ÉXODO 36 - Dios Rimashca Shimicunami

¹ “Chaimanta yachaisapa, yuyaisapa cachun churashcacunaca Bazaleelpish, Aholiabpish tucui shujtajcunapish Mandaj Dios yachaisapa shunguta churashcacunaca Mandaj Diospajta rurangapaj Mandaj Diospaj huasita tucui ima shujtajcunata rurachunmi chashna churashca. Paicunami Mandaj Dios tucui imallata rurachun nishpa mandashcataca rurangacuna” nircami.

Israelcuna Diosman mana mitsashpa yallitaj cujpi Moisesca chailla apamuichij nishcami

² Moisesca Bezaleeltapish, Aholiabtapish, yachaisapa shunguyujcunataca tucui shujtajcunatapishmi cayarca. Chaimi Mandaj Dios yachaisapa shunguta churashcacunaca Diosllataj shamuna yuyaita cujpi tucuicuna chai trabajota rurangapaj shamurcacuna.

³ Paicunaca Mandaj Diospajta rurangapaj Mandaj Diospaj huasita tucui ima shujtajcunata chaipi ruranapajpish israelcuna Mandaj Diosman cungapaj apamushcacunatami Moisespaj maquimanta japircacuna. Israelcunaca paicuna cuna munaita charishcamantaca cada tutamantami Mandaj Diosman cungapajca apamucurcallacuna.

⁴ Chaimantami Mandaj Diospaj huasita ruracujcunaca paicuna imallapi ruracushcata saquishpa,

⁵ Moisespajman rishpaca: “Mandaj Dios imallata rurachun nishpa mandashca shina ruranapajca, israelcunaca ñamari yallijta apamuncuna” nishpa huillarcacuna.

⁶ Chaimi Moisesca: “Tucui israelcunallamantaj c'aricuna cashpa, huarmicuna cashpapish Diospaj huasita rurangapaj apamungapaj imalla ruracushcataca ña ama ashtahuan ruraichijchu” nishpa huasinta huillachirca. Chashnami Moisesca Diosman ama ashtahuan cuchun israelcunataca jarcarca.

⁷ Tucui imallata rurana cashcacunapajca tucui imapish yallitaj achca cashcamanta ña tucuita tucuchijpipish puchurcarajmi.

Diospaj carpa huasita ima shina rurashcami

⁸ Imatapish ruranata yachajcunapuramanta ashtahuan alli yachajcunami Diospaj carpa huasitaca rurarcacuna. Paicunaca lino puchcata caupushcahuan, azul, morado, amsa puca millmata puchcashcahuanmi chunga cortinacunata querubincunayujta bordashcata ahuarca.

⁹ Chai cortinacunaca cada shujmi sunimanca chunga ishqui metro sujta chunga centímetro, anchomanca shuj metro pusaj chunga centímetro carca. Cortinacunaca tucuicuna chai medidallatatajmi charirca.

¹⁰ Pichca cortinacunataca caishujhuan chaishujhuan tupachishpa sirashpa shujllatami rurarcacuna. Caishuj pichca cortinacunatapish caishujhuan chaishujhuan tupachishpa sirashpa shujllatami rurarcacuna.

¹¹ Ña chashna rurashpaca, punta pichca cortinacunata tandachishca jatun cortinapaj filopica, morado puchcahuanmi rinrincunata rurarcacuna. Caishuj pichca cortinacunata tandachishpa sirashca tucuri filopipish chashnallatajmi rinrincunata rurarcacuna.

¹² Punta pichca mirga cortinacunata tupachishpa sirashca jatun cortina filopica chunga pichca rinrincunatami rurarcacuna. Caishuj pichca cortinacunata tupachishpa sirashca jatun cortina filopipish pichca chunga rinrincunatami rurarcacuna. Chai rinrincunaca ishquindij cortinacunata sirashpa shujllata rurangapaj ishquindijpitaj ch'imbapura rurashcami carca.

¹³ Pichca chunga curi ganchocunatapish rurashpami, chai ganchocunapica shuj jatun cortinapi churashca rinrincunata churachishpa caishuj jatun cortinahuan ch'imbapurashpa shujllata rurarcacuna. Chashnami Diospaj carpa huasica shuj linsollahuan rurashca shina saquirca.

¹⁴ Diospaj carpa huasi jahuata c'atanapajca chivo millmata ahuashpa chunga shuj mirga linsocunatami rurarcacuna.

¹⁵ Chai mirga linsocunaca sunimanca chunga quimsa metro pichca chunga centímetro, anchomanca shuj metro pusaj chunga centimetromi carca. Chai chunga shuj mirga linsocunaca tucuicunami chai medidallataj carca.

