ÉXODO 6 - Dios Rimashca Shimicunami

¹ Shina nijpi Mandaj Diosca Moisestaca: –Faraonta ñuca imata rurajtaca cunanmi ricungui. Ñuca maquihuan sinchita llaquichijpimi paipaj llajtamanta richun saquinga. Ñuca maquihuan sinchita llaquichijpimi pai quiquintaj richun saquinga– nircami.

Diosca Moisestaca cutinllataj faraonhuan rimachun cachashcami

² Taita Diosca Moiseshuan cutin rimashpaca: –ÑUCACA MANDAJ DIOSMI CANI.

³ Abrahamman, Isaacman, Jacobman ricurishpaca Ñucalla Tucuita Rurai Tucuj Dios cashcatami ricuchircani. Ashtahuanpish paicunamanca ñuca shuti, MANDAJ DIOS cashcataca mana huillarcanichu.

⁴ Carumanta shamujcuna shinalla asha punllacunacama paicuna causacushca Canaán llajtata cungapajmi shuj ruranata ari ninacurcani.

⁵ Cunanca israelcunataca cai Egiptopi causajcuna huatashcata shina paicunapajta trabajachicujpi paicuna aij nishcata uyashpami ñuca rurasha nishcataca cunan rurasha nini.

⁶ Chaimanta israelcunataca cashna ni: Ñucaca MANDAJ DIOSMI cani. Egiptocuna yallitaj sinchita trabajachicunmantaca ñucami llujshichisha. Huatashcata shina paicuna cancunata rurachicunmantaca paicuna ima shina cancunata llaquichishca shinallatajmi ñuca rigrata chutashpa paicunatapish llaquichishpa cancunataca cacharichisha.

⁷ Cancunaca ñuca agllashcacuna cachunmi llujshichisha. Ñucaca cancunapaj Diosmi casha. Chashna rurajpimi, Egiptopi yallitaj sinchi trabajocunapi trabajacunmanta llujshichimuj ñucaca Mandaj Diostaj cashcata, cancunapaj Taita Dios cashcata yachanguichij.

⁸ Abrahamman, Isaacman, Jacobman ñuca maquita alzashpa cai llajtataca cancunaman cushatajmi nishca llajtamanmi cancunataca yaicuchisha. Chai llajtataca ñucami cancunapaj quiquin llajta cachun cusha. Ñucaca MANDAJ DIOSTAJMI cani ninmi nigri– nircami.

⁹ Moisesca Dios ima shina nishca shinallatajmi israelcunamanca tucuita huillarca. Ashtahuanpish israelcunaca yallitaj sinchi trabajohuan cashpa, yallitaj llaquihuan cashcamantaca imata mana uyashun nircacunachu.

¹⁰ Chaimi Mandaj Diosca Moisestaca:

¹¹ –Egiptota jatun mandaj faraonpajman yaicushpa, cambaj llajtamanta israelcuna richun saqui nigri– nirca.

¹² Chaimi Moisesca, Mandaj Diostaca: –Israelcunapish mana uyancunachu, faraoncarin maitataj uyangari. Ñucaca rimangapajpish c'allu huataricujmari cani– nirca.

¹³ Chaimi Mandaj Diosca: –Israelcunata imallata nishpa, Egiptota jatun mandaj faraonta imallata nishpa israelcunata Egiptomanta llujshichichun Moisestapish Aarontapish– mandarca.

Moisespaj Aaronpaj ñaupa yayacunapaj shuticunami

¹⁴ Paicunapaj ñaupa yayacunamanta mirarishca quiquinpurallata mandajcunaca caicunami: Yaya Israelpaj punta churi Rubenpaj churicunaca: Hanoc, Falú, Hezrón, Carmi shuticunami carca. Rubén aillumantaca chaicunami carca.

¹⁵ Simeonpaj churicunaca: Jemuel, Jamín, Ohad, Jaquín, Zohar, Saúl shuticunami carca. Saulca cananea huarmipaj churimi carca. Simeonpaj ailluca chaicunami carca.

¹⁶ Levipaj churicunapaj huahua huahuacunaca caicunami: Gersón, Coat, Merari shuticunami. Levica 137 huatacunatami causarca.

¹⁷ Gersonpaj churicunaca paicunapaj familiacuna ima shina cashca shinallataj: Libni, Simei shuticunami carca.

¹⁸ Coatpaj churicunaca: Amram, Izhar, Hebrón, Uziel shuticunami carca. Coatca 133 huatacunatami causarca.

¹⁹ Meraripaj churicunaca: Mahli, Musi shuticunami carca. Levipaj huahua huahuacunamanta mirarishcacunaca tucui chaicunami carca.

²⁰ Amramca paipaj tía Jocabedtami paipaj huarmi cachun japirca. Jocabed huarmipaj huahuacunami Aaronpish, Moisespish carca. Amramca 137 huatacunatami causarca.

²¹ Izharpaj churicunaca: Coré, Nefeg, Zicri shuticunami carca.

²² Uzielpaj churicunaca: Misael, Elzafán, Sitri shuticunami carca.

²³ Aaronca Aminadabpaj ushushi Elisabettami paipaj huarmi cachun japirca. Elisabetca Naasonpaj panimi carca. Elisabetca Nadab, Abiú, Eleazar, Itamar shuti churicunatami huacharca.

²⁴ Corepaj churicunaca: Asir, Elcana, Abiasaf shuticunami carca. Corepaj huahua huahuacunaca tucui chaicunami carca.

²⁵ Aaronpaj churi Eleazarca, Futielpaj ushushicunapuramanta shuj ushushitami paipaj huarmi cachun japirca. Chai huarmimi Finees shuti churita huacharca. Tucui chai levitacunami paicunapaj quiquin ñaupa yayacunapaj huahua huahua huasi ucupuracunata mandajcuna carca.

²⁶ Aaronpish, Moisespish tucui chai huahua huahuacunapurallatajmi carcacuna. Paicunatami Mandaj Diosca: “Cancunami Egipto llajtamantaca israelcunataca soldadocunata shina mirga mirgata ch'icanchishpa llujshichinguichij” nircami.

²⁷ Chai Moisesmi, chai Aaronmi Egipto llajtamanta israelcunata llujshichingapajca, chai llajtata jatun mandaj faraonhuan rimarcacuna.

Diosca Moisestapish Aarontapish ashtahuan mandashcami

²⁸ Mandaj Dios Egipto llajtapi Moisesta rimashpaca:

²⁹ –Ñucaca MANDAJ DIOSMI cani. Ñuca tucui imallata canman nishcata Egipto llajtata jatun mandaj faraonman huillagri– nircami.

³⁰ Shina nijpimi Moisesca: –Mandaj Dioslla, ñucaca rimangapajca c'allu huataricujmari cani. ¿Maitataj faraonca ñucataca uyahuangari?– nirca.