EZEQUIEL 20 - Dios Rimashca Shimicunami

Israelcuna mana cazujpi Taita Dios ima shina llaquichishcamanta

¹ Canchis huata, pichca quillapaj chunga punllapimi cashna tucurca: Israelcunapuramanta tauca cunaj yuyajcunami Mandaj Diosta tapunaman shamushpa, ñuca ñaupajpi tiyarircacuna.

² Mandaj Diosca ñucataca cashnami nirca:

³ “Huañujlla aichayuj runa, israelcunata cunaj yuyajcunamanca cashna huillai: Mandaj Jatun Diosca cashnami nin: Cancunaca ¿ñucatachu tapunaman shamunguichij imamí? Causaj Mandaj Diostajmi cashna nini: Cancuna tapushcataca imata mana cutichishachu ninmi ni.

⁴ Huañujlla aichayuj runa, paicuna imalla rurashcataca canmi ricuchina cangui. Paicunapaj yayacuna millaita rurashcata rijsichishpaca,

⁵ cashna ningui: Mandaj Jatun Diosca cashnami nin: Jacobopaj huahua huahua israelcunata agllai punllallatajmi, paicunamanca ñuca maquita alzashpa ari nircani. Paicuna Egipto llajtapi cajpiraj paicunaman rijsichirishpami, ñuca maquita alzashpa: Ñucaca cancunata Mandaj Taita Diosmi cani nircani.

⁶ Chai punllaca ñuca maquita alzashpami, cai Egipto llajtamanta llujshichishpaca lechepish, sacha chuspi huachashca mishquipish yacu shina llujshicun llajtapimi churasha. Chai llajtaca tucui llajtacunamanta yalli sumaj llajtami nircanimi.

⁷ Shinallataj cashnapishmi nircani: Tucuicunallataj quiquin ñahuicunamanta millaita ruranata anchuchichij. Egipto llajtapi tiyaj dioscunahuan ama mapayaichijchu. Ñucami cancunata Mandaj Taita Dios cani nircanimi.

⁸ Ashtahuanpish paicunaca mana cazushpami ñucataca c'ariyarcacuna, mana cazushun nircacunachu, quiquin ñahuimantapish millaita ruranataca mana anchuchishun nircacunachu. Egipto llajtapi tiyaj dioscunatapish mana saquircacunachu. Chaimantami Egipto llajtallapitaj ñuca p'iñarishpaca, llaquichigrinitajmi nircani.

⁹ Chashna nishca cashpapish, shujtaj llajtacunapi causajcunapaj ricuipi ama yangata rurashca cangapaj, ñuca shutipish alli nishca cangapajmi paicunataca mana llaquichircani. Chai llajtapi causajcunapaj ñahuipica, rijsishcami tucurcani. Chaimantami israelcunataca, Egipto llajtamanta llujshichircani.

¹⁰ Paicunata Egipto llajtamanta llujshichishpaca, shitashca pambamanmi pusharcani.

¹¹ Chaipimi ñuca quillcachishcacunataca, paicunaman curcani. Ñuca huillachishcacunata chaipi ricuchishpami, caicunata pajtachij runaca causangami nishpa yachachircani.

¹² Paicunataca ñuca Mandaj Diostaj ñucapajlla ch'icanchishcata ricuchij cachunmi, ñuca samana punllacunataca curcani. Chai punllaca ñucapajpish, paicunapajpish yuyarinami tucurca.

¹³ Chashna yachachicujpipish, israelcunaca shitashca pambapimi ñucataca mana cazushpa c'ariyarcacuna. Ñuca quillcachishcapi nishca shinatajca mana purircacunachu, ñuca huillachishcacunatapish cungarircacunami. Chaicunata pajtachij runallami causanga. Ñuca cushca sanama punllacunatapish yangatami rurarcacuna. Chaimantami paicunataca p'iñarishpa, shitashca pamballapitaj llaquichishpa tucuchishami nircani.

¹⁴ Chashna nishca cashpapish, Egipto llajta runacunapaj ñahuipi ama yanga cangapajmi, paicunataca mana llaquichircani.

¹⁵ Shinallataj shitashca pambapipish, cutin maquita alzashpami, cashna nircani: Lechepish, sacha chuspi huachashca mishquipish yacu shina llujshicuj tucuimanta yalli sumaj llajtamanmi cancunataca pushasha nircani. Shina cashpapish, chaimanca manataj pushashachu nircanimi.

¹⁶ Paicunallatajmi ñuca huillachishcacunatapish cungarircacuna, ñuca quillcachishcacunapi nishca shinapish mana causarcacunachu. Ñuca cushca samana punllacunatapish yangatami rurarcacuna, rurashcalla dioscunallapimi shunguta churarcacuna.

