ÉXODO 26 - Dios Rimashca Shimicunami

Diospaj carpa huasipaj jatun carpata rurachun mandashcami

¹ Diospaj carpa huasipajca lino puchcata caupushpa ahuashca chunga cortinacunata rurangui. Chai cortinacunaca azul, morado, amsa puca cachun. Cortinacunataca querubincunayujta bordashcata ahuangui.

² Cortinacunaca cada shuj sunimanca chunga ishqui metro sujta chunga centímetro, anchomanca shuj metro pusaj chunga centímetro cachun. Cortinacunaca tucuicuna chai medidallatataj charichun.

³ Pichca cortinacunaca caishujhuan chaishujhuan tupachishpa sirashpa shujllata ruranapaj cachun. Caishuj pichca cortinacunapish caishujhuan chaishujhuan tupachishpa sirashpa shujllata ruranapaj cachun.

⁴ Punta pichca cortinacunata shujllata rurashca cortina uripica, morado puchcahuan rinrincunata rurashpa churangui. Caishuj pichca cortinacunata shujllata rurashca filopipish chashnallataj rinrincunata churangui.

⁵ Punta pichca cortinacunata shujllata rurashca carpa filopica, pichca chunga rinrincunata rurangui. Caishuj pichca cortinacunata shujllata rurashca carpa filopipish pichca chunga rinrincunata rurangui. Chai rinrincunaca caishujhuan chaishujhuan ch'imbapurashpa siranapajmi canga.

⁶ Pichca chunga curi ganchocunata rurashpa, chai ganchocunahuanca caishuj ladomanta chaishuj ladomanta churachingui. Chashnami Diospaj carpa huasica shuj carpa shinalla saquiringa.

⁷ Diospaj carpa huasi c'ata jahuata c'atanapajca, chivo millmamanta chunga shuj cortinacunata sirashpa shuj jatun carpata rurangui.

⁸ Chai cortinacunaca sunimanca chunga quimsa metro pichca chunga centímetro, anchomanca shuj metro pusaj chunga centímetro cachun. Chunga shuj cortinacunataj chai medidallataj cachun.

⁹ Pichca cortinacunataca caishujhuan chaishujhuan ch'imbapura sirashpa shujllata rurangui. Caishuj shujta cortinacunatapish caishujhuan chaishujhuan ch'imbapurashpa sirashpa shujllata rurangui. Ñaupaj lado urita sujtapurapi shuj cortina yallishcataca pataringui.

¹⁰ Ch'imbapurashpa sirana filopica pichca chunga rinrincunata rurangui. Ch'imbapurashpa sirana caishuj cortinapipish pichca chunga rinrincunallatataj rurashpa churangui.

¹¹ Pichca chunga bronce ganchocunatapish rurangui. Chaicunataca caishujhuan chaishujhuan churachingui. Ishquindijta tupachishpa sirashca jahuapi caishujmanta chaishujmanta churachijpimi, shuj carpa shinalla saquiringa.

¹² Diospaj carpa huasita c'atajpi huasha lado urita yallijpica, chai urita huarcushca cachun saquinguilla.

¹³ Suniman yallishcataca, ishquindij lado quinriman chai valillatataj huarcushcata saquingui. Shuj ladoman chuscu chunga pichca centimetrota, caishuj ladomanpish chuscu chunga pichca centimetrota lado urita tapachun saquingui.

¹⁴ Chai jahuata c'atanapajca carnero caracunata pucajllata tiningui. Cutin chai jahuata c'atanapajpish tejonpaj carata rurangui.

¹⁵ Diospaj carpa huasipajca acacia caspimanta derecho tablacunata rurangui.

¹⁶ Chai tablacunaca sunimanca chuscu metro pichca chunga centímetro, anchomanca sujta chunga canchis chaupi centímetro cachun.

