ÉXODO 38 - Dios Rimashca Shimicunami

Bronce altarta rurashcami

¹ Cushpa tucuita rupachina altartapish, acacia caspillatatajmi rurarca. Chai altarca sunimanca ishqui metro ishqui chunga pichca centímetro, anchomanpish ishqui metro ishqui chunga pichca centimetrollatajmi carca. Chuscundij ladomi chai medidallataj carca. Altomanca shuj metro chunga pichca centimetromi carca.

² Altarpaj chuscu esquinacunapica, gachucunatami rurarca. Chai gachucunataca chuscutataj altarhuan shuj shinallata rurashpami chai altartaca tucuita broncehuan churarca.

³ Chai altarpi imallata ruranapaj cajcunataca: Mangacunatapish, tenazacunatapish, tasacunatapish, garfio nishca quimsa puntayujcunatapish, palacunatapish chaipi tucui imalla ruranacunatapish broncemantami rurarca.

⁴ Chai altarpi churanapajca, broncemanta shuj parrillata rurashpami, altar cajón chaupicama uriman cacharishpa churangapaj rurarca.

⁵ Shinallataj bronce parrilla chuscundij ladopimi bronce suni caspicunata churachingapaj chuscu argollacunata rurarca.

⁶ Acacia suni caspicunatapish rurashpami broncehuan llihuirca.

⁷ Chai suni caspicunataca altarta maimanpish apangapajmi, altar esquinacunapi churashca argollacunapi churachirca. Chai altarca tablacunamanta rurashcami carca. Ucu siquimanca tablacunata mana churashcami carca.

Bronce pailata rurashcami

⁸ Maillarinapaj yacuta churana tanquetapish chai tanqueta tiyachina basatapish broncemantami rurarca. Diospaj carpa huasi pungupi Diospajta ruraj huarmicunapaj bronce espejocunamantami chaicunataca rurarca.

Diospaj carpa huasi muyundij patiota rurashcami

⁹ Diospaj carpa huasi muyundij patiotapish rurarcami. Ura ladota huarcuna cortinataca lino puchcata caupushcatami chuscu chunga pichca metrota rurarca.

¹⁰ Chai cortinata huarcunapajca ishqui chunga pilarcunata, chai pilarcunata shayachina ishqui chunga basacunatami broncemanta rurarca. Pilarpaj capitelcunapish, molduracunapish cullquimanta rurashcami carca.

¹¹ Janaj lado quinripi churangapajpish chuscu chunga pichca metro cortinatami rurarca. Chai cortinata churanapajca ishqui chunga pilarcunata, chai pilarcunata shayachina ishqui chunga basacunatami broncemanta rurarca. Pilarpaj capitelcunapish, molduracunapish cullquimanta rurashcami carca.

¹² Inti huashicun ladoman churanapajpish ishqui chunga ishqui metro pichca chunga centímetro cortinami carca. Chai cortinata churanapajpish chunga pilarcuna, chai pilarcunata shayachinapajpish chunga basacunami carca. Pilarpaj capitelcunapish, molduracunapish cullquimanta rurashcami carca.

¹³ Inti llujshin ladopajpish, ishqui chunga ishqui metro pichca chunga centímetro cortinami carca.

¹⁴ Huasi canllaman yaicuna ladopaj chulla lado cortinaca sujta metro canchis chunga pichca centimetromi carca. Chai cortinata churanapajca quimsa pilarcuna, chai pilarcunata shayachina quimsa basacunami carca.

¹⁵ Huasi canllaman yaicuna pungu caishuj ladoman caj cortinacunapish sujta metro canchis chunga pichca centímetrollatajmi carca. Chai cortinacunata churanapajpish quimsa pilarcuna, chai pilarcunata shayachinapajpish quimsa basacunami carca.

¹⁶ Diospaj huasi canlla muyundijta churashca cortinacunaca linota caupushpa ahuashcami carca.

¹⁷ Pilarcunata shayachina basacunaca broncemi carca. Pilarcunapaj capitelcunapish, molduracunapish, cullquimanta rurashcami carca. Pilarcuna umataca cullquihuan llihuishcami carca. Diospaj huasi canlla muyundij pilarcunapaj molduracunaca tucuicunami cullquimanta carca.