¹⁷ Chashna rurashca cajpipish, ñucaca perdonashpami mana huañuchircani. Chaimantami shitashca pamballapitaj mana chingachircani.

¹⁸ Ñaupamanmi paicunapaj huahuacunamanca shitashca pamballapitaj cashna nircani: Cancunapaj yayacuna quillcachishcapi nishca shinatajca ama purichijchu, paicuna mandashcacunatapish ama pajtachichijchu, paicunapaj dioscunahuanpish ama mapayaichijchu.

¹⁹ Ñucami cancunata Mandaj Taita Dios cani, cancunaca caicunataraj ruraichij: Ñuca quillcachishcapi nishca shina purichij, ñuca imallata rurai nishcata pajtachichij.

²⁰ Ñuca saman punllacunataca ñucapajpish, cancunapajpish ricuchij señal cachun huaquichichij. Chashnami cancunata Mandaj Taita Dios cashcata yachanguichij nircanimi.

²¹ Shina nicujpipish, paicunapaj huahuacunaca ñucata mana cazushpami c'ariyarcacuna, ñuca quillcachishcacunapi nishca shinapish mana causarcacunachu, ñuca huillachishcacunatapish mana cazurcacunachu. Chaicunata rurashpa pajtachij runaca causangami. Ñuca samana punllacunatapish yangatami rurarcacuna. Chaimantami shitashca pamballapitaj ñuca p'iñarishpa llaquichisha nicurcani.

²² Chashna cashpapish, shujtaj llajtacunapi causajcunapaj ricuipi ama yanga cangapajmi, paicunataca mana llaquichircani.

²³ Shinallataj chai shitashca pamballapitaj cashpami, ñuca maquita alzashpa, paicunataca tucui cai pachapi tiyaj llajtacunaman caita chaita cachasha nircani.

²⁴ Paicunaca ñuca huillachishcacunatapish mana rurarcacunachu, ashtahuanpish ñuca quillcachishcapi nishcatapish cungarircacunami, ñuca samana punllacunatapish yangatami rurarcacuna. Paicunapaj yayacunapaj dioscunallapitajmi yuyaita churarcacuna.

²⁵ Chaimantami ñucapish paicunamanca, mana alli quillcachishcacunata curcani. Mana pajtachishpa causai tucuipaj mandashcacunatami curcani.

²⁶ Mandaj Diostaj cashcata ricuchingapajmi, paicunapaj punta churicunata rurashcalla dioscunaman cushpa rupachishcamantaca, ñucaman imalla cuna cashcataca mapayachircani. Paicunata llaquichingapajmi chashna rurarcani.

²⁷ Chaimanta huañujlla aichayuj runalla, israelcunamanca cashna nishpa huillai: Mandaj Jatun Diosca cashnami nin: Cancunapaj yayacunapish mana cazushpa c'ariyashpami, ñucataca p'iñachircacuna.

²⁸ Ñuca maquita alzashpami, chai llajtataca cushatajmi nircani. Chai llajtaman pushamujpica, chai llajtapi tiyaj jatun lomacunata, p'angasapa yuracunata ricushpaca chaipimi animalcunata cushpa huañuchircacuna. Ñuca mana ricunachishcacunatami chaicunapi curcacuna. Shinallataj mishquijllata ashnaj inciensotapish chaipimi rupachircacuna, vinotapish chaipimi tallircacuna ninmi ningui.

²⁹ Chaita ricushpami ñucaca: Cancunaca ¿ima cajpitaj lomacunapi tiyaj altarcunamanca ringuichigari? nishpa tapurcani. Chai altarcunaca cunan punllacamami Bama shutihuan tiyacun.

³⁰ Chashna cashcamantaca israelcunamanca cashna ningui: Mandaj Jatun Diosca cashnami nin: Cancunapish, cancunapaj yayacuna shinallatajmi millaita rurashpa mapayarcanguichij. Rurashcalla millanana dioscunahuanca huainayarcanguichijmari.

³¹ Cancunaca imallata cuna cashcatapish cushpa, cancunapaj churicunatapish rurashcalla dioscunaman cushpa rupachishpami, yallitaj mapayashcanguichij. Israelcunalla, cancuna chashna mana allita ruracujpica ¿maitataj ñucaca imata cutichishari? Ñucaca causacunimi, manataj imata cutichishachu ninmi Mandaj Jatun Diosca ningui.

³² Cancuna yuyashca shinaca manataj cangachu. Cancunaca: Caspita, rumita adoraj shujtaj llajtacuna shina cashunchij ninguichijmi.

