EZEQUIEL 24 - Dios Rimashca Shimicunami

T'imbucuj mangamanta yuyachishpa parlashcami

¹ Iscun huata chunga quillapaj chunga punllapimi, Mandaj Diosca ñucataca cashna nirca:

² “Huañujlla aichayuj runalla, cunan ima punllapi cashcata quillcai. Cunan punllallatajmi Babilonia llajtata jatun mandajca, Jerusalenta llaquichijcunataca muyundijta churan.

³ Chai mana cazuj ch'ahuan runacunamanca, yuyachij parlohuan cashna rimai: Mandaj Jatun Diosca cashnami nin: Tullpapi mangata tiyachishpa yacuta churangui.

⁴ Shinallataj chai mangapica, changa aichatapish, huasha lomo aichatapish churangui. Tullucunatapish allicunallata agllashpa, chai mangallapitaj jundachingui.

⁵ Chashna yanungapajca, alli ovejata agllashpa japingui. Mangapi mana churashca tullucunataca rupachingui. Chai mangapi churashca aichatapish, tullucunatapish apiyajta yanungui ninmi.

⁶ Mandaj Jatun Diosca cashnapishmi nin: Huañuchijcuna causan pueblolla, ¡aij imachari tucungui! Cai puebloca fierro ishpashca manga shinamari tucushca, chaitaca mana anchuchi tucuipajmari. Ama suerteta rurashpa, mirga mirga aichacunata chai mangamantaca llujshichilla.

⁷ Cai puebloca yahuarhuan jundamari. Chai yahuartaca lluchujlla rumipimari jichashcacuna. Chai yahuartaca ñutu allpa tapachunllapish, manamari allpa jahuapi jichashcachu.

⁸ Chai yahuarta jichashcata ricushpa, jatunta p'iñarishpa llaquichingapajmi ama chingarichun, chai sinchi rumi jahuapi churarcani” ninmi.

⁹ Mandaj Jatun Diosca cashnapishmi nirca: “Huañuchijcuna causan pueblolla, ¡aij imachari tucungui! Ñucapish cantaca ninata lunyachishpami rupachisha.

¹⁰ Achca yantata churashpa ninata lunyachishpami, chai aichataca apiyajta yanushpa salsata rurasha. Shinallataj tullucunatapish tucuimi rupachisha.

¹¹ Chai chushajlla mangataca, rupacuj nina jahuapimi tiyachisha. Chaipimi chai mangapi tiyaj mapapish fierro ishpashcapish tucui rupashpa chingaringa.

¹² Fierro ishpashcata llujshichisha nishpa yangallamari shaicurca, chaica manataj llujshircachu. Ninapi rupachijllapimi, tucui rupashpa chingaringa.

¹³ Jerusalén pueblolla, canca huainayana munailla causashcamantaca llaquitaca apanami cangui. Cambaj mapata ñuca p'iñajpipish, chai millaita ruranataca manataj saquisha nircanguichu. Ñuca ashtahuan p'iñarishpa llaquichingacama manataj mapa illaj canguichu.

¹⁴ Mandaj Dios ñuca nishcataca pajtachishatajmi. Chai llaquica shamungatajmi. Mana cutirishachu, mana llaquirishachu. Can imallata rurashpa causashca shinallatajmi ricushpa llaquichingacuna” ninmi Mandaj Jatun Diosca.

Ezequielpaj huarmi huañushcamanta

¹⁵ Mandaj Diosca ñucamanca cashnami nirca:

¹⁶ “Huañujlla aichayuj runalla, cambaj c'uyashca huarmitaca, ñapish cungaillapimi huañuchisha. Paimantaca ama yupashpa yupashpa huacanguichu, ama huiquita shutuchinguichu.

¹⁷ Allijlla shungu llujshinguilla, huañushcamanta churarina churanatapish ama churaringuichu. Ashtahuanpish umapica turbanteta churaringuilla, chaquipica zapatocunata churaringuilla, ñahuitapish ama pillurishca churanahuan taparinguichu, huañuipi yanushca micunatapish ama micunguichu” nircami.

¹⁸ Chaitami tutamantamanca tucuicunaman huillarcani, ñapish chishipajca ñuca huarmica huañurcallami. Cayandij tutamantataca, Mandaj Dios mandashca shinallatajmi rurarcani.

¹⁹ Chaita ricushpami tucui runacunaca: Can imalla rurashcacunaca ñucanchijpajca, imata ricuchij cashcataca ¿manachu huillangui? nishpami tapurcacuna.

²⁰ Shina nijpimi ñucaca Mandaj Diosmi paipaj shimihuantaj cashna nirca:

²¹ “Tucui israelcunata cashna ningui: Mandaj Jatun Diosca cashnami nin: Riquichij, sumaj cashcata ricuchij ñucapajlla huasitaca chingachishami. Chai huasitaca sumaj cajllapimi, cancunaca ricunata munarcanguichij. Ñuca huasitaca sumaj cashcallamantami munanguichij. Shinallataj cancuna saquishca cancunapaj churicunapish, ushushicunapish espadapimi huañungacuna.

²² Shinallataj cancunapish ñuca imalla rurashca shina ruraichij. Ama cancunapaj ñahuita pillurishca churanahuan taparichijchu. Huañuipi yanushca micunatapish ama micunguichijchu.

²³ Umapica turbanteta, chaquicunapica zapatocunata churaringuichijlla, ama yupashpa yupashpa huacanguichijchu. Ashtahuanpish cancunaca millaita rurashcamantami, chingarina canguichij. Shinallataj caishuj chaishujmi huacanguichij.

²⁴ Cancunamanca Ezequielmi imatapish rurashpa ricuchinga. Pai imalla rurashcatami cancunapish rurana canguichij. Chashna tucujpimi ñucataca, Mandaj Jatun Diostaj cashcata yachanguichij ningui” nircami.

²⁵ “Huañujlla aichayuj runalla, israelcuna paca tucuna ñuca huasitaca urmachishatajmi. Paicunaca ñuca huasi sumaj cajllapimi cushicuncuna, chaillamantami ricunatapish munancuna. Ñuca huasitaca, sumaj cashcallamantami munancuna. Paicunapaj churicunatapish, ushushicunatapish chingachishami.

²⁶ Chashna llaquichicui punllallatajmi, huañunamanta quishpirishpa shujca, ima tucushcata canman huillanaman shamunga.

²⁷ Chai punllallatajmi, huañunamanta quishpirishpa shamuj runahuanca rimangui. Chaimantaca ña mana ashtahuan upa tucunguichu. Canmi paicunamanca imatapish ricuchijca cangui. Chaimantami ñucataca, Mandaj Diostaj cashcata yachangacuna” nircami.