ÉXODO 9 - Dios Rimashca Shimicunami

Animalcunapi ungüita churashcami

¹ Mandaj Diosca Moisestaca: –Faraonpajman yaicushpaca: “Mandaj Dios hebreocunapaj Diosca cashnami nin: Ñuca agllashcacunataca ñucapajta rurachun saqui ninmi.

² Paicuna richun mana saquishpa paicunata can charicujllapica,

³ Mandaj Diosca can mandacun llajtapi caj caballocunata, burrocunata, camellocunata, vacacunata, ovejacunatami paipaj maquihuan yallitaj jatun ungüihuan huañuchinga.

⁴ Mandaj Diosca israelcunapaj animalcunatapish, Egiptopi causajcunapaj animalcunatapish ch'icanchingami. Israelcunapaj animalcunaca shujllapish ama huañuchunmi ch'icanyachinga ninmi” nigri– nircami.

⁵ Mandaj Diosca: –Ñucaca cayacamallami shuyani. Cayaca utcatami chashna llaquichi callarisha– nircami.

⁶ Cayandij punllaca Mandaj Diosca, pai nishca shinallatajmi rurarca. Tucui Egipto llajtapi causajcunapaj animalcunami huañurca. Ashtahuanpish israelcunapaj animalcunaca shujllapish mana huañurcachu.

⁷ Israelcunapaj animalcuna huañushcata mana huañushcata ricuchun faraón cachajpica, shujllapish mana huañushcatami ricurcacuna. Chaita yachashpapish paica rumi shungu tucushpami, israelcuna richunca manataj saquisha nirca.

Chupu ungüihuan llaquichishcami

⁸ Mandaj Diosca Moisesta, Aarontaca: –Hornomanta lutsai ushpata apaichij. Chai ushpataca faraonpaj ñaupajpi Moisés jahuata tsirapashpa shitachun.

⁹ Chai ushpaca ñutu allpa tucushpa tucui Egipto llajtata rishpami, Egipto llajtapi causajcunataca gentecunatapish, animalcunatapish carachayashpa chupu tucushpa llaquichinga– nircami.

¹⁰ Chaimi paicunaca hornomanta ushpata apashpa faraonpaj ñaupajpi shayarishpa ushpata Moisés jahuata tsirapajpica, gentecunapipish, animalcunapipish carachayashpa chupu tucurca.

¹¹ Brujocunapish caishuj egipciocuna shinallataj carachayashpa chupuhuan cashcamantami Moisespaj ñaupajpica mana cai tucurcacuna.

¹² Mandaj Diosllataj faraonta rumi shunguta rurajpimi, Mandaj Dios Moisesman nishca shinallataj mana uyarca.

Runduhuan llaquichishcami

¹³ Mandaj Diosca Moisestaca: –Cayaca utcata jatarishpa, faraonpajman rishpa cashna ningui: “Mandaj Dios hebreocunapaj Diosca cashnami nin: Ñuca agllashcacunata ñucapajta ruranaman richun saqui.

¹⁴ Ñuca tucui llaquichinacunatami cambaj shungutapish, cambajta rurajcunapaj, can mandacun gentecunapaj shungutapish nanachichun cachasha. Tucui cai pachapi ñuca shinaca pi shujtaj mana tiyashcata can yachachunmi cachasha.

¹⁵ Ñucaca cantapish, can mandacun gentecunatapish llaquichingapaj ñuca maquita chutajpica ñami tucuicuna cai pachamanta illanguichijman.

¹⁶ Ñucaca imatapish rurai tucuj cashcata canpi ricuchishpa, tucui cai pachapi ñuca shuti huillashca cachunmi cantaca churarcani.

¹⁷ Chai jahuachu ñuca agllashcacuna richun mana saquishpa jarcangui.

¹⁸ Cunanca Egiptota callarichishca punllamanta cunan punllacama nunca mana urmashca llashaj rundutami caya cai horasllataj tamyachisha.

