EZEQUIEL 34 - Dios Rimashca Shimicunami

Israelcunata michijcunata llaquichinamanta

¹ Mandaj Diosca ñucataca cashnami nirca:

² “Huañujlla aichayuj runalla, israelcunata michijcunata llaquichina cashcata huillai. Paicunataca cashna ningui: Mandaj Jatun Diosca cashnami nin: Israelcunata michijcunalla, cancunaca quiquinllatamari michiringuichij ¡aij imachari tucunguichij! Michijcunaca ovejacunataca cuidancunami.

³ Ashtahuanpish cancunaca huirataca micunguichijmi, millmataca churanatami ruranguichij. Huirajlla ovejata huañuchishpapish, caishuj ovejacunata michinataca manamari yuyanguichijchu.

⁴ Irquicunatapish manamari ayudanguichijchu, ungushcatapish manamari jambinguichijchu, chaqui p'aquitapish manamari huatachinguichijchu, caita chaita puricujcunatapish manamari corralpi tandachinguichijchu, chingarishcatapish manamari mashcanguichijchu. Ashtahuanpish sinchita llaquichishpami mandanguichij.

⁵ Paicunaca michij illashcamantami, musparishpa caita chaita purincuna. Sachapi causaj p'iña animalcuna japishpa micunallami puricuncuna, caita chaitami rishcacuna.

⁶ Ñuca ovejacunaca chingarishpami, tucui urcucunata, tucui lomacunata purircacuna. Ñuca ovejacunaca cai pachapica, caita chaitami rircacuna. Paicunataca pipish mana mashcarcacunachu, paicunamantaca pipish mana tapurcacunachu ninmi ningui.

⁷ Chaimanta michijcunalla, Mandaj Dios imalla nishcata uyaichij:

⁸ Mandaj Jatun Diosca cashnami nin: Ñucaca causacunimi, ñuca canlla ovejacunataca michij illashcamantami shuhuarcacuna, p'iña animalcunami mirga mirgata rurashpa micurcacuna. Chashna cajpipish ñuca ovejacunataca, michijcunapish mana mashcagrircacunachu, ashtahuanpish chai michijcunaca quiquinllatatajmi michirircacuna. Ñuca ovejacunataca, manamari michircacunachu ninmi.

⁹ Chaimanta michijcunalla, Mandaj Dios imallata nishcata uyahuaichij.

¹⁰ Mandaj Jatun Diosca cashnami nin: Michijcunalla, cancunahuanca p'iñarishcami cani. Ñuca ovejacuna imalla tucushcataca ñucami tapusha. Cancunataca ovejacuna illajllatami saquisha. Chai michijcunaca, ña mana quiquinllatatajpish ashtahuan michiringacunachu. Ashtahuanpish ñuca ovejacunataca, paicunapaj shimimanta quishpichishami. Paicuna micushpa catichunca, ña mana ashtahuan saquishachu ninmi.

¹¹ Mandaj Jatun Diosca cashnapishmi nin: Ñucallatajmi ñuca ovejacunataca mashcashpa rijsigrisha.

¹² Ima shinami michijca chingarishca ovejacunapurapi caj paipaj ovejata rijsin, chashnallatajmi ñucapish ñuca ovejacunataca rijsisha. Shinallataj p'uyulla amsa punllapi caita chaita cachashca llajtacunamantaca llujshichishpa tandachishami.

¹³ Paicunataca shujtaj llajtacunamanta, shujtaj pueblocunamanta llujshichishpami tandachisha. Paicunataca quiquin Israel llajtaman pushamushpami, urcucunapipish, jatun yacu uricunapipish, causanalla pueblocunapipish michisha.

¹⁴ Alli q'uihuapimi michisha, paicunapajca corraltapish Israel llajta jatun urcucunapimi rurasha. Chai alli corralpimi dormingacuna, israelcunapaj urcucunapi tiyaj verdijlla alli q'uihuacunapimi micushpa puringacuna.

¹⁵ Ñuca ovejacunataca ñucami michisha, paicunamanca ñucami corraltapish rurashpa cusha. Mandaj Jatun Diostajmi chashna nini.

