EZEQUIEL 15 - Dios Rimashca Shimicunami

Jerusalenpi causajcunaca imapaj mana valij uva yura shina cashcamanta

¹ Mandaj Diosca ñucataca cashnami nirca:

² “Huañujlla aichayuj runa, ¿uva yura caspichu shujtaj caspicunamanta yalli alli imatagari? ¿Uva yura rama caspichu shujtaj caspicunata yalli alli imatagari?

³ ¿Chai uva caspitaca, imallatapish rurangapaj apangacunachu imatagari? ¿Chai caspitaca imata huarcuna estacata rurangachu imatagari?

⁴ Riqui, chai caspica ninapi rupachinallamari. Chai caspi puntacunalla tucui rupashpa chaupilla saquirijpica ¿imata rurangapaj valingachu imatagari?

⁵ Manaraj rupashpapish, imata ruranapajpish mana valircachu, ninapi tucui rupashpacarin ¿imapajtaj valingari?

⁶ Chaimantami Mandaj Diostaj cashna nini: Shujtaj caspicunataraj mana rupachishpami, uva caspitaraj ninapi rupachircani, chashnallatajmi Jerusalenpi causajcunatapish tucuicunata chingachisha.

⁷ Paicunataca p'iñarishpa llaquichishatajmi. Ninamanta quishpirishca cajpipish, ninallahuantajmi paicunataca chingachinga. Paicunata chashna rurashpa llaquichijpimi ñucataca, Mandaj Diostaj cashcata yachanguichij.

⁸ Chashna mana cazushpa causashcamantami, cai llajtatapish llaquinayajta saquisha” nircami Mandaj Jatun Diosca.