ÉXODO 30 - Dios Rimashca Shimicunami

Inciensota rupachina altarta ruranami

¹ “Inciensota rupachingapajpish, acacia caspihuan shuj altarta rurangui.

² Chai altarca sunimanca chuscu chunga pichca centímetro, anchomanpish chuscu chunga pichca centimetrollataj cachun. Chuscundij lado chai medidallataj cachun. Altomanca iscun chunga centímetro cachun. Chai altarpi caj gachucunaca altarhuan shuj shinallata rurashca cachun.

³ Chai altar jahuatapish, lado quinricunatapish, gachucunatapish alli curihuan llihuingui. Muyundij filocunatapish curihuan ribetingui.

⁴ Chai ribete ucunijllapica ishqui esquinapi curi argollacunata rurashpa churangui. Caishuj ladomanpish chashnallataj churangui. Chaipi caspicunata churachishpaca maimanpish apanapaj cachun rurangui.

⁵ Chai caspicunataca acacia caspimanta rurashpa curihuan llihuingui.

⁶ Chai q'uipaca chai altartaca ñuca cancunahuan ari ninacushcata ricuchij quillcata huaquichina arca tiyacun ucuta jarcachishca linso ñaupajllapi churangui. Chai arcapaj propiciatorio jahuapimi ñucaca canhuan tupasha.

⁷ Aaronca lamparacunata cada tutamanta allichinaman shamushpaca, mishquiman ashnacuj inciensota chai altar jahuapi rupachichun.

⁸ Chishicuna lamparacunapi ninata japichinaman shamushpapish mishquiman ashnacuj inciensota chai altar jahuapi rupachichun. Chashna rurachun mandashcaca cancunapaj huahua huahuacuna Mandaj Diospaj ñaupajpi chashna rurachun huiñaipaj mandashcami.

⁹ Chai altarpi manapish rupachina caj inciensotaca ama rupachingui. Tucuita cushpa rupachinatapish, imallata cuna cashcatapish, tallina vinotapish chai altarpi mana rupachina cajtaca ama rupachingui.

¹⁰ Juchacunamanta cushca animalpaj yahuarta Aaronca huatapi shuj cutin chai altarpaj gachucunata llihuichun. Cancunapaj huahua huahuacunapish juchamanta cushca yahuartaca chai altarpaj gachucunapi huatapi shuj cutin cada huata llihuicuchunlla. Chai altarca Mandaj Diospajlla ch'icanchishcami” nircami.

Israelcunaca paicunata yupajpi ama huañungapaj cullquita cushcami

¹¹ Mandaj Diosca Moisestaca:

¹² “Israelcuna mashna cashcata yupangapaj paicunapaj shuticunata quillcajpica, tucuicuna cada quiquin paicunapaj causaimanta Mandaj Diosman pagachun. Paicunata ña yupashca cajpi, ama huañui tiyachunmi chashna rurana.

¹³ Tucui yupashcacunaca cashnami cuna can: Carpa huasipi tiyaj cullquita pezanapi pezashca chaupi siclo cullquitami cuna can. Shuj sicloca, ishqui chunga gerami. Mandaj Diosmanca, chaupi siclo cullquitami cuna.

¹⁴ Ishqui chunga huatayujmanta huichiman shuticunata yupashcacunaca tucuicuna Mandaj Diosman cuna cashcataca chashnallataj cuchun.

¹⁵ Quiquin causaimanta Mandaj Diosman cunataca charij cashpapish chaupi siclomanta yallitaca mana cunachu. Huajcha cashpapish chaupi siclomanta ashalla illajtapish mana cunachu.

¹⁶ Israelcuna paicunapaj causaimanta cushca cullquita japishpaca, Dioshuan tupanacuna carpa huasipi imalla rurana cashcapaj cuchun. Paicunapaj causaimanta cushcacuna Mandaj Diospaj ñaupajpi cajpimi israelcunataca Mandaj Diosca yuyaricungalla” nircami.

Maillarina bronce tanqueta rurashcami

¹⁷ Mandaj Diosca Moisestaca cashnapishmi nirca:

¹⁸ “Maillarinapaj yacuta churana shuj tanquetapish, tanqueta tiyachina basatapish bronceta rurangui. Chaitaca Dioshuan tupanacuna carpa huasihuan altarhuan chaupipi churashpa chaipica yacuta churangui.

