EZEQUIEL 28 - Dios Rimashca Shimicunami

Tiro pueblota mandajta llaquichinamanta

¹ Mandaj Diosmi ñucataca cashna nirca:

² “Huañujlla aichayuj runalla, Tiro pueblota mandajmanca cashna huillai: Mandaj Jatun Diosca cashnami nin: Canca cambaj shungupi jatun tucushpami: Ñucaca diosmi cani. Chaimantami Taita Dios tiyarinapi tiyarishpa, mama cucha chaupipi tiyacuni nircangui. (Canca runallamari cangui, manamari Dios canguichu). Chashna cashpapish cambaj shungupica, Dios cashcatamari yuyangui.

³ Riqui, canca Danieltapish yalli yachaisapami cangui. Canmantaca imapish mana pacalla cai tucunchu.

⁴ Canca alli yachaj cashpa, alli yuyaiyuj cashpami yallitaj charij tucurcangui. Chaimantami curitapish, cullquitapish huaquichinacunapi yallitaj huaquichingui.

⁵ C'atunata randinatapish alli yachaj cashpami, imalla charinacunataca achcata mirachircangui. Canca yallitaj charij cashpami cambaj shungupi jatun tucurcangui” nircami.

⁶ Chaimantami Mandaj Jatun Diosca, cantaca cashnapish nin: “Cambaj shungu ucullapica, Diosmi cani yuyarcanguimi.

⁷ Can chashna yuyashcamantaca, caru llajtacunamantami c'ari c'ari runacunata cambajman cachasha, paicunami espadata huaquichinamanta llujshichishpa alli yachaj tucushcataca llaquichingacuna. Chashnami can sumaj achij nicujtapish mapayachingacuna.

⁸ Cantaca jutcupimi pambangacuna. Canpish mama cucha chaupipi huañujcuna shinallatajmi huañungui.

⁹ Canca canta huañuchicujpaj ñaupajpica: ¿Ñucaca Diosmi cani ninguichu? Canta huañuchijpaj maquipica, huañujlla aichayuj runallamari cangui, manamari Dioschu cangui.

¹⁰ C'aricuna charishca aicha mirga carata mana p'itishcacuna shinami shujtaj llajta runacunapaj maquipica huañungui. Caicunataca ñucatajmi chashna nini” ninmi Mandaj Jatun Diosca.

Tiro pueblota jatun mandaj huañujpi huacashcamanta

¹¹ Mandaj Diosca ñucataca cashnami nirca:

¹² “Huañujlla aichayuj runalla, Tiro pueblota jatun mandajmantaca, yupashpa yupashpa cashna huacangui: Mandaj Jatun Diosca cashnami nin: Canca tucuimanta yalli alli sello shinami carcangui. Allita yachajpish, sumajta rurashpa tucuchishcami carcangui.

¹³ Canca Taita Diospaj Edén huertapimi carcangui. Canca tucui laya sumaj achij nicuj rumicunahuan, cornerinacunahuan, topaciohuan, jaspehuan, crisolitohuan, berilohuan, onicehuan, zafirohuan, carbunclohuan, esmeraldahuan, curihuan rurashca sumaj churanata churarishcami carcangui. Canta rurai punllapica tamborcunapi, flautacunapi alli tocanata yachajcunapish allichirishcacunami carcacuna.

¹⁴ Canca cuidaj jatun querubinmi carcangui. Chaimantami cantaca ñucallataj ñucapajlla urcu jahuapi churarcani, chaipimi shayarircangui. Canca nina lunyacuj rumicuna jahuatami purij carcangui.

¹⁵ Canta ruraimantapacha jatunyashpa, canpi mana allita ñuca japingacamaca ima juchachina illajmi causarcangui.

¹⁶ Shina cashpapish c'atuna yuyaillahuan, randina yuyaillahuan junda cashpami juchata rurarcangui. Cuidaj querubinlla, chaimantami cantaca ñucapajlla urcumantapish, nina lunyacuj rumicuna jahuamantapish pambaman shitarcani.

¹⁷ Canca cambaj shungu ucullapica, sumajmi cani nirishpami jatun tucurcangui. Achij nicuj cashcamantami alli yachaitapish chingachircangui. Chaimantami cantaca pambaman shitarcani. Can imalla tucushcata ricuchunmi jatun mandajcunapaj ñaupajpi churasha.

¹⁸ Canllataj yallitaj millaita rurashpa yallitaj charisha nishpa imatapish c'atushpa randishpami, cambaj Diospaj huasitaca yangata rurarcangui. Chaimantami canllamantataj ninata japichircani. Chai ninami cantaca tucuchirca. Tucuicuna ricucunpimi cai pachapica, cantaca ushpallata saquircani.

¹⁹ Chaimantami shujtaj llajtacunapi causaj canta rijsijcunaca mancharingacuna. Canca jatun mancharina tucushpami, huiñaipaj chingaringui” nircami.

Sidón pueblota llaquichinamanta

²⁰ Mandaj Diosca ñucataca cashnami nirca:

²¹ “Huañujlla aichayuj runalla, Sidón puebloman cambaj ñahuita churashpa, chai pueblo llaqui tucunata huillai.

²² Cashna ningui: Mandaj Jatun Diosca cashnami nin: Sidón pueblolla, canhuanca ñucaca p'iñami cani. Ñucaca cambaj chaupipimi jatunyachishca casha. Jucha illaj cashpa canta llaquichijta ricushpami, ñucataca Mandaj Diostaj cashcata yachangacuna.

²³ Paipajmanca mancharina ungüicunatami cachasha. Ñancunapish yahuarhuan jundami canga. Chai pueblollapitajmi huañushcacunapish urmangacuna. Paitaca tucuimantami espadahuan llaquichinaman shamungacuna. Chashna rurajta ricushpami ñucataca, Mandaj Diostaj cashcataca yachangacuna.

²⁴ Israelcunataca paicunapaj muyundijpi causajcunapish, p'iñajcunapish ña mana ashtahuan casha shina, auja shina tujsishpa nanachingacunachu. Chaimantami ñucataca, Mandaj Diostaj cashcataca yachangacuna ninmi ningui” nircami.

²⁵ Mandaj Jatun Diosca cashnapishmi nin: “Shujtaj llajtacunapi caipi chaipi causacuj israelcunataca tandachishami. Chashna rurashpami, shujtaj llajtacunapi causajcunapaj ñahuipica, ñucaca ima juchachina illaj ricurisha. Israelcunaca paicunapaj quiquin llajtapimi causagringacuna. Chai llajtataca, ñucata servij Jacobomanmi curcani.

²⁶ Israelcunaca paicunata p'iñashpa causaj muyundij llajtacunata ñuca chingachijpimi, imata mana manchashpa causangacuna. Chaipica huasicunatapish shayachingacunami, uvatapish tarpungacunami. Chaita ricushpami israelcunaca, ñucataca paicunata Mandaj Taita Dios cashcataca yachangacuna” nircami.