EZEQUIEL 13 - Dios Rimashca Shimicunami

Llulla huillajcunata llaquichinamanta

¹ Mandaj Diosca ñucataca cashnami nirca:

² “Huañujlla aichayuj runa, Dios ima nishcata huillajcunami canchij nishpa, quiquin yuyaimanta huillaj israelcunamanca cashna ni: Mandaj Diospaj shimita uyaichij.

³ Mandaj Jatun Diosca cashnami nin: Imata manapish ricushpa quiquin yuyaimanta llullashpa huillaj ch'ahuanyashcacunaca ¡aij, imachari tucungacuna!

⁴ Israelcunalla, cancunaman huillajcunaca shitashca pambapi purij zorracuna shinallamari carcacuna.

⁵ Mandaj Dios shamushpa, israelcunata jatunta llaquichicui punlla ama imata manchachun nishpaca, Israel llajta muyundij patatapish mana pircarcanguichijchu. Chai pata t'unirishcatapish mana cuidarcanguichijchu.

⁶ Paicunaca yanga muscuicunallatami ricurcacuna, adivinashpallami llullashpa huillarcacuna. Paicunaca: Mandaj Diosmi chashna nin nishpami huillarcacuna. Mandaj Diosca manapish paicunataca cacharcachu. Shina cajpipish, paicunaca tucui imalla huillashcacunata Diosllataj pajtachichunmi shuyancuna.

⁷ Muscuipi shina cancuna ricushcapish yangallami, adivinashpallami llullashpa huillanguichij. Manapish ñuca imata rimashcatamari: Mandaj Diosmi chashna nin nishpa huillanguichij.

⁸ Chaimantami Mandaj Jatun Diostaj cashna nini: Cancunallataj yangata rimarishcamanta, llullacunata ricushcamantaca ñucami cancunataca llaquichigrini. Mandaj jatun Diostajmi chashna nini.

⁹ Imatapish manapish ricushpa llullashpalla huillajcunatapish, adivinajcunatapish ñuca maquihuanmi llaquichigrini. Paicunaca ñuca agllashca israelcunapurapica, mana tandanacungachu. Israelcunapaj shuticunata quillcana libropipish mana quillcashca cangacunachu. Israel llajtamanpish mana tigrangacunachu. Chashna rurajpimi ñucataca, Mandaj Jatun Diostaj cashcataca yachanguichij.

¹⁰ Ñuca agllashcacunataca: Manapish sumaj causai tiyana cajpimi: Sumaj causaimi tiyanga nishpa umarcacuna. Chashna nijcunaca shuj runa rurashca patata shujtajcuna lodohuan tapachij shinallami.

¹¹ Chai patata lodohuan tapachijcunamanca: Chai pataca urmangami nishpa huillangui. Shinallataj manchanayaj tamyami shamunga. Chai patata urmachichunca, rumitajlla runducunatami cachasha. Jatun acapanapishmi chai patataca urmachinga.

¹² Chai pata urmajpica ¿manachu cancunataca: Lodohuan tapachishca pataca ¿ima nishpataj urmanchu imamí? ninmancuna?

¹³ Chaimantami Mandaj Diosca cashna nini: Ñuca p'iñarishpami chai patata urmachichunca, jatun acapanata cachasha. Jatunta p'iñarishpami, manchanayaj tamyatapish cachasha. Shinallataj p'iñarishpa tucuchingapajmi, rumitajlla rundutapish cachasha.

¹⁴ Chashnami cancuna lodohuan tapachishca patataca, urmachishpa tucuita chingachisha. Callari rumicuna ricurijta tucuita urmachisha. Chaipimi huañunguichij. Chashna rurajpimi, ñucataca Mandaj Diostaj cashcata yachanguichij.

¹⁵ Ñucaca jatunta p'iñarishpami chai patatapish, lodohuan tapachijcunatapish chingachisha. Chaimantaca cancunamanca cashnami nisha: Patapish, chai patata lodohuan tapachijcunapish ña mana tiyanchu.

¹⁶ Israelcunaman huillajcunaca Jerusalenpica, manapish sumaj causai tiyana cajpipish: Caipica sumaj causaimi tiyanga nincunami. Mandaj Jatun Diostajmi chashna nini.

¹⁷ Huañujlla aichayuj runalla, cambaj llajtapura huarmicunaca quiquin yuyaimantami Dios ima nishcata huillajcuna shina huillancuna. Paicunata cambaj ñahuihuan ricushpa ima tucuna cashcata huillai.

¹⁸ Cashna huillangui: Mandaj Jatun Diosca cashnami nin: Yumbucuna maquicunapi huatarina linsota sirajcunalla, uchillacunapaj, jatuncunapaj uma huatarina linsota rurashpa c'atuj huarmicunalla, ¡aij, imachari tucunguichij! Quiquin causaipaj imallatapish charingapajllami, chaicunata c'atushpa ñuca agllashcacunataca umashpa pandachinguichij.

¹⁹ Cancunaca lutsaj cebadamanta, mirga tandamantami ñuca agllashcacunapurapica, manapish huañuchina runacunataraj huañuchishpa, huañuchina runacunamanraj causaita curcanguichij. Chashnami llullashcata uyaj paicunamanca llullarcanguichij. Chashna rurashpami, ñucataca yangata rurarcanguichij.

²⁰ Chaimantami Mandaj Jatun Diostaj cashna nini: Yumbucuna maquicunapi huatarina linsocunata cancuna rurashcataca chingachishatajmi. Chaicunahuanmi maipi purijcunatapish urmachinguichij. Paicunataca cancunapaj maquimantaca cacharichishami. Pajarocuna shina callpashpa purichunmi, cancuna urmachishca runacunataca cacharisha.

²¹ Shinallataj cancuna rurashca uma huatarina linsocunatapish lliquishami, ñuca agllashcacunataca cancunapaj maquimantaca quishpichishami. Paicunaca ña mana ashtahuan aicha shina cancunapaj maquipica cangacunachu. Chaita ricushpami ñucataca, Mandaj Diostaj cashcataca yachanguichij.

²² Cancunaca chashna llullashpallami, cashcata rurajtaca llaquichircanguichij. Paitaca ñucaca manamari llaquichircanichu. Shinallataj cancunaca ñucata mana manchajcunamanmi, ashtahuan millaita rurachun yuyaicunata curcanguichij.

²³ Chaimantaca muscuipi shina yanga ricunatapish, ña mana ashtahuan ricunguichijchu. Adivinashpa huillanatapish mana ashtahuan huillashpa catinguichijchu. Cancunapaj maquimantaca, ñuca agllashcacunataca quishpichishami. Chashna rurajpimi ñucataca, Mandaj Diostaj cashcataca yachanguichij ninmi ni” nircami.