicuna charishca allpacunataca cashnami chaupingacuna: Joseca ishqui mirga allpatami japinga.

¹⁴ Cai allpami cancunapaj llajta tucunga. Ñuca maquita alzashpa, manataj llullashpami cancunapaj ñaupa yayacunamanca curcani. Caishuj chaishuj chai shinallataj chaupinacunguichijlla.

¹⁵ Janaj ladomanca cashnami lindeca canga: Jatun Cuchamantaca, Hetlón puebloman rina ñanta catishpaca, Zedad shuti,

¹⁶ Hamat shuti, Berota shuti, Sibraim shuti pueblocunacamami canga. Chai Sibraim puebloca Damasco pueblohuan, Hamat pueblohuan lindepimi. Shinallataj Hazar-haticón pueblocamami canga. Chai puebloca, Haurán llajta lindepimi.

¹⁷ Shinallataj mama cuchamantaca, Hazar-enán pueblocamami lindeca canga. Damasco pueblopish, Hamat pueblopish janaj ladomanmi saquiringa.

¹⁸ Inti llujshin ladomanca, cashnami lindeca canga: Haurán llajta chaupita rishpaca, Damasco pueblo chaupitapish, Galaad llajtatapish, Israel llajta chaupita rishpaca Jordán jatun yacucamami canga. Chaitaca inti llujshin mama cuchamanta medinguichijlla.

¹⁹ Ura ladomanca cashnami lindeca canga: Tamar pueblomantaca p'iñanacuna yacucama, Cades pueblomantaca, Egipto llajtahuan tupanacunpi tiyaj yacu huaicuta catishpa Jatun Cuchacamami canga. Chashnami ura ladomanca lindeca canga.

²⁰ Inti huashicun ladomanca, cashnami lindeca canga: Jatun Cucha huichitaca, Hamat puebloman yaicuna ch'imbapuracamami canga. Chashnami inti huashicun ladomanca lindeca canga.

²¹ Cai allpataca, cancuna Israel aillupura chaupinacunguichijlla.

²² Shinallataj cancunapajpish, cancunapaj llajtapi causacuj caru llajta runacunapajpish, cai llajtapi huacharishca cancunapaj huahuacunapajpish suerteta rurashpa cai allpataca chaupinguichijlla. Chai huahuacunataca, Israel llajtapi huacharishcamantaca cancunapura cashcallatataj yuyanguichij. Israel aillucuna shinallataj allpata charichun, suerteta rurashpa paicunamanpish chaupishpa cunguichij.

²³ Caru llajtamanta cajpipish, Israel aillucunapura tucushpa causajcunamanca, allpata chaupishpa cunguichijlla. Mandaj Jatun Dios ñucatajmi chashna nini.