EZEQUIEL 10 - Dios Rimashca Shimicunami

Diospaj huasimantaca Dios sumaj cashca anchushcamanta

¹ Querubincunapaj uma jahuapi caj pambajlla jahuapica, zafiro rumitatajllami ricurcani. Chaica jatun tiyarinaman rijchajmi carca.

² Lino churanata churashca runataca cashnami nirca: “Querubincunapaj ucupi tiyacuj rueda chaupiman yaicui. Chai querubincunapaj chaupipi rupacuj carbonta, maqui jundata lutsashpa pueblo jahuata tsirapashpa shitai” nijpimi, chai runaca ñuca ricucuita yaicurca.

³ Chai runa yaicucujpica, querubincunaca chai huasi alli ladomanmi carcacuna. Shinallataj chai huasi canllapica, p'uyumi jundarca.

⁴ Chaimantaca Mandaj Diospaj sumaj achij nicuj p'uyumi, querubinpaj jahuamantaca pungu umbralpi tiyarirca. Shinallataj chai huasipica, p'uyumi jundarca. Mandaj Diosca sumaj cashcata ricuchingapajmi, huasi canllatapish achij nichirca.

⁵ Shinallataj chai querubincunapaj alascuna p'ataj nishcapish, tucuita Mandaj Dios caparishpa rimashca shinami huasi canllacama uyarirca.

⁶ Lino churanata churashca runataca: “Querubincunapaj ruedacuna chaupimanta ninata japi” nishpa mandajpimi, chai runaca ninata japinaman yaicushpaca, chai ruedacuna chaupipi shayarirca.

⁷ Chai querubincunapuramanta shujca, paicunapaj chaupipi caj ninata japishpami, lino churanata churashca runapaj maquipi churarca. Chai runaca ninata japishpami, llujshishpa rirca.

⁸ Shinallataj chai querubincunapaj alascuna ucupica runapaj maquimi ricurirca.

⁹ Chai querubincunapaj c'uchupica, chuscu ruedacunatapishmi ricurcani. Chai ruedacunaca querubincunapaj c'uchupimi carca. Cada querubinpaj c'uchupimi, shuj rueda tiyarca. Chai ruedacunaca crisólito rumiman rijchaj colorta rurashcami carca.

¹⁰ Chuscundij ruedacunami chai shinallataj carca. Shuj rueda ucupica, shujtaj ruedata quinriman churashca shinami ricurirca.

¹¹ Chai ruedacunaca, chuscundij ladomanmi rirca. Maijan ladoman ringapajpish, mana muyurircachu.

¹² Chai querubincunaca cuerpopipish, huashapipish, maquicunapipish, alascunapipish, chuscundij ruedacunapipishmi ñahui luluncunallahuan junda carca.

¹³ Ñuca uyacuitami ruedacunataca: “¡Rueda!” nishpa caparirca.

¹⁴ Chai querubincunaca, tucuicunami chuscu ñahuita charircacuna. Shuj lado ñahuica, querubinpaj ñahuimi carca. Caishuj lado ñahuica, runapaj ñahuimi carca. Caishuj lado ñahuica, leonpaj ñahuimi carca. Caishuj lado ñahuica, aguilapaj ñahuimi carca.

¹⁵ Chai querubincunaca jatarircacunami. Chai querubincunaca, Quebar jatun yacu c'uchupi causacushpa ricushca causajcunatajllami carca.

¹⁶ Chai querubincuna puricujpica, ruedacunapish paicunahuanmi tandalla purircacuna. Shinallataj chai querubincuna allpamanta jahuata jatarijpipish, chai ruedacunapish paicunamantaca mana saquirircachu.

¹⁷ Paicuna shayarijpica, ruedacunapish shayarircami. Paicuna jahuata jatarijpica, ruedacunapish jahuatami paicunahuan tandalla jatarircacuna. Chai causajcunapaj espiritullatajmi ruedacunapipish carca.

¹⁸ Chaimantaca huasi umbral jahuapi tiyacuj Mandaj Diospaj sumaj achij nicuj cashcami querubincunapaj jahuapi tiyarirca.

¹⁹ Ñuca ricucuitami chai querubincunaca, allpamantaca alascunahuan jahuata jatarishpa rircacuna. Paicuna jahuata jatarishpa rijpica, ruedacunapish jatarishpami, paicunahuan tandalla rircacuna. Chaimantaca Mandaj Diospaj huasiman inti llujshin ladota yaicuna pungupimi shayarircacuna. Israelcunapaj Taita Dios sumaj achij nicujmi paicunapaj jahuapica carca.

²⁰ Chai causajcunaca, Quebar jatun yacu c'uchupi israelcunapaj Taita Dios tiyacun ucupi ricushca causajcunallatajmi carca. Chaimantami querubincunallataj cashcata rijsircani.

²¹ Tucuicunallatajmi chuscu ñahuita, chuscu alasta charircacuna. Paicunapaj alascuna ucupica, runapaj maquicunatami charircacuna.

²² Paicunaca Quebar jatun yacu c'uchupi ricushca causajcunapaj ñahuicuna shinallatatajmi charirca. Tucuicunallatajmi mana maiman huishtushpa, ñaupajllaman ricushpa purircacuna.