ÉXODO 35 - Dios Rimashca Shimicunami

Samana punllapi imata ama rurachun mandashcami

¹ Moisesca tucui israelcunata tandachishpami, cashna nirca: “Mandaj Dios imallata rurachun nishpa mandashcacunaca caicunami:

² Sujta punllacunallatami trabajana. Canchis punllapica, Mandaj Diospajlla ch'icanchishca samana punllami. Maijanpish chai punllapi ima trabajota rurajca huañungami.

³ Samana punllapica ni mai huasicunapi, ninallatapish ama japichinguichijchu ninmi” nircami.

Diospaj carpa huasita ruranapaj imallata tandachinami

⁴ Moisesca tandanacushca tucui israelcunataca cashnami nirca: “Caimi Mandaj Dios mandashcaca:

⁵ Cancunapurapi Mandaj Diosman cuna cashcata tandachichij. Mandaj Diosman shungumanta cuna munaihuan cajcunaca: Curita, cullquita, bronceta,

⁶ azul millmata, morado millmata, amsa puca millmata, ashtahuan alli linota, chivo millmata,

⁷ carnero carata pucajllata tinishcata, tejoncunapaj caracunata, acacia caspita,

⁸ lamparapi churashpa rupachina aceiteta, imata Diospajlla ch'icanyachina aceiteta rurangapajpish, mishquijllata ashnaj inciensota rurangapajpish chagruna jambicunata apamuchun.

⁹ Efodpi, pectoralpi churanapaj ónice rumicunatapish, shujtaj sumaj rumicunatapish apamuchun ninmi nircami.

Diospaj carpa huasitapish chaipi imalla charinacunatapish rurachun mandashcami

¹⁰ Cancunapurapi imatapish shungumanta ruranata yachajcuna shamushpami Mandaj Dios rurachun nishca caicunata rurangacuna:

¹¹ Diospaj carpa huasita, chai ucupi caj ch'icanchishca ucuta, chai huasipaj c'atata, chai c'atata charichina ganchocunata, chai huasipaj tablacunata, quinriman churana caspicunata, chai huasipaj pilarcunata, chai pilarcunata shayachina basacunata,

¹² Dioshuan ari ninacushca quillcata huaquichina arcata, huanduna caspicunata, chai arcapaj propiciatoriota, ch'icanchishca ucupaj cortinacunata,

¹³ mezata, huanduna caspicunata, chaipi imallata ruranapaj cajcunata, Mandaj Diospaj ñaupajpi churana tandata,

¹⁴ achijyachij candelerota, chaipi imallata ruranapaj cajcunata, lamparacunata, achijyachichun lamparacunapi churana aceiteta,

¹⁵ inciensota rupachina altarta, huanduna caspicunata, Diospajlla cachun ch'icanchina aceiteta, mishquijllata ashnaj inciensota, Diospaj carpa huasiman yaicuna pungupi churana cortinata,

¹⁶ Diosman cushpa tucui rupachinapaj altarta, altarpi churana bronce parrillacunata, huanduna caspicunata, chaipi imallata ruranapaj cajcunata, tanqueta, chai tanqueta tiyachina basata,

¹⁷ Diospaj carpa huasi canlla muyundij cortinacunata, chaipi churana pilarcunata, chai pilarcunata shayachina basacunata, Diospaj carpa huasi canllaman yaicuna pungu cortinata,

¹⁸ Diospaj carpa huasita charichina ishtacacunata, Diospaj carpa huasi canlla muyundij pilarcunata charichina ishtacacunata, huascacunata,

¹⁹ Diospajlla caj ucupi Diospajta ruracushpa churarina churanacunata, Mandaj Diospajlla caj Aarón cura churarina churanacunata, paipaj churicuna cura tucushpa Diospajta rurangapaj churarina churanacunatapish ruranguichij ninmi” nircami.

Diospajta ruranapaj Israelcuna imallata cushcami

²⁰ Moisés chashna nijpica tandanacushca tucui israelcunaca paipaj ñaupajmanta llujshishpa rircallacunami.

