ÉXODO 17 - Dios Rimashca Shimicunami

Peña urcumanta yacuta llujshichishcami

¹ Tandanacushca tucui israelcuna Sin nishca shitashca pambamanta rishpaca, Mandaj Dios mandashca shina asha ashata causashpa rishpaca, Refidimman chayashpami chaipi carpa huasicunata shayachishpa tiyarircacuna. Chaipica yacu mana tiyajpimi imata mana ubyai tucurcacuna.

² Chaipimi israelcunaca Moisestaca: –Ubyanapaj yacuta cui– nishpa rimarcacuna. Chaimi Moisesca: –¿Ima nishpataj ñucahuan p'iñaringuichij? ¿Ima nishpataj Mandaj Dios tucuita rurai tucuj cashcata ricushun ninguichij?– nirca.

³ Israelcunaca yallitaj yacunaihuan cashcamantami, Moisestaca juchachishpa: –¿Imapajtaj ñucanchijtaca Egiptomantaca llujshichimurcangui? ¿Ñucanchij huahuacunandij, animalcunandij yacunaihuan huañuchingapajchu pushamurcangui?– nircacuna.

⁴ Chaimi Moisesca: –Cai gentecunataca ¿imatataj rurashari? Rumicunahuan shitanallamari illan– nishpa, Mandaj Diosta caparishpa mañarca.

⁵ Mandaj Diosca Moisestaca: –Israelcunata cunaj yuyajcunata maijancunata pushashpa, ñaupashpa jatun yacuta huajtashca caspitapish apashpa ri.

⁶ Ñucaca Horeb peña urcu jahuaman ñaupashpa rishpami, chaipi canta shuyacusha. Chai peña urcupi can huajtajpica, tucui paicuna ubyachun yacu llujshingallami– nircami. Moisesca israelcunata cunaj yuyajcunapaj ñaupajpimi chashna rurarca.

⁷ ¿Mandaj Diosca ñucanchijhuanchu, manachu ñucanchijhuan? nishpa israelcuna Mandaj Diosta p'iñachishcamantami chai pambataca Masah shutita, Meriba shutita shutichirca.

Amaleccuna israelcunahuan macanacushcami

⁸ Amaleccunaca israelcunahuan macanacungapaj shamushpami Refidimpi macanacurcacuna.

⁹ Chaipimi Moisesca, Josuetaca: –Israelcunapuramanta maijan runacunata agllashpa, amaleccunahuan macanacunaman llujshi. Ñucaca cayaca Diospaj caspita ñuca maquipi apashcami, urcu puntapi casha– nirca.

¹⁰ Josueca Moisés mandashca shinallatajmi amaleccunahuan macanacunaman llujshirca. Moiseshuan, Aaronhuan, Hurhuanca urcu puntamanmi huichiyarcacuna.

¹¹ Chai macanacuipica Moisés paipaj maquita huichi chutajpica, israelcunami mishai callarirca. Moisés paipaj maquita uriyachijpica, amaleccunami mishai callarirca.

¹² Moisespaj maquicuna shaicujpica shuj rumita japishpa Moisesta chaipi tiyachishpami Aaronca shuj ladomanta shuj maquita, Hurca caishuj ladomanta caishuj maquita huichi charijpi Moisesca inti huashicungacama mana shaicushpa, maquicunata huichi chutashpa tiyarca.

¹³ Chaimantami Josueca amaleccunataca, espadahuan huañuchishpa macanacuita misharca.

¹⁴ Mandaj Diosca Moisestaca: –Caicunataca yuyarinapaj cachun shuj libropi quillcai. Cai amaleccunamantaca ima yuyarina ama tiyachun tucuimi cai pachamanta chingachigrini ninmi Mandaj Diosca nishpa Josueman huillai– nircami.

¹⁵ Moisesca shuj altarta rurashpa, chai altartaca: Jehová– nisi shutita shutichishpami,

¹⁶ cashna nirca: “Mandaj Dios mandacunta amaleccuna p'iñashpa llaquichishpa jatarishcamantami, Mandaj Diosca amaleccunahuan macanacunga. Huahua huahuacunahuan macanacucungallami” nircami.