³³ Mandaj Jatun Dios ñucaca causacunimi. Ñucaca cashnami nini: Sinchi maquihuan, rigra chutashcahuan, jatunta p'iñarishpami cancunataca mandasha.

³⁴ Shujtaj runacunapurapi mai llajtacunapi causacujcunataca llujshichishpa tandachishami. Ñucaca sinchi maquihuan, rigra chutashcahuan, jatunta p'iñarishpami tandachisha.

³⁵ Shujtaj llajtacunapi tiyaj shitashca pambaman pushashpami, chaipi cancunataca ñahui ñahui shayarishpa llaquichisha.

³⁶ Ima shinami Egipto llajta shitashca pambapi cancunapaj yayacunata llaquichircani, chashnallatajmi cancunatapish llaquichisha. Mandaj Jatun Diostajmi chashna nini.

³⁷ Cancunataca varahuan yupashpami pasachisha, ari ninacushcata pajtachishpa causachunmi churasha.

³⁸ Ñucata mana cazushpa c'ariyajcunatapish cancunapuramantaca anchuchishami. Llaquita causacun llajtacunamanta llujshichishpapish, Israel llajtamanca mana yaicuchishachu. Chashna rurajpimi ñucataca, Mandaj Diostaj cashcata yachanguichij.

³⁹ Israelcunalla, cancunataca Mandaj Jatun Diostajmi cashna nini: Cancuna ñucata manataj cazusha nishpaca, cancunapaj quiquin dioscunallatataj adorashpa catichijlla. Ashtahuanpish ñuca jucha illaj shutitaca imata cuna cashcahuanpish, cancunapaj rurashcalla dioscunahuanpish ña ama yangata ruraichijchu.

⁴⁰ Mandaj Jatun Diostajmi cashna nini: Israel llajtapi tiyaj ñucapajlla jatun urcupimi tucui israelcuna ñucataca servingacuna. Paicunataca chaipimi ñucapajlla cachun chasquisha. Chaipimi ñucaman imalla cuna cashcata cuchunpish, punta p'ucushca granocunata cuchunpish, ñucapajlla ch'icanchishcata cuchunpish mañasha.

⁴¹ Cancunataca shujtaj runacunapurapi, shujtaj llajtacunapi caipi chaipi causacujpi tandachishpaca, mishquijllata ashnacuj inciensota shinami chasquisha. Chashnami cancunamantaca shujtaj llajtacunapi causajcunapaj ñahuipica, ima juchachina illaj ricurisha.

⁴² Cancunapaj yayacunamanca ñuca maquita alzashpami, Israel llajtataca cushatajmi nircani. Cancunata chai llajtamanta pushamujpimi, ñucataca Mandaj Diostaj cashcataca yachanguichij.

⁴³ Chai llajtapi cashpami cancuna ima shinalla causashcatapish, imallata rurashpa mapayashcatapish yuyaringuichij. Chashna yuyarishpaca cancuna rurashca juchacunamantaca, quiquinllatatajmi p'iñaringuichij.

⁴⁴ Israelcunalla, cancunataca mana allita causashcamantapish, millaita rurashcamantapish llaquichina cashca shinaca mana llaquichishachu. Ashtahuanpish ñuca shutita c'uyashcamanta, cancunapaj chashna rurashcata ricushpami, ñucataca Mandaj Diostaj cashcata yachanguichij” ninmi Mandaj Jatun Diosca.

Neguev llajtata llaquichinata huillashcamanta

⁴⁵ Mandaj Diosca ñucataca cashnami nirca:

⁴⁶ “Huañujlla aichayuj runalla, cambaj ñahuihuan urata ricushpa Neguev pambapi tiyaj yuracunata llaquichinata huillai.

⁴⁷ Neguev pambapi tiyaj yuracunamanca cashna ningui: Mandaj Diospaj shimita uyaichij, Mandaj Jatun Diosca cashnami nin: Riqui, ñucami canpica ninata japichini. Chai ninami canpi tiyaj verde yuracunatapish, chaquishca yuracunatapish tucuita rupachishpa chingachinga. Chai nina lunyacujca manataj huañungachu, ashtahuanpish ura ladomanta janaj ladomanta tucui ricujcunapaj ñahuicunatami rupachinga.

⁴⁸ Ñuca Mandaj Diostaj, chai ninata japichishcataca tucuicunami ricungacuna. Chai ninaca manataj huañungachu ninmi ni” nircami.

⁴⁹ Shina nijpimi ñucaca: “¡Mandaj Jatun Dioslla! paicunaca ñucataca: Cai runaca pipish mana yuyaita japipaj parlocunallatamari parlan nincunami” nircani.