²¹ Chai huillashca paicunapaj shungupi yuyachijpimi, tucuicuna paicunapaj espiritupi cuna munaita charishca shina, Mandaj Dioshuan tupanacuna carpa huasita rurangapajpish, chaipi imallata rurangapajpish, chaipi Diospajta rurajcuna churarinacunata rurangapajpish cungapaj apamurcacuna.

²² C'aricunapish, huarmicunapish cuna munaita shungupi charijcunaca cadenacunata, zarcillocunata, sortijascunata, brazaletecunata, tucui laya curi charinacunata, Diosman cuna cashcata Mandaj Diosman cungapajca tucuitami curimanta apamurcacuna.

²³ Azul millmata, morado millmata, amsa puca millmata, ashtahuan alli linota, chivo millmata, carnero carata pucajllata tinishcata, tejoncunapaj caracunata tucui chaicunata charijcunaca tucuicunami apamurcacuna.

²⁴ Mandaj Diosman cusha nijcunaca tucuicunami cullquita charijcunaca cullquita, bronceta charijcunaca bronceta Mandaj Diosman cushun nishpa apamurcacuna. Acacia caspita charijcunaca imatapish caspihuan Diospajta ruranapaj cajcunapajca chaicunatami curcacuna.

²⁵ Shungumanta imatapish ruranata yachaj huarmicunapish tucuicunami azul millmata, morado millmata, amsa puca millmata, ashtahuan alli linota paicunapaj quiquin maquihuan puchcashpa apamurcacuna.

²⁶ Imatapish quiquin yuyaimanta jahualla ruraj huarmicunapish chivo millmata puchcashpami apamurcacuna.

²⁷ Mandajcunaca Efodpi, pectoralpi churanapaj ónice rumicunatapish, shujtaj sumaj rumicunatapishmi apamurcacuna.

²⁸ Mishquijllata ashnacujcunata, lamparapi churashpa rupachina aceiteta, imata Diospajlla ch'icanyachina aceiteta rurangapajpish, mishquijllata ashnaj inciensota rurangapajpish chagruna jambicunatami apamurcacuna.

²⁹ Israelcunaca Mandaj Dios paipaj imallata ruranapaj Moisesman huillachishca shinallatajmi, Mandaj Diospajta ruranapaj cuna munaita charijcunaca c'aricuna cashpa, huarmicuna cashpa shungumantataj Diosman cungapaj apamurcacuna.

Mandaj Diosca Bezaleelta, Aholiabta imapipish paipaj ruranacunapi ruraj cachun cayashcami

³⁰ Moisesca israelcunataca: Riquichij Mandaj Diosca Judá aillupuramanta Hurpaj nieto, Uripaj churi Bezaleelta cayashpami,

³¹ paipica yachaisapa, yuyaisapa, imatapish yachaj, tucui ima ruranatapish yachaj cachun Diosca paipaj Espirituta jundachishca.

³² Chai yachaihuanca paica curihuan, cullquihuan, broncehuan pipish manaraj rurashcata yuyarishpa imatapish rurajlla cachunmi chashna churashca.

³³ Rumicunapipish sumaj ricunacunata ruraj cachun, caspicunapipish sumaj ricunacunata ruraj cachun, tucui imatapish pipish manaraj yuyarishcata ruraj cachunmi Taita Diosca chashna churashca.

³⁴ Paipica yachachi tucuipaj cana shungutapishmi churashca. Dan aillumanta caj Ahisamacpaj churi Aholiabmanpish chashnallatajmi churashca.

³⁵ Paicunamanca imatapish pipish manaraj rurashca sumajcunata ruraj cachunmi yachaita jundachishca. Azul millmahuan, morado millmahuan, amsa puca millmahuan, ashtahuan alli lino puchcahuan sumaj ricunacunayujta telarpi ahuaj cachunmi chashna churashca. Tucui imatapish pipish manaraj rurashca sumaj ricunacunayujta rurachunmi chashna churashca.