ÉXODO 31 - Dios Rimashca Shimicunami

Bezaleeltapish Aholiabtapish cayashcami

¹ Mandaj Diosca Moisestaca cashnami nirca:

² “Riqui, ñucaca Judá aillupuramanta Hurpaj nieto, Uripaj churi Bezaleeltami cayarcani.

³ Paitaca yachaisapa, yuyaisapa, imatapish yachaj, tucui ima ruranatapish yachaj cachunmi Diospaj Espirituta jundachircani.

⁴ Chai yachaihuanca paica curihuan, cullquihuan, broncehuan pipish manaraj rurashcata yuyarishpa imatapish rurajlla cachunmi chashna churarcani.

⁵ Rumicunata labrashpa tucui ima sumajcunatapish rurajmi. Caspicunapipish sumaj ricunacunata rurajmi. Tucui imatapish sumajta allichishpa rurajmi.

⁶ Paita ayudachunca Dan aillupuramanta Ahisamacpaj churi Aholiabtami paihuan churarcani. Tucui ñuca imalla nishcatataj rurachunca yachaisapa cashcamanta chaitataj ruranaihuan caj shunguyujcunamanca tucuicunamanmi ashtahuan yachaita curcani.

⁷ Dioshuan tupanacuna carpa huasitapish, ñucahuan ari ninacushcata ricuchij quillcata huaquichina arcatapish, chai arca jahuapi caj propiciatoriotapish, Diospaj carpa huasipi tucui imallata ruranacunatapish,

⁸ chaipi caj mezatapish, mezapi imalla ruranacunatapish, curi candelerotapish, chaicunata allichinacunatapish, inciensota rupachina altartapish,

⁹ Mandaj Diosman cushpa tucui rupachina altartapish, chaipi tucui imalla ruranacunatapish, tanquetapish, tanqueta tiyachina basatapish,

¹⁰ Diospajta ruranapi cashpa churarinacunatapish, Diospajlla ch'icanchishca cura cashpa Aarón churarinacunatapish, paipaj churicuna cura tucushpa Diospajta rurangapaj churarina churanacunatapish,

¹¹ Diospajlla cachun ch'icanyachina aceitetapish, Diospaj carpa huasipi churana mishquijllata ashnaj inciensotapish paicunami ñuca canta mandashca shinataj tucuita rurangacuna” nircami.

Samana punllata huaquichichun mandashcami

¹² Mandaj Diosca Moisestaca cashnapishmi nirca:

¹³ “Israelcunataca canca cashna nishpa rimangui: Cancunapajpish cancunapaj huahua huahuacunapajpish ñucahuan cancunahuan ima shina cashcata ricuchij cashcamanta samana punllataca huaquichinatajmi canguichij. Ñucaca Mandaj Dios cancunataca ñucapajllata ruraj cachun ch'icanchij cashcata yachachunmi chashna huaquichina.

¹⁴ Chaimanta samana punllataca huaquichinguichij. Chai punllaca cancuna Diospajlla cana punllami. Chai punllata yangata rurajca huañungatajmi. Chai punllapi maijanpish paipaj imalla rurana cashcata rurajtaca israelcunapuramanta anchuchishcami canga.

¹⁵ Sujta punllacunata trabajanguichij. Canchis punllapica Mandaj Diospajlla ch'icanchishca punlla cashcamanta samarinami canguichij. Samana punllapi maijanpish trabajajca huañungatajmi ningui.

¹⁶ Israelcunaca samana punllataca ñucahuan ari ninacushca cashcamanta paicunapaj huahua huahuacunapish huiñaipaj pajtachicunalla mandashcami.

¹⁷ Mandaj Diosca sujta punllapimi jahua pachatapish, cai pachatapish rurarca. Canchis punllapica imata mana rurashpa samarishca cashcamanta israelcunahuan ñucahuan huiñaipaj ari ninacushcata ricuchijmi” nircami.

Curi bizita rurashcami

¹⁸ Sinaí urcupi chaicunata Moiseshuan ña tucui rimashpaca, Moisesmanca Dios ima shina cashca shina causachun mandashcata ishqui tablajlla rumicunapi Taita Dios paipaj quiquin dedohuan quillcashcatami curca.