¹⁶ Chingarishpa caita chaita puricujtapish mashcashpa japishpaca, corralmanmi tigrachimusha, chaqui p'aquitapish c'acushpa huatashami, irquitapish ayudashami. Ashtahuanpish huirayashca ovejacunatapish, c'ari c'ari ovejacunatapish chingachishami, cashcata rurashpami paicunataca michisha ninmi.

¹⁷ Mandaj Jatun Diosca cashnapishmi nin: Ñuca ovejacunalla, cancunamanpish carnerocunamanpish, chivocunamanpish ima rurashcatami ricuchisha.

¹⁸ Cancunaca, alli q'uihuata micushpapish chaquicunahuan sarushpami mapayachircanguichij, chuyajlla yacuta ubyagrishpapish chaquicunahuan sarushpami mapayachircanguichij.

¹⁹ Chashna cancuna sarushpa mapayachishca q'uihuatami ñuca ovejacunaca micuncuna. Cancuna mapayachishca yacutami ubyancuna.

²⁰ Chaimantami Mandaj Jatun Diosca cashna nini: Riquichij, ñucami huirayashca ovejamanpish, irqui ovejamanpish imalla rurashcata ricuchisha.

²¹ Cancunallatajmi chai irqui ovejacunataca costillacunahuan, rigrahuan t'angashpa shitarcanguichij. Shinallataj gachucunahuanpishmi tsagmashpa urmachircanguichij, tucuicunatami caita chaita cacharcanguichij.

²² Ñuca ovejacunataca, ñucami quishpichisha. Mana cutin shuhuashpa apangacunachu. Chai ovejacunamanca, ñucami imalla rurashcata ricuchisha.

²³ Shinallataj chai ovejacunata michichunca, ñucami shuj michijta agllasha. Ñucata servij Davidtami churasha, paimi chai ovejacunataca michinga.

²⁴ Mandaj Dios ñucami paicunapaj Taita Dios casha, ñucata servij Davidca paicunata mandajmi canga. Caicunataca Mandaj Dios ñucatajmi chashna nini.

²⁵ Paicunahuanca sumajta causanatami ari ninacushun. Cai llajtamantaca p'iña animalcunatapish anchuchishami, shitashca pambacunapipish imata mana manchashpami causangacuna, yura ucucunapimi dormingallacuna.

²⁶ Ñuca ovejacunataca ñucapajlla urcu muyundijpimi churasha, paicunamanca achca allicunatami cusha. Shinallataj tamyana punllacunapimi tamyatapish cachasha, chai tamyahuanmi achca allicunata japingacuna.

²⁷ Granota p'ucuj yurapish alli granotami p'ucunga, allpapish alli granocunatami p'ucunga, cai llajtapica imata mana manchashpami causangacuna. Paicunata yugushpa huatashca cinta angucunataca p'itishami. Paicunata servichishpa causajcunapaj maquimantaca charichishami. Chaita ricushpami, ñucataca Mandaj Diostaj cashcataca yachangacuna.

²⁸ Ña mana ashtahuan shujtaj llajtacunapi causajcunapaj maquipi causangacunachu. Cai llajtapi tiyaj p'iña animalcunapish ña mana ashtahuan huañuchishpa micungacunachu. Ashtahuanpish imata mana manchashpami causangacuna. Paicunataca pipish mana manchachingachu.

²⁹ Paicunapajca sumaj michina pambatami rurasha. Cai llajtapica ña mana ashtahuan yaricaihuan huañungacunachu, ña mana ashtahuan shujtaj llajtacunapi causajcuna pingachishca causangacunachu.

³⁰ Paicunata Mandaj Taita Dios cashcamanta ñuca paicunahuan cashcatapish, paicunaca ñuca agllashca israelcuna cashcatapish yachangacunami. Mandaj Jatun Diostajmi chashna nini.

³¹ Ñuca q'uihuapi micuj ñuca ovejacunalla, cancunaca huañujlla runacunallamari canguichij, ñucaca cancunapaj Taita Diosmari cani ninmi Mandaj Jatun Diosca ni” nircami.