EZEQUIEL 31 - Dios Rimashca Shimicunami

Jatun mandajtaca cedro yurahuan ch'imbapurashcamanta

¹ Chunga shuj huata quimsa quillapaj punta punllapimi, Mandaj Diosca ñucataca cashna nirca:

² “Huañujlla aichayuj runalla, Egipto llajtata jatun mandaj faraonmanpish tucui chaipi causajcunamanpish cashna ni: Can sumaj cashcataca ¿pihuantaj ch'imbapuranguiyari?

³ Asiria llajtaca Libanopi tiyaj cedro yura shinamari carca. Chai yuraca, jatunmanpish yallitaj jatun, suni ramacunayuj p'angasapamari carca. Chai yura ñahuipish, achca ramacuna chaupipimari carca.

⁴ Paitaca tamyapish, allpa ucupi tiyaj yacupishmi huiñachirca. Jatun yacucunapish, chai yura muyundijtami callparca. Chai yacucunataca, urcupi tiyaj tucui shujtaj yuracunamanpishmi cacharca.

⁵ Paica urcupi tiyaj tucui yuracunamanta yalli jatuntami huiñarca. Ramacunapish manchanayajtami mirarirca. Achca yacuyuj cashpami, suni ramacunayuj tucurca.

⁶ Chai yura rama jahuacunapica, huairata purij alasyuj animalcunami tazinta rurarcacuna. Chai yura ucupica, pambata purij tucui laya animalcunami huacharcacuna. Chai yura llandujlla ucupica, achca llajtacunapishmi causarcacuna.

⁷ Paipaj sapicuna achca yacu c'uchupi cashcamantami, suni ramacunayuj tucushpa jatunta huiñashpa sumaj tucurca.

⁸ Chai yurataca, ñuca huertapi tiyaj cedro yuracunapish mana taparcacunachu, haya yura ramacunapish mana paipaj ramacuna shinachu carca. Castaño yuracunapish, mana pai shina ramasapachu carca. Ñuca huertapica, maijan yura mana pai shina sumajca tiyarcachu.

⁹ Paitaca achca ramacunahuanmi sumajyachircani. Chaimantami ñuca Edén huertapi tiyaj tucui yuracunaca, paitaca munarcacuna ninmi ni” nircami.

¹⁰ Chaimantami Mandaj Jatun Diosca cashnapish nirca: Paica tucuicunata mishashpa, jatunta huiñashcamanta, ramacunayuj cashcamanta, suni ñahuiyuj cashcamantami, paipaj shungupica jatunmi cani nirirca.

¹¹ Chaimantami shujtaj llajtacunata mandajcunaman cusha. Paicunami pai millaita rurashca shinallataj llaquichingacuna. Paitaca ñucaca shitarcanimi.

¹² Paitaca caru llajtamanta shamujcunami chingachingacuna. Shujtaj llajtamanta mandajcunami aisashpa shitangacuna. Chaimantami tucui paipaj ramacunaca urcu jahuacunapi, pugru pambacunapi, huaicu yacucunapi urmangacuna. Shinallataj chai yura ucupi llandurishpa causajcunapish paillata saquishpami, anchurishpa ringacuna.

¹³ Chai yura urmashca jahuapimi, huairata purij alasyuj animalcunaca causangacuna. Shinallataj pambata purij tucui laya animalcunaca, ramacunapimi siriringacuna.

¹⁴ Yacu c'uchupi huiñaj yuracunalla, cancunapish ama chai yura shina yallitaj jatun cashcata yuyanguichijchu, ramacunata mishashpa huiñanatapish ama yuyanguichijchu, cancunalla jatun cashcatapish ama yuyanguichijchu. Cancunapish tucuicunallatajmi huañuna canguichij. Cancunapish huañujlla aichayuj runacuna huañujpi pambana allpa ucu jatun jutcullapitajmi pambarina canguichij.

¹⁵ Mandaj Jatun Diosca cashnapishmi nirca: “Seolman pai uriyai punllallatajmi, jatun jutcumanta llujshicuj yacucunataca llaqui churanata churachircani. Chaimantami jatun yacucunatapish jarcarcani, achca yacucunami jarcarirca. Paimantami Líbano urcutapish manchanana amsahuan tapachircani. Chaita ricushpami, shujtaj yuracunaca ñahuicuna amsayashpa urmarcacuna.

¹⁶ C'ulun nichishpa urmachishpami llajtacunatapish chujchuchircani. Paitaca pambana jutcuman uriyajcunandijmi, Seolmanca uriyachircani. Shinallataj Edén huertapi tiyaj agllashca yuracunapish, Líbano urcupi tiyaj tucuimanta yalli alli yuracunapish, yacu c'uchupi tarpushca yuracunapish allpa ucupi pambarijpimi cushicurcacuna.

¹⁷ Paipaj rigracuna shina cajcunapish, paipi llandurishpa causaj llajtacunapish espadahuan huañuchishcacuna shinallataj, paihuanmi Seolmanca uriyarcacuna.

¹⁸ Can chashna sumaj cashcata, jatun cashcataca ¿Edén huertapi tiyaj maijan yurahuantaj ch'imbapurarcanguiyari? Shina cashpapish Edén huertapi tiyaj yuracunandijllatajmi, allpa ucupi shitashca cangui. C'aricuna charishca aicha mirga carata mana p'itishcacunataca, espadahuanmi huañuchircacuna. Chaicunahuanmi sirigringui. Faraonpish, tucui cai llajtapi causajcunapish chashnami tucungacuna” nircami Mandaj Jatun Diosca.