ÉXODO 34 - Dios Rimashca Shimicunami

Mandashcacunata shujtaj rumicunapi cutin quillcashcami

¹ Mandaj Diosca Moisestaca: –Ñaupaman caj shinallatataj ishqui tablajlla rumicunata llambujllata rurai. Can p'aquishca puntaman caj rumicunapi quillcashca shimicunallatataj chaipipish quillcangapaj.

² Caya tutamantapaj allichirishpa, caya tutamantaca utca Sinaí urcuman huichiyashpa chai urcu puntapi ñuca ñaupajpi ricuringui.

³ Chaimanca pi ama canhuan huichiyachun. Chai urcupica maipi pi ama ricurichun. Chai urcu ñaupajpica ovejacunatapish, huagracunatapish ama michichun– nircami.

⁴ Moisesca ishqui rumicunata ñaupaman cashcata shinallataj llambujllata rurashpami, Mandaj Dios nishca shinallataj cayandij tutamantaca utcata chai ishqui rumicunata apashpa Sinaí urcuman huichiyarca.

⁵ Mandaj Diosca p'uyupi uriyamushpami Moisespaj ladopi saquirirca. Chaipimi paipaj shutica Mandaj Dios cashcata huillarca.

⁶ Mandaj Diosca Moisespaj ñaupajta pasacushpaca cashnami nirca: –Mandaj Dios, Mandaj Dios. Tucuita rurai tucuj Dios, llaquij, c'uyaj shungu, mana utca p'iñarij, yallitaj llaquij, mana llullaj Diosmi cani.

⁷ Huaranga huaranga huahua huahuacunacama llaquicujllami cani. Millaita rurashcata, c'ariyashcata, juchallishcata perdonajmi cani. Yallitaj millaitaca imata mana rurashcata shinaca manataj saquishachu. Ashtahuanpish paicunapaj yaya mamamantaca quimsa huahua huahuacunacama, mana cashpaca chuscu huahua huahuacunacamami llaquichisha– nircami.

⁸ Chashna nincami Moisesca pambaman tupajta cumurishpa Mandaj Diosta adorashpaca,

⁹ cashna nirca: –Jatun Dioslla, quiquinpaj ñaupajpi ñuca allitaj ricurishca cajpica cunanca Jatun Dioslla ñucanchijhuan jacupai. Cai israelcunaca rumi shungucunami. Shina cajpipish ñucanchij millaita rurashcacunata, ñucanchij juchacunata perdonashpa cambaj huahuacunata rurahuai– nircami.

Rurashcalla dioscunata adoraj Canaán llajtapi causajcunahuanca imata ruranapi ama ari ninacunguichij nishcami

¹⁰ Mandaj Diosca Moisestaca: “Riqui tucui israelcunapaj ñaupajpimi shuj ari ninacushcata ruragrini. Tucui cai pachapi maipi mana rurashca mancharinacunatami ruragrini. Can causacun llajtapi Mandaj Dios rurashcataca mai llajtapi mana rurashcatami tucuicuna ricungacuna. Ñuca canhuan rurashcaca yallitaj mancharina cajpimi chashna canga.

¹¹ Cunan ñuca mandashcacunata can huaquichijpica ñucapish amorreocunata, cananeocunata, heteocunata, ferezeocunata, heveocunata, jebuseocunataca cambaj ñaupajmanta anchuchishami.

¹² Cancuna maipi yaicugrin llajtaman ña yaicushpaca, chai llajtapi causajcuna cancunapaj churarishpa urmana ama cachun paicunahuan imapi tandalla ruranata pajta ari ninacunguichijman.

¹³ Paicunapaj altarcunataca urmachinguichij. Paicunapaj rurashcalla dioscunatapish p'aquinguichij. Asera diosman rijchajcunatapish p'itinguichij.

¹⁴ Shujtaj dioscunapaj ñaupajpica ama cunguringuichijchu. Mandaj Diosca paipajlla cachun munaj shutimi. Paipajlla cachun munaj Taita Diosmi.

¹⁵ Chaimanta chai llajtapi causajcunahuan imata tandalla ruranata pajta ari ninguichijman. Paicunaca paicunapaj dioscunahuan huainayashpa paicunapaj dioscunaman sacrificiocunata cucushpaca, cancunatapish chai dioscunaman sacrificiocunata cushcacunata micuchunmi cayangacuna.

¹⁶ Mana cashpaca cancunapaj churicunapaj huarmi cachunmi paicunapaj ushushicunata japinguichij. Chai huarmicunaca paicunapaj dioscunahuan huainayacushpaca, cancunapaj churicunatapish paicunapaj dioscunahuanmi huainayachinga.

