ÉXODO 40 - Dios Rimashca Shimicunami

Diospaj carpa huasita Moisés shayachishcami

¹ Tucui chaicunata ña rurashpa tucuchishca q'uipami, Mandaj Diosca Moisestaca:

² “Mandaj Dioshuan tupanacuna chai carpa huasitaca huata callari punta quillapaj punta punllami shayachina cangui.

³ Dioshuan ari ninacushca quillcata huaquichina arcata chai ucupi churashpa chai ucutaca linsohuan jarcachingui.

⁴ Mezatapish yaicuchishpa, sumajta allichishpa churangui. Candelerotapish yaicuchishpa lamparacunapi ninata japichishpa churangui.

⁵ Inciensota rupachina curi altartaca, Dioshuan ari ninacushca quillcata huaquichina arca ñaupajpi churangui. Diospaj carpa huasiman yaicuna pungupica cortinata churangui.

⁶ Diosman cushpa tucui rupachina altartaca, Dioshuan tupangapaj carpa huasiman yaicuna pungu ñaupajpi churangui.

⁷ Dioshuan tupanacuna carpa huasihuan, altarhuan chaupipi tanqueta churashpa yacuta jundachingui.

⁸ Diospaj carpa huasi canlla muyundijta caspicunata shayachishpa cortinahuan jarcachingui. Chai huasi canllaman yaicuna pungupipish cortinahuan jarcachingui.

⁹ Diospajlla ch'icanchina aceiteta japishpa Diospaj carpa huasitapish, chaipi tucui imalla cajtapish, chai huasipi imallata ruranacunandij chai aceitehuan Diospajlla cachun ch'icanchingui. Chashnami ñucapajllata ruranapaj canga.

¹⁰ Diosman cushpa tucui rupachina altartapish, chaipi tucui imallata ruranacunatapish Diospajlla cachun ch'icanchina aceitehuan Diospajllata rurangui. Chashna rurajpimi chaicunaca ñucapajllata ruranapaj canga.

¹¹ Tanquetapish, tanqueta tiyachina basatapish Diospajlla cachun ch'icanchina aceitehuan Diospajlla cachun ch'icanchingui.

¹² Aarontapish, paipaj churicunatapish Dioshuan tupanacuna carpa huasi punguman pushashpa armachingui.

¹³ Ñucapajta rurangapaj churarina churanata Aaronman churachishpa, paitaca ñucapajlla cachun ch'icanchina aceitehuan ñucapajllata ruraj cura cachun ch'icanchingui.

¹⁴ Chai q'uipaca, paipaj churicunatapish c'uchuyachishpa túnica churanacunata churachingui.

¹⁵ Paicunatapish paicunapaj yayata ima shinami Diospajlla ch'icanchina aceitehuan ch'icanchircangui chai shinallataj Diospajlla cachun ch'icanchina aceitehuan paicunatapish ch'icanchijpimi, Diospajllata ruraj curacuna canga. Chai aceitehuan paicunata Diospajlla cachun ch'icanchishcaca paicunapaj huahua huahuacunapish huashan huashan curacuna canapajmi” nircami.

¹⁶ Moisesca Mandaj Dios mandashca shinatajmi tucuita rurarca.

¹⁷ Cati huatapaj punta quillapaj punta punllapimi, Diospaj carpa huasitaca shayachirca.

¹⁸ Moisesca Mandaj Diospaj carpa huasitaca cashnami shayachirca: Basacunapi tablacunata alli satichishpa, tablacunatapish ch'imbapura alli canichishpa, quinriman churana suni caspicunatapish quinriman churashpami chashna rurashcataca jatarichishpa shayachirca.

¹⁹ Chashna shayachishpaca, chai jahuataca carpahuanmi c'atarca. Chai carpa jahuatapish shujtaj c'atahuanmi c'atarca. Moisesca, Mandaj Dios mandashca shinatajmi rurarca.