¹⁸ Diospaj carpa huasi canllaman yaicuna punguta jarcachina cortinaca, azul millma, morado millma, amsa puca millmahuan, linota caupushcahuan sumajta bordashcacunayujta ahuanata yachaj ahuashcami carca. Chai cortinacunaca Diospaj carpa huasi canlla muyundij cortinacuna shinallatajmi sunimanca iscun metrota, altomanca ishqui metro ishqui chunga pichca centimetrota charirca.

¹⁹ Chai cortinacunata churanapajca chuscu pilarcuna, chai pilarcunata shayachinapaj chuscu basacunapish broncemi carca. Chai pilarcunapaj capitelcunapish cullquimanta rurashcami carca. Capitelcunatapish, molduracunatapish cullquihuan llihuishcami carca.

²⁰ Diospaj carpa huasi muyundijta charichina ishtacacunapish, Diospaj carpa huasi canlla muyundij pilarcunata charichina ishtacacunapish broncemi carca.

Diospaj carpa huasita imallahuan rurashcami

²¹ Diospaj carpa huasitapish, Dioshuan ari ninacushca quillcata huaquichina carpa huasitapish imallahuan rurashcata yupashcami. Chaitaca Aarón curapaj churi Itamarta Moisés mandajpimi, Itamarca levitacunata mandajpi paicunaca imalla yaicushcata yuparcacuna.

²² Uripaj churi Bezaleelca Mandaj Dios Moisesta ima shinalla rurachun nishca shinallatajmi rurarca. Paica Judá aillumanta caj Hurpaj nietomi carca.

²³ Bezaleelhuanca Dan aillupuramanta caj Ahisamacpaj churi Aholiabmi carca. Aholiabca azul millmata, morado millmata, amsa puca millmata puchcashcahuan, ashtahuan alli linota caupushcahuan sumajta bordashcacunayujta ahuanata yachajmi carca.

Diospajlla huasita imallahuan rurashcami

²⁴ Diospaj carpa huasita ruranapaj cushca curihuanca imallata curihuan rurana cashcata curihuan rurashcata yupajpica, tucuimantaca ishqui chunga iscun talento, 730 siclomi carca. Chaica Diospaj carpa huasipi tiyaj cullquita pezanapi pezashcami carca.

²⁵ Israelcunata yupashpa quillcashpa japishca cullquica patsaj talento, 1.775 siclomi carca. Chaica Diospaj carpa huasipi tiyaj cullquita pezanapi pezashcami carca.

²⁶ Israelcunataca ishqui chunga huatayujmanta huichiman charijcunata quillcashpa yupajpica, 603.550 gentecunami carca. Paicunaca cada quiquinmi chaupi siclota curcacuna. Chaica Diospaj carpa huasipi tiyaj cullquita pezanapi pezashcami carca.

²⁷ Diospaj carpa huasi pilarcunata shayachina basacunatapish, huasi canlla muyundijta jarcachinapaj shayachina pilarcunapajpish patsaj talento cullquihuanmi basacunata rurarca. Tucui chai cullquitaca patsaj basacunatami rurarca. Cada basapimi, shuj talento cullqui yaicurca.

²⁸ Pilarcunapaj capitelcunataca 1.775 siclo cullquihuanmi rurarca. Chai cullquihuan llihuishpami chai capitelcunataca pilarhuan shujllata rurarca.

²⁹ Diosman cushca bronceca canchis chunga talento, 2.400 siclomi carca.

³⁰ Chai broncehuanca Dioshuan tupanacuna carpa huasipaj punguta shayachina basacunata, bronce altarta, bronce parrillata, chai altarpi tucui imallata ruranapaj cajcunata,

³¹ Diospaj carpa huasi canlla muyundijpi pilarcunata shayachina basacunata, Diospaj carpa huasi canllaman yaicuna punguta shayachina basacunata, Diospaj carpa huasita charichina ishtacacunata, Diospaj huasi canlla muyundij pilarcunata charichina ishtacunatapishmi rurarca.