¹⁷ Chai tablacunataca ishquindijmanta shujlla shinata rurangapaj cada tablata ishqui espigacunayujta rurachun. Diospaj carpa huasita shayachinapaj tablacunaca tucuicuna chai shinallataj cachun.

¹⁸ Diospaj carpa huasipaj tablacunataca ura ladopajlla ishqui chunga tablacunata rurangui.

¹⁹ Chai tablacunataca cullquimanta chuscu chunga basacunata rurashpa chaipi shayachingui. Cada tablata ishqui basacunapi espigacunata satichishpa shayachingui.

²⁰ Diospaj carpa huasi janaj lado quinripajpish, ishqui chunga tablacunallatataj rurangui.

²¹ Chaicunata shayachingapajpish, chuscu chunga basacunata cullquillamantataj rurangui. Cada tablata ishqui basacunapi shayachingui.

²² Diospaj carpa huasipajca, inti huashicun lado patapajca sujta tablacunata rurangui.

²³ Ishqui esquina tabla huasha ladoman shayachinapajca shujtaj ishqui tablacunata rurangui.

²⁴ Chai tablataca caishuj tabla huasha ladoman shayachijpi, ucumanta jahuacama shujlla cachun bisagrahuan churachishpa shayachinapaj cachun. Caishuj ishqui esquinapajpish chashnallatataj rurangui.

²⁵ Huasha ladopajca pusaj tablacunata rurangui. Chai tablacunata shayachinapajca cullquimanta chunga sujta basacunata rurangui. Cada tablata ishqui basacunapi shayachingui.

²⁶ Chai carpa huasipaj tablacunapi quinriman churanapajca, acacia suni caspicunata pichcata rurangui.

²⁷ Chai carpa huasipaj caishuj lado tablapi quinriman churanapajpish, pichca suni caspicunata rurangui. Inti huashicun lado huashaman caj tablapi quinriman churanapajpish shujtaj pichca suni caspicunata rurangui.

²⁸ Chaupi tablata quinriman churana suni caspica, shuj ladomanta caishuj ladoman pasajta cachun.

²⁹ Tablacunatapish curihuan llihuingui. Suni caspicunatapish curihuan llihuingui. Chai suni caspicunata churana argollacunatapish curita rurangui.

³⁰ Chai carpa huasita shayachinapajca ima shinalla rurana cashcata Sinaí urcupi ricuchishca shina rurashpa shayachingui.

³¹ Jarcachina shuj linsotapish azul, morado, amsa puca puchcacunahuan, caupushca lino puchcahuan querubincunayujta bordashpa ahuangui.

³² Chai linsotaca curihuan llihuishca chuscu acacia pilar caspicunata shayachishcapi huarcungui. Chai caspi pilar puntapi churanapajca curi capitelcunata rurangui. Chai pilarcunata shayachinapajpish cullqui basacunata rurangui.

³³ Diospajlla ch'icanchishca ucuhuan, caishuj ucuhuan ch'icanchishca cachun chai linsotaca ganchocunapi churachishpa huarcungui. Chai linsohuan jarcachishca Diospajlla ch'icanchishca ucupica, Dioshuan ari ninacushca quillcata huaquichina arcata churangui.

³⁴ Dioshuan ari ninacushca quillcata huaquichina arca jahuapica propiciatoriota churangui.

³⁵ Mezataca, linsohuan jarcachishca janaj lado c'uchuman churangui. Candelerotaca ura ladoman meza ch'imbapurapi churangui.

³⁶ Diospaj carpa huasi pungupaj cortinaca azul, morado, amsa puca puchcacunahuan, caupushca lino puchcahuan sumajta bordashcacunayujta ahuanata yachajta ahuachingui.

³⁷ Chai cortinata huarcunapajca acacia caspimanta pichca pilarcunata rurashpa curihuan llihuingui. Chai pilarcunapaj capitelcunatapish curita rurangui. Chai pilarcunata shayachinapajca, bronce pichca basacunata rurangui.