¹⁷ Imatapish yacuyachishpa dioscunata ñataj ruranguichijman.

Huatanta quimsa fiestata rurachun mandashcami

¹⁸ Levadura illajlla tandata rurana fiestataca ruranguichijtaj. Abib quilla ima punllapi micuchun ñuca mandashca shinataj canchis punllata levadura illajlla tandata micunguichij. Abib quillapimi Egiptomantaca llujshimurcanguichij.

¹⁹ Tucui punta huacharishcacunaca ñucapajmi. Huagra cashpa, oveja cashpa punta huacharishca c'aricunaca ñucapajmi.

²⁰ Punta huacharishca burropaj randica shuj ovejata cushpa chai burrotaca llujshichichun. Mana chashna llujshichishpaca cungata p'aquishpa huañuchichun. Punta huacharishca churicunatapish chashnallataj llujshichinguichij. Maijanpish ñucapajman shamujca chushaj maquillaca ama shamuchun.

²¹ Sujta punllacunata trabajangui. Tarpui punllacunapipish, cozicha punllacunapipish samana punllapica samaringui.

²² Punta p'ucushca trigota cozichashpapish semana fiestata ruranguichij. Cozicha tucuripipish fiestata ruranguichij.

²³ Israel cancunaca tucuicunami huatapi quimsa cutin israelcunapaj Mandaj Jatun Diospaj ñaupajpi ricurigrina canguichij.

²⁴ Cambaj ñaupajmanta tucui llajtapi causajcunata llujshichishpa cachashpami cambaj llajtataca ashtahuan achcayachisha. Cancuna huatapi quimsa cutin Mandaj cancunapaj Diospaj ñaupajpi ricurigrijpica, cancunapaj allpataca pi mana quichushun ningacunachu.

²⁵ Ñucaman cushca animalpaj yahuartaca imapish levadurahuan cajhuanca ama cunguichijchu. Pascua fiestapi ñucaman huañuchishpa cushca animalpaj aichataca cayandijpaj ama imata saquinguichijchu.

²⁶ Cancunapaj chagrapi punta p'ucushca granocunata cuna cashcacunataca Mandaj cancunapaj Diospaj huasiman apanguichij. Malta chivopaj aichataca paipaj mamapaj lechellapitajca ama yanunguichu” nircami.

Mandashcacunata Moisés quillcashcami

²⁷ Mandaj Diosca, Moisestaca: “Cai shimicunata quillcai: Cai shimicunahuanmi canhuanpish israelcunahuanpish ari ninacurcanchij” nircami.

²⁸ Moisesca chuscu chunga punllata, chuscu chunga tutatami Mandaj Dioshuan chaipi carca. Chai punllacunapica mana micurcachu, yacutapish mana ubyarcachu. Tablajlla rumicunapimi Dioshuan ari ninacushca chunga mandashcacunata quillcarca.

²⁹ Sinaí urcumantaca Moisesca Dios ima shina cashcata ricuchishpa causachun mandashcata quillcashca ishqui tablajlla rumicunata paipaj maquipi apashcami uriyamurca. Chai urcumanta uriyacushpaca Dioshuan rimacushcamanta paipaj ñahuicunaca lamyacuj cashcataca mana yacharcachu.

³⁰ Aaronpish, tucui israelcunapish Moisesta ricushpaca paipaj ñahuica lamyacuj cashcata ricushpami, paipajman c'uchuyanataca mancharcacuna.

³¹ Moisesca Aarontapish, israelcunata cunaj yuyajcunatapish cayajpimi, paipajman c'uchuyajpi Moisesca paicunahuan rimarca.

³² Chai q'uipaca tucui israelcuna Moisespajman c'uchuyajpimi, Sinaí urcupi Mandaj Dios imallata paita mandachun nishcata israelcunata mandarca.

³³ Moisesca paicunahuan ña tucui rimashpaca, paipaj ñahuitaca shuj linsohuanmi taparirca.

³⁴ Moisesca Mandaj Diospaj ñaupajpi rimangapaj yaicushpaca llujshingacamami chai linsotaca anchuchij carca. Llujshishpaca Mandaj Dios chaipi imallata mandashcatami israelcunamanca huillaj carca.

³⁵ Moisespaj ñahuita israelcuna ricushpaca paipaj ñahuitaca lamyacujllatataj ricujpimi, Taita Dioshuan cutin rimangapaj yaicungacama Moisesca cutinllataj linsohuan ñahuita taparij carca.