²⁰ Dioshuan ari ninacushca quillcataca arca ucupimi churarca. Chai arcata apana suni caspicunatapishmi arca argollacunapi churachirca. Arca jahuapica propiciatoriotami churarca.

²¹ Chai arcataca Diospaj carpa huasi ucuman yaicuchishpami, chai huasi ucutaca shuj ladomanta caishuj ladocama linsota huarcushpa churarca. Chashna rurajpimi Mandaj Dios Moisesta mandashca shinallataj Dioshuan ari ninacushca quillcata huaquichina arcaca pacashca saquirirca.

²² Mezataca Dioshuan tupanacuna carpa huasi ucupimi churarca. Chaitaca Diospajlla ch'icanchishca ucuta jarcachishca linso ñaupajpimi janaj lado c'uchupi churarca.

²³ Chai meza jahuapica Mandaj Dios Moisesta mandashca shinallatajmi, Mandaj Diospaj ñaupajpi churana tandataca, ima shina churana cashca shina churarca.

²⁴ Candelerotaca, Dioshuan tupanacuna carpa huasi ucupi Diospajlla ch'icanchishca ucuta jarcachishca linso ñaupajpimi, ura ladoman churarca. Chaica mezahuan ch'imbapurami carca.

²⁵ Mandaj Dios mandashca shinallatajmi Moisesca, Mandaj Diospaj ñaupajpi caj lamparacunapica ninata japichirca.

²⁶ Curi altartaca Dioshuan tupanacuna carpa huasi ucupi, Diospajlla ch'icanyachishca ucuta jarcachishca linso ñaupajpimi churarca.

²⁷ Mandaj Dios mandashca shinallatajmi, Moisesca chai altarpica mishquijllata ashnaj inciensota rupachirca.

²⁸ Diospaj carpa huasiman yaicuna pungupipish cortinatami churarca.

²⁹ Diosman cushpa tucui rupachina altartaca Dioshuan tupanacuna carpa huasi ñaupajpimi churarca. Chai altarpimi Mandaj Dios Moisesta mandashca shinallataj Diosman cushpa tucui rupachinatapish, Diosman cuna cashcatapish cushpa rupachirca.

³⁰ Tanquetaca, Dioshuan tupanacuna carpa huasihuan, altarhuan chaupipi churashpami, maillarinapaj yacuta jundachirca.

³¹ Moisespish, Aaronpish, Aaronpaj churicunapish chai yacuhuanmi maquicunata, chaquicunata maillarijcuna carca.

³² Mandaj Dios Moisesta mandashca shinallatajmi Dioshuan tupanacuna carpa huasiman yaicushpapish, altarman c'uchuyashpapish maillarijcuna carca.

³³ Diospaj carpa huasi canlla muyundijta, altar patio muyundijta cortinacunata muyundijta churashpaca chai huasi canllaman yaicuna pungupica cortinatami churarca. Moisesca tucuita rurashpami tucuchirca.

Diospaj carpa huasi jahuapi p'uyu cashcami

³⁴ Dioshuan tupanacuna carpa huasitaca p'uyumi taparca. Diospaj carpa huasipica, Mandaj Diospaj achij nicujmi jundarca.

³⁵ Dioshuan tupanacuna carpa huasitaca p'uyu tupashca, chai ucupipish Mandaj Diospaj achij nicuj junda cashcamantami Moisesca mana yaicui tucurca.

³⁶ Diospaj carpa huasi jahuamanta p'uyu ña huichi rijpimi, israelcunaca tucuicuna puri callarijcuna carca.

³⁷ Chai p'uyu mana huichi rijpica, israelcunaca chai p'uyu huichi ringacama mana puri callarijcunachu carca.

³⁸ Mandaj Diospaj carpa huasi jahuapica, punllaca Mandaj Diospaj p'uyumi caj carca. Tutaca Mandaj Diospaj ninami caj carca. Tucui israelcuna ricucuitami chashna caj carca. Israelcunataca tucui paicuna purinapimi chashna pushamurca.