¹⁶ Pichca mirga linsocunataca mirachishpa sirashpami, shujllata rurarcacuna. Caishuj sujta mirga linsocunatapish mirachishpa sirashpami shujllata rurarcacuna.

¹⁷ Chai ishqui jatun linsocunata ch'imbapurashpa churana filocunapica ishquindijpitajmi pichca chunga rinrincunata rurarcacuna.

¹⁸ Chai linsocunata ishquindijta ch'imbapurashpa sirangapajca pichca chunga bronce ganchocunatami rurarcacuna. Ishquindijtaj shujlla tucushpa saquirichunmi chashna rurarcacuna.

¹⁹ Chai jahuata c'atanapajca carnero caracunatami pucajllata tinircacuna. Cutin chai jahuata c'atanapajpish tejoncunapaj caratami rurarcacuna.

²⁰ Diospaj carpa huasipajca acacia caspimanta derecho tablacunatami rurarcacuna.

²¹ Chai tablacunaca sunimanca chuscu metro pichca chunga centímetro, anchomanca sujta chunga canchis chaupi centímetromi carca.

²² Chai tablacunata alli canichishpa churanapajca cada tablami ishqui espigacunata charirca. Diospaj carpa huasipaj tucui tablacunallatatajmi chashna rurarcacuna.

²³ Diospaj carpa huasipaj tablacunata rurashpaca ura ladoman churanapajca ishqui chunga tablacunatami rurarcacuna.

²⁴ Chai tablacunata shayachinapajca cullquimantami chuscu chunga basacunata rurarcacuna. Chai tablacunaca ishqui espigacunata charishcamantami cada tabla ishqui basacunapi shayarina carca.

²⁵ Diospaj carpa huasi janaj ladoman churanapajpish ishqui chunga tablacunatami rurarcacuna.

²⁶ Chai tablacunata churanapajca cullquimantami chuscu chunga basacunata rurarcacuna. Cada tablacunata shayachinapajmi ishqui basacuna carca.

²⁷ Diospaj carpa huasipi inti huashicun ladopi churanapajca sujta tablacunatami rurarcacuna.

²⁸ Diospaj carpa huasi esquinacunapi churanapajca ishqui ladopajmi ishqui tablacunata rurarcacuna.

²⁹ Chai tablacunaca chaquimanpish espiga, jahuamanpish espigacunayujta rurashca jahuamanpish ucumanpish espigacunata churachishcami carca. Ishquindij esquinapimi chashna churashca carca.

³⁰ Chai ishqui tablacunahuanca huasha ladopajca, pusaj tablacunami carca. Chaicunata shayachinapajca cullquimanta rurashca chunga sujta basacunami carca. Chai tablacunaca cada tablacunami ishqui basacunapi shayarina carca.

³¹ Diospaj carpa huasipi shuj ladoman churashca tablacunapi quinriman churanapajca pichca suni caspicunatami acacia caspillamantataj rurarca.

³² Diospaj carpa huasipi caishuj ladoman churashca tablacunapi quinriman churanapajpish pichca suni caspicunatami rurarca. Diospaj carpa huasipi inti huashicun ladoman churashca tablacunapi quinriman churanapajpish pichca suni caspicunatami rurarca.

³³ Ishqui ladoman caj tablacuna quinripi churana pichca caspicunamanta shujca shujllataj shuj ladomanta caishuj ladoman pasajta churangapajmi rurarcacuna. Chai caspitaca chaupi quinripimi churarcacuna.

³⁴ Chai tablacunataca curihuanmi llihuircacuna. Quinriman churana suni caspicunata churachingapajpish curi argollacunatami rurarca. Quinriman churana suni caspicunatapish curihuanmi llihuircacuna.

³⁵ Chai jarcachinataca azul millmahuan, morado millmahuan, amsa puca millmahuan, caupushca linohuanmi rurarca. Chaitaca querubincunayujta bordashpami ahuarca.

³⁶ Chai linsota huarcunapajca acacia caspimanta chuscu pilarcunata rurashpami jahuata curihuan llihuirca. Chai pilarcuna jahuapi churana capitelcunapish curimi carca. Chai pilarcunata shayachinapajpish cullqui basacunatami chuscuta rurarca.

³⁷ Diospaj carpa huasi pungupaj linsotapish azul, morado, amsa puca, linota caupushca puchcahuan sumajta bordashpa ahuaj ahuashcami carca.

³⁸ Chaita huarcuna pichca pilarcunandij, pilarcuna jahuapi churana capitelcunandijmi rurarca. Capitelcunatapish, molduracunatapish curihuanmi llihuirca. Chai pilarcunapajpish bronce basacunatami pichcata rurarca.