¹⁹ Chaipi caj yacuhuanca Aarón, paipaj churicunandijllami maquicunata, chaquicunata maillaringacuna.

²⁰ Dioshuan tupanacuna carpa huasiman yaicushpa ama huañungapajca chai yacuhuan maillarishpa chaiman yaicuchuncuna. Mandaj Diosman cushpa rupachingapaj altarman c'uchuyangapajpish,

²¹ ama huañungapajca maquicunata, chaquicunata maillarichuncuna. Cai mandashcaca Aaronpish, paipaj huahua huahuacunapish ruracuchunlla huiñaipaj mandashcami” nircami.

Diospajlla cachun ch'icanchina aceiteta rurachun nishcami

²² Mandaj Diosca Moisestaca cashnapishmi nirca:

²³ “Tucuimanta yalli mishquijllata ashnaj yuracunamantaca: Tucuimanta yalli alli mirratapish 500 siclota, mishquijllata ashnaj canelatapish 250 siclota, mishquijllata ashnaj calamotapish 250 siclota,

²⁴ casia yuramantaca 500 siclota japingui. Chaicunataca Diospajlla ch'icanchishca ucupi caj pezanapi pezashca cachun. Olivo aceitetapish shuj litrota japingui.

²⁵ Tucui chaicunahuanca ñucapajlla ch'icanyachina aceiteta rurangui. Mishquiman ashnacuj llihuinacunata yachajcuna rurashcatapish yalli ashtahuan allita rurangui. Chaica ñucapajlla ch'icanchinapaj aceitemi canga.

²⁶ Chai aceitehuanca Dioshuan tupanacuna carpa huasitapish, ñucahuan ari ninacushcata ricuchij quillcata huaquichina arcatapish,

²⁷ mezatapish chaipi tucui imalla ruranacunatapish, candelerocunatapish, candeleropi tucui imalla ruranacunatapish, inciensota rupachina altartapish,

²⁸ Diosman cushpa tucuita rupachina altartapish, tucui chaipi imalla ruranacunatapish, tanquetapish, tanqueta tiyachina basatapish chai aceitehuan llihuingui.

²⁹ Chashna ñucapajllata rurajpimi tucui chaicunaca ñucapajlla ch'icanchishca canga. Chaicunapi ima tuparishpapish ñucapajllami tucunga.

³⁰ Aarontapish, paipaj churicunatapish chai aceitehuan llihuishpa Mandaj Diospajta ruraj curacunami canguichij nishpa ch'icanchingui.

³¹ Israelcunatapish cashna ningui: Caica cancunapaj huahua huahuacunata ñucapajta ruraj cachun ch'icanchina ñuca aceitemi ninmi Mandaj Diosca ningui.

³² Chai aceitetaca maijan runapipish ama tallinguichijchu. Chai aceite shinatapish shujtajtaca ama ruranguichijchu. Chai aceiteca Diospajlla cashcamanta Diospajlla cashcata yuyashpa charinguichij.

³³ Maijanpish cai aceite shinallatataj rurashpa maijan maijanpish runapi churajca israelcunapuramanta anchuchishcami canga ni” nircami.

Diospajlla cachun ch'icanchina inciensota rurachun nishcami

³⁴ Mandaj Diosca Moisestaca cashnapishmi nirca: “Inciensota rurangapajca, mishquiman ashnacuj cai yuracunata japingui. Mishquijllata ashnaj estacteta, mishquijllata ashnaj uñata, mishquijllata ashnaj galbanota ashtahuan alli inciensotapish tucuicunata chai shinallatataj japishpa,

³⁵ chaicunata alli chapushpa mishquijllata ashnacuj inciensota ruranata yachajcunata yalli mishquijllaman ashnacujta rurangui. Chaica ñucapajlla ch'icanchishcami canga.

³⁶ Chaicunata chapushcamanta ashataca ñutujllata cutashpa, Dioshuan tupanacuna carpa huasipi caj cancunahuan ari ninacushcata ricuchij quillcata huaquichina arca ñaupajpi churangui. Chai arcapimi ñucaca canman ricurisha. Chaicunaca cancunapajca Diospajlla ch'icanchishcata yuyanami canga.

³⁷ Can rurashca shina inciensotaca pi shujtajca ama rurachun. Can rurashca inciensoca Mandaj Diospajlla ch'icanchishcami canga.

³⁸ Maijanpish can rurashca shina inciensota mutquingapaj rurajca israelcunapuramanta anchuchishcami canga” nircami.