¹⁹ Canllaman cajcunataca animalcunatapish, tucui imalla charishcacunatapish, tucuita tandachichishpa ucuman yaicuchichij. Gentecuna cashpa, animalcuna cashpa canllaman saquirishpa mana huasi ucupi cajtaca rundu paipaj jahuapi urmajpi tucuicunami huañunga ninmi” ningui– nircami.

²⁰ Faraonpajta rurajcunaca Mandaj Dios rimashcata maijanlla manchajcunaca paicunapajta rurajcunatapish, animalcunatapishmi huasicunaman yaicuchircacuna.

²¹ Ashtahuanpish Mandaj Dios rimashcata paicunapaj shungupi mana crijcunaca paicunapajta rurajcunatapish, animalcunatapish canllaman saquircallacunami.

²² Mandaj Diosca Moisestaca: –Egipto llajtapi causaj gentecunapaj, animalcunapaj, tucui chagracuna jahuapi rundu urmachun cambaj maquita jahua pachaman chutai– nircami.

²³ Shina nijpi Moisés paipaj caspita jahua pachaman huichi chutajpica, Mandaj Diosca culun nishcahuanmi runduchirca. Ninaca cai pachataca achij nicurcami. Chashnami Mandaj Diosca Egiptopica runduta tamyachirca.

²⁴ Chai runduca ninahuan runduhuan chagrumi carca. Egiptopi causai callari pachamanta chashna runduca Egiptopica nunca mana tiyashcachu carca.

²⁵ Chai runduca Egipto llajtapica tucui canllaman cajcunataca gentecunata, animalcunatapish tucuicunatami huañuchirca. Tucui maipi tiyaj q'uihuacunatapish tucuitami ñutucurca. Chai llajtapi tiyaj yuracunatapish tucuitami ñuturca.

²⁶ Israelcuna causan Gosén llajtallapimi runduca mana urmarca.

²⁷ Chaimi faraonca Moisesta Aaronta cayanaman cachashpaca: –Cunantajca juchallishcanimi. Mandaj Diosca cashcata rurajmi. Ashtahuanpish ñucapish, ñuca mandacun gentecunamari Diosta mana manchajcuna cashcanchij.

²⁸ Taita Dios c'ulun nichicushcapish, runduchicushcapish pararichun Mandaj Diosta mañai. Cancuna richun saquishallami. Ña mana ashtahuan caipi charicushallachu– nirca.

²⁹ Shina nijpi Moisesca: –Cunantaj cai pueblomanta llujshishpa Mandaj Diospajman ñuca maquita chutajpica, culun nicuica pararingallami. Rundupish ña mana ashtahuan urmangachu. Cai pachayujca Mandaj Dios cashcata can yachachunmi chashna ruranga.

³⁰ Chashna rurajpipish canpish, cambajta rurajcunapish Mandaj Dios chashna ruracushcataca manaraj manchanguichijchu– nircami.

³¹ Linotapish, cebadatapish tucuimi ñuturca. Cebadaca ñami espiga carca. Linoca ñami sisa carca.

³² Ashtahuanpish trigota, centenotaca q'uipa tarpui cashcamanta mana ñuturcachu.

³³ Faraonpaj ñaupajmanta Moisés llujshishpa pueblomanta canllaman maquicunata Mandaj Diospajman chutajpica, culun nicushcapish, runducushcapish pararishpami Egipto llajtataca ña mana ashtahuan tamyarca.

³⁴ Tamyapish, rundupish culun nicuipish ña pararishcata ricushpami faraonca mana cacharisha nishpa cutinllataj juchallishpa paipish, paipajta rurajcunapish rumi shungu tucurcacuna.

³⁵ Mandaj Dios Moisesman nishca shinallatajmi, faraonca rumi shungu tucushpa israelcunataca mana cacharisha nirca.