ÉXODO 23 - Dios Rimashca Shimicunami

¹ Manapish cashcata llullashpa huillanapaj ama ari ningui. Millaita rurajhuan llulla testigo tucungapaj ama shuj yuyailla tucungui.

² Millaita rurajcuna achcacuna cashcallamanta ama canpish paicunahuan shuj yuyailla tucungui. Achcacuna llullacushcallamanta paicunahuan tucushpa llullashpa huillashpa ama llaquipi churangui.

³ Imata mana charij huajchacuna ima mana allita rurashca cajpica, ama huajcha cashcallamanta llullashpa paipura tucungui.

⁴ Canta p'iñajpaj huagra cashpa, burro cashpa chingarishpa puricujta can japishpaca, canta p'iñaj cajpipish paiman tigrachinguilla.

⁵ Canta p'iñajpaj burro imata aparishca urmashpa siricujpica, ayudashpa jatarichingui ama saquinguillachu.

⁶ Huajchataca llaquichishpa ama charijpura tucungui.

⁷ Llullaj canamantaca anchuringui. Ima juchachina illajlla cajtapish, cashcata rurajtapish ama huañuchichingui. Millaita rurajta llaquichinataca manataj saquishachu.

⁸ Camaritaca ama japingui. Camarica alli ricuj runatapish mana ricujtami ruran. Cashcata rimaj runatapish llullachinmi.

⁹ Shujtaj llajtamanta shamushcataca ama llaquichinguichij. Cancunapish Egipto llajtapica caru llajtamantami carcanguichij. Chaipica carumanta cajcuna ima shina llaquita apanataca yacharcanguichijmi.

Allpatapish animalcunatapish samachinami

¹⁰ Cancunapaj allpapica, sujta huatata tarpunguichij, granocunatapish tandanguichij.

¹¹ Ashtahuanpish canchis huatapica imata ama tarpunguichijchu. Israelcunapurallataj imata mana charijcuna chai huata ñau granocunata tandashpa micuchun saquinguichijlla. Chaimanta saquirishcatapish purij animalcuna micuchun saquinguichijlla. Uva chagracunatapish, olivo chagracunatapish chashnallataj saquinguichijlla.

¹² Sujta punllacunata trabajangui. Ashtahuanpish canchis punllapica samaringui. Cambaj huagrapish, cambaj burropish, cambajta ruraj huarmipaj churipish, shujtaj llajtamanta shamujpish samarichunmi chashna rurana cangui.

¹³ Tucui ñuca imalla nishcacunata pajtachinguichij. Shujtaj dioscunapaj shutipica ama mañanguichij. Cancunapaj shimimanca chai dioscunata rimanaca ama llujshichunllapish.

Huatanta quimsa fiestata rurachun mandashcami

¹⁴ Ñucata yuyarishpa huatapi quimsa cutin jatun fiestata ruranguichij.

¹⁵ Levadura illajlla tandata rurana fiestataca ruranguichijtaj. Abib quilla ima punllapi micuchun ñuca mandashca shinataj canchis punllata levadura illajlla tandata micunguichij. Abib quillapimi Egiptomantaca llujshimurcanguichij. Chai punllacunapica ñuca ñaupajmanca, pi ama chushaj maquilla shamuchun.

¹⁶ Cancuna tarpushca chagracunapi punta p'ucushcata cozichana jatun fiestata ruranatapish ama saquinguichijchu. Cambaj tarpushca chagrata ña tucui cozichashca chai huata cozicha tucuri jatun fiestatapish ruranguichijtaj.

¹⁷ Tucui c'aricunami Mandaj Jatun Diospaj ñaupajpica huatapi quimsa cutin ricurigrinataj canguichij.

¹⁸ Ñucaman cushca animalpaj yahuartaca levadurayuj tandahuanca ama cunguichijchu. Chai animalpaj huiratapish cayandij punllapajca ama puchuchinguichijchu.

¹⁹ Cancunapaj chagrapi punta p'ucushca granocunata cuna cashcacunataca Mandaj cancunapaj Diospaj huasiman apamunguichij. Malta chivo aichata sumaj micunata ruracushpaca ama paipaj mamapaj lechellapitaj yanunguichu.

Israelcunata pushachun Mandaj Diospaj angelta cachashcami

²⁰ Ñuca cancunapaj allichishca llajtaman ñanpi cuidashpa cancunata chai llajtaman ñaupashpa yaicuchichunca ñuca angeltami cachani.

²¹ Paipaj ñaupajpica cazuj, alli cangui. Pai ima nishcata uyangui. Paitaca ama c'ariyangui. Can c'ariyashcataca paica mana perdonangachu. Ñuca shutica paipimi.

²² Ashtahuanpish pai tucui imalla nishcata tucui shunguhuan uyashpa tucui ñuca nishcata pajtachijpica, canta p'iñajcunataca ñucami p'iñasha. Canta llaquichijcunataca ñucami llaquichisha.

²³ Ñuca ángel cancunata ñaupashpa rishpami, cancunataca amorreocunapaj, heteocunapaj, ferezeocunapaj, cananeocunapaj, heveocunapaj, jebuseocunapaj llajtaman pushanga. Chaipi causajcunataca ñucami chingachichisha.

²⁴ Paicunapaj dioscunapaj ñaupajpica ama cumuringuichijchu, ama paipajta ruranguichijchu. Paicuna rurashca shinapish ama ruranguichijchu. Ashtahuanpish chai dioscunataca tucuita chingachinguichij. Rumimanta imamanpish rijchajcunata rurashcacunatapish tucuita ñutunguichij.

²⁵ Mandaj cancunapaj Diospajta ruranguichij. Paimi cambaj micunatapish, yacutapish alli cashca cachun ninga. Cancunamantaca ñucami tucui ima ungüicunatapish anchuchisha.

²⁶ Cambaj llajtapica, shulluj huarmicunapish, mana huachaj huarmicunapish mana tiyangachu. Uni huatacunata can causachunpish ñucami mirachisha.

²⁷ Mai llajtaman can yaicugrijpipish canta p'iñajcuna manchashpa cambaj ñaupajmanta miticushpa richunca ñucami manchana yuyaita paicunamanca cusha.

²⁸ Heveocunata, cananeocunata, heteocunata cambaj ñaupajmanta llujshichishpa cachachunca avispa chuspicunatami canta ñaupachishpa cachasha.

²⁹ Paicunataca shuj huatallapica cambaj ñaupajmantaca mana llujshichishpa cachashachu. Chai llajta shitashca saquirijpi sacha animalcunalla mirarishpa canta ama llaquichichunmi chashna rurasha.

³⁰ Cambaj huahua huahuacuna mirarishpa tucui chai llajtata japingacamami paicunataca asha asha cambaj ñaupajmanta llujshichishpa caticushalla.

³¹ Cancunapaj llajta lindetaca Puca Cuchamanta filisteocunapaj cuchacama, shitashca pambamantaca Éufrates yacucamami ña churani. Chai llajtapi causajcunatapish cambaj maquipimi churani. Canmi paicunataca cambaj ñaupajmanta llujshichina cangui.

³² Chai llajtapi causajcunahuan tandalla imata rurangapajca ama ari ninacunguichij. Paicunapaj dioscunapaj, imata rurangapajpish ama ari ninacunguichij.

³³ Paicunapaj dioscunapajta rurashpa, cancunatapish ñuca ñaupajpi juchallichishpa cancunapaj ñitcana cana cashcamanta paicunaca cancunapaj llajtapica manataj causanachu can nircami.