ÉXODO 20 - Dios Rimashca Shimicunami

Chunga mandashcacunata Dios cushcami

¹ Taita Diosca tucui cai shimicunatami rimarca:

² “Ñucaca cancuna Egiptopi huatashca shina llaquinayajta causacujpi llujshichimuj Mandaj Dios cancunapaj Diosmi cani.

³ Ñucapaj randi shujtaj dioscunata ama charinguichij.

⁴ Imaman rijchajcunatapish ama ruranguichijchu. Jahua pachapi cajcunaman rijchajtapish, cai pachapi cajcunaman rijchajtapish, yacu ucupi cajcunaman rijchajtapish, amataj ruranguichijchu.

⁵ Chaicunataca ama cunguringuichijchu, amataj adoranguichijchu. Ñucami Mandaj cambaj Taita Dios cani. Ñucaca tucuita rurai tucuj Dios, ñucapajlla cachun munajmi cani. Yayacuna ñucata p'iñashpa millaita rurajpica paicunapaj quimsa huahua huahuacama, mana cashpacarin chuscu huahua huahuacunacama jatunta llaquichijmi cani.

⁶ Ñucata c'uyashpa, ñuca mandashcacunata huaquichijcunataca, huaranga huaranga huahua huahuacunacama llaquijmi cani.

⁷ Mandaj cambaj Diospaj shutipica manapish rimanapica ama rimangui. Ñuca shutita manapish rimanapi rimajtaca llaquichishatajmi.

⁸ Samana punllapica ñucapajlla cashcataca amataj cungaringui.

⁹ Sujta punllataca trabajangui, cambaj tucui ima ruranacunataca chai punllacunapi rurangui.

¹⁰ Canchis punllapica Mandaj cambaj Diospajlla cashcamanta, chai punllapica ama imata rurangui. Cambaj churicunatapish, ushushicunatapish, cambajta ruraj c'aricunatapish, huarmicunatapish, animalcunatapish, shujtaj llajtamanta shamushpa canta catishpa causajcunatapish amataj imata rurachinguichijchu.

¹¹ Mandaj Diosca jahua pachatapish, cai pachatapish, mama cuchatapish, tucui chaicunapi imalla tiyajcunatapish sujta punllacunapimi tucuita rurarca. Canchis punllapica samarircami. Chaimantami Mandaj Diosca chai punllataca paipajlla cachun ch'icanchirca.

¹² Mandaj cambaj Dios canman cushca llajtapi unita causangapajca, cambaj yayata cambaj mamata alli ningui.

¹³ Ama huañuchingui.

¹⁴ Ama huainayangui.

¹⁵ Ama shuhuangui.

¹⁶ Ama pitapish p'iñashpa manapish cashcata llullashpa llaquipi churangui.

¹⁷ Shujtajpaj huasita, paipaj huarmita cashpa, paipajta rurajta cashpa, pai huiñachishcata cashpa, paipaj huagrata cashpa, paipaj burrota cashpa, paipaj shujtaj ima charishcacunatapish ama munangui” nishpami mandarca.

Israelcunaca Taita Diosta mancharishcami

¹⁸ Tucui israelcunami culun nicujtapish, achij nicujtapish, bocinapi tocashcatapish, chai urcu cushnicujtapish imalla tucujta alli ricuracurcacuna. Chaita ricushpa manchaihuan cashpami israelcunaca carullamanta chaparacurcacuna.

¹⁹ Chaimi Moisestaca: –Quiquinlla Dioshuan rimashpa ñucanchijman huillai, ñucanchijca uyashunllami. Dios ñucanchijhuan rimajpica huañushunllatajmari– nircacuna.

²⁰ Shina nijpi Moisesca israelcunamanca: –Ama manchaichijchu, Taita Diosca paita manchashpa ama juchallichun cazujta mana cazujta ricungapajmari shamurca– nircami.

²¹ Israelcuna chashna caruman chapacujpica, Moisesca Taita Dios maipi can amsallamanmi c'uchuyarca.

Altarta ima shina rurachun mandashcami

²² Mandaj Diosca Moisestaca: “Israelcunataca cashna ni: Cancunaca jahua pachamanta ñuca cancunahuan rimashcataca ricurcanguichijmi.

²³ Cancunaca ñucapaj randi adorangapaj curimanta, cullquimanta dioscunataca ama ruranguichij.

²⁴ Cancunaca ñucapaj allpa altarta rurashpa ñucaman cushpa tucui rupachinatapish, ñucahuan alli cangapaj cunatapish cancunapaj ovejacunata, cancunapaj vacacunata chai altar jahuapi cunguichij. Maipimi ñuca shutita yuyaringuichij nishpa mandani chaipitaj ñuca shutita yuyaricujpica ñucaca cancunapajman shamushpami alli cashca cachun nisha.

²⁵ Ñucapaj altarta rumicunahuan rurashpaca, labrashca rumicunahuanca ama ruranguichijchu. Fierrocunahuan tacashpaca yangatami ruranguichij.

²⁶ Ñuca altartaca gradacunayujta rurashpa chaita huichiyanguichijman. Chaita huichiyajpica cancunapaj pinganayaj aicha ricuringami ninmi ningui” nircami.