EZEQUIEL 12 - Dios Rimashca Shimicunami

Jerusalenpi causajcuna prezu rina cashcata Ezequiel ricuchishcamanta

¹ Mandaj Diosca ñucataca cashnami nirca:

² “Huañujlla aichayuj runalla, canca mana cazuj ch'ahuancunapaj chaupipimari causacungui. Paicunaca mana cazuj ch'ahuancuna cashcamantami, ñahuita charishpapish mana ricuncuna, rinrinta charishpapish mana uyancuna.

³ Chashna cashcamanta huañujlla aichayuj runalla, canca imalla apanacunata allichishpa, paicuna ricucujpi punllapacha llujshishpa ringui. Can maipi causacushcamantaca, shujtajpi causagringui. Chaita ricushpaca, chai mana cazujcunaca entendingapishchari.

⁴ Prezucuna apana quipita shinaca paicuna ricucujpi punlla llujshichingui, ashtahuanpish canca prezu apacujpi shina paicuna ricucujpi chishita llujshingui.

⁵ Paicuna ricucujllapitaj, patata jutcushpa chaita llujshingui.

⁶ Paicuna ricucujpi, imalla apanata rigra jahuashpa tuta llujshichingui. Cambaj ñahuita taparishpa llajtataca ama ricungui. Israelcunapajca jatun llaqui shamunata yachachunmi, chashna rurashpa ricuchichun churani” nircami.

⁷ Shina nijpimi ñucaca pai mandashca shina rurarcani, prezucuna apana quipita shinaca punllami llujshichircani. Chishitaca, ñuca quiquin maquihuanmi patataca jutcurcani. Chaimantaca paicuna ricucunpi, imalla apanata rigra jahuashpa, tutami llujshirircani.

⁸ Cayandij tutamantataca, Mandaj Diosca ñucataca cashnami nirca:

⁹ “Huañujlla aichayuj runa, chai mana cazuj israelcunaca cantaca: ¿Imatataj ruracungui? nishpami tapungacuna.

¹⁰ Paicunamanca cashna nishpa huillangui: Mandaj Diosca cashnami nin: Cai huillanaca Jerusalenta mandajpish, tucui chaipi causaj israelcunapish imalla tucuna cashcatami ricuchin ningui.

¹¹ Shinallataj ñucami cancuna imalla tucunataca ricuchicuni. Imatami ñuca rurarcani, chai shinallatajmi cancunapish tucunguichij. Cancunaca huatashca shinami prezu apashca canguichij.

¹² Paicunata mandajtapish rigra jahuapimi, pata jutcuta tuta llujshichishpa apangacuna. Llajtata mana ricungapajpish, paipaj ñahuitami taparinga.

¹³ Ashtahuanpish pai ricujpica, ñuca linchita shitashpami chaipi urmachisha. Chaimantaca pai p'iñashca Caldea llajta runacuna causacun Babilonia llajtaman apachunmi saquisha. Chai llajtataca mana ricungachu, chaipimi huañunga.

¹⁴ Paita ayudangapaj muyundijta shayacujcunatapish, paipaj soldadocunatapish tucuicunatami caita chaita cachasha. Paicunataca espadahuanmi catisha.

¹⁵ Tucui cai pachapi tiyaj llajtacunapi tsirapashpa chingachijpimi, ñucataca Mandaj Diostaj cashcata yachangacuna.

¹⁶ Paicunapuramantaca ashacunallatami, espadahuan, yaricaihuan, ungüihuan huañunamantaca quishpichisha. Paicunami mai llajtaman chayashpapish: Ñucanchijca yallitaj millaitami rurashcanchij nishpa, tucuita huillangacuna. Chaimantami ñucataca, Mandaj Diostaj cashcatapish yachangacuna” nircami.

¹⁷ Mandaj Diosca ñucataca cashnapishmi nirca:

¹⁸ “Huañujlla aichayuj runalla, cambaj micunataca chujchuihuan micuyari, yacutapish manchaj manchajlla ubyayari.

¹⁹ Chaimantaca Israel llajtapi causajcunamanca cashna ningui: Mandaj Jatun Diosca Jerusalenpi causajcunatapish, tucui israelcunatapish cashnami nin: Paicunaca micunataca chujchuihuanmi micungacuna, yacutapish manchaj manchajllami ubyangacuna. Paicuna millaita rurashcamantaca, paicunapaj llajtaca chushajmi saquiringa.

²⁰ Runacuna causacun pueblocunapish, shitashcami saquiringa. Chashnami cai llajtaca llaquinayaj saquiringa. Chashna rurajpimi ñucataca, Mandaj Diostaj cashcataca yachangacuna ninmi ni” nircami.

²¹ Mandaj Diosca ñucataca cashnapishmi nirca:

²² “Huañujlla aichayuj runalla, cancunaca Israel llajtapica: Punllacunaca uniyashpa rinllami, muscuipi shina ricushcacunapish chingarinllami nishpami yuyachij shimicunata rimanguichij. Chaica ¿imatataj nisha ninri?

²³ Chaimanta paicunamanca cashna nishpa huillai: Mandaj Jatun Diosca cashnami nin: Cai yuyachij shimicunataca chingachishami, cai yuyachij shimicunataca Israel llajtapica, ña mana ashtahuan rimangacunachu. Chai punllacunaca ñamari chayamushca, muscuipi shina ricushcacunapish tucuimi pajtamushca ninmi nishpa huillangui.

²⁴ Israelcunapurapica ima yangacunata muscuipi shina ricujcunapish, adivinashpa uyanajllata rimajcunapish mana tiyangachu.

²⁵ Imalla tucunata Mandaj Dios ñuca huillashcataca, mana uniyashpami pajtachisha. Mana cazuj israelcunalla, cancunaman huillashca shimicunataca pajtachishatajmi ninmi Mandaj Jatun Diosca ningui” nircami.

²⁶ Mandaj Diosca ñucataca cashnapishmi nirca:

²⁷ “Huañujlla aichayuj runalla, cantaca israelcunaca cashnami nincuna: Cai runa muscuipi shina ricushcata huillashcaca achca punllacuna q'uipa, uni huatacunapimi pajtanga nincunami.

²⁸ Chashna nicujcunamanca cashna nishpa huillai: Mandaj Jatun Diosca cashnami nin: Ñuca imalla huillashca shimicunaca ña mana ashtahuan uniyangachu, ashtahuanpish ñuca imalla huillashca shimicunaca pajtangatajmi ninmi Mandaj Jatun Diosca nishpa huillai” nircami.