ESDRAS 7 - Dios Rimashca Shimicunami

Jerusalenman Esdras chayashcami

¹ Chai tucuicuna q'uipaca Persia llajtata jatun mandaj Artajerjes mandacui huatacunami, Esdras shuti cura causarca. Esdrasca Seraiaspaj churimi. Seraiasca Azariaspaj churimi. Azariasca Hilciaspaj churimi.

² Hilciasca Salumpaj churimi. Salumca Sadocpaj churimi. Sadocca Ahitobpaj churimi.

³ Ahitobca Amariaspaj churimi. Amariasca Azariaspaj churimi. Azariasca Meraiotpaj churimi.

⁴ Meraiotca Zeraiaspaj churimi. Zeraiasca Uzipaj churimi. Uzica Buquipaj churimi.

⁵ Buquica Abisuapaj churimi. Abisuaca Fineespaj churimi. Fineesca Eleazarpaj churimi. Eleazarca curacunata punta pushaj Aaronpaj churimi carca.

⁶ Chai Esdrasmi Babiloniamanta Jerusalenman huichiyarca. Paica israelcunata Mandaj Dios Moisesman cushca mandashcacunata alli yachajpish, quillcajpishmi carca. Mandaj Taita Dios Esdrashuan cajpimi, jatun mandajca pai imata mañashcatapish curcalla.

⁷ Jatun mandaj Artajerjes ña canchis huatata mandacujpimi, huaquin israelcunapish, curacunapish, levitacunapish, cantajcunapish, pungupi cuidajcunapish, Diospaj huasipi Diospajta rurajcunapish Esdrashuan Jerusaleman shamurcacuna.

⁸ Paica jatun mandaj Artajerjes canchis huatata ña mandacui pichca quillapimi Jerusalenmanca chayarca.

⁹ Babiloniamantaca huatapaj callari quillapaj punta punllapi llujshimushpaca, chai huatapajllataj pichca quillapaj punta punllapimi Jerusalenmanca chayamurca. Mandaj Diospaj poderca Esdrashuanmi carca.

¹⁰ Esdrasca Mandaj Dios mandashcata yachangapaj, pajtachingapajmi paipaj shunguta allichishca carca. Mandaj Dios chaitataj pajtachingui nishcata, pajtachinguitaj nishcata Israelpi yachachingapajmi chashna carca.

¹¹ Esdrasca Mandaj Dios israelcunaman cushca mandashcata, chaitataj pajtachichun nishcata alli yachaj, alli yachachij quillcajmi carca. Chai Esdras curaman jatun mandaj Artajerjes quillcashpa cachashca quillcata copiashcaca caimi:

¹² “Jatun mandajcunata jatun mandaj Artajerjesmi, jahua pacha Dios mandashcacunata alli yachachij, quillcaj can Esdras curahuanca sumaj causai cashca cachun nini.

¹³ Cashnami mandashpa quillcani. Cai ñuca mandacun llajtapi Israel llajtamanta cajcunaca curacuna cashpa, levitacuna cashpa, maijan cashpapish Jerusalenman canhuan rishun nijcunaca richunlla.

¹⁴ Jatun mandaj ñucapish, ñucaman yuyaita cuj canchis runacunapishmi Judeapi, Jerusalenpi causacujcunaca cambaj maquipi caj Mandaj Diospaj mandashcapi nishca shinataj cazucushcata mana cazucushcata ricuchunmi cachanchij.

¹⁵ Israelcunapaj Diosman jatun mandajpish, paiman yuyaita cujcunapish cunata munashcamanta cushca cullquita, curita apashpa richun. Chai Dios causana huasica Jerusalenpimi.

¹⁶ Cai Babiloniapi mashnata japishca cullquita, curitapish shinallataj israelcuna, curacuna Jerusalenpi caj paicunapaj Diospaj huasipaj cunata munashcamanta cushca ofrendacunandij apanguichijlla.

¹⁷ Chai cullquihuanca malta huagracunata, carnerocunata, malta ovejacunata randishpa chaicunahuan imalla cuna cashcacunandij, tallina vinondij Jerusalenpi caj cancunapaj Diospaj huasipi caj altar jahuapi cungui.

¹⁸ Puchushca cullquihuan, curihuanca canpipish, canhuan cajcunapipish imami ashtahuan Dios munashca shina alli chaita ruranguichij.

¹⁹ Mandaj Diospaj huasipi paipajta ruranapaj cashcacunata cambaj maquipi cutichishcataca Jerusalenpi caj cambaj Diospaj ñaupajllapitaj cutin churangui.

²⁰ Cambaj Diospaj huasipaj imalla minishtirishcacunapajca mandana huasimantami tucui llujshinga.

²¹ Jatun mandaj Artajerjestajmi, jatun yacumanta ch'imba ladoman caj cullquita huaquichijcunataca cashna mandani: Jahua pacha Diospaj mandashcacunata quillcaj Esdras cura imalla mañashcataca mañanca cunguichij.

²² Cullquitapish patsaj talentocama, trigotapish patsaj corocama, vinotapish patsaj batocama, aceitetapish patsaj batocama, cachitacarin mashnata mañajpipish cunguichijlla.

²³ Jahua pacha Diospaj huasipajca jahua pacha Dios tucui imallata mandashca shinallataj utca cuichij. Chashna cujpica ñuca mandacun llajtapajpish, ñuca churicunapajpish ima llaqui mana shamungachu.

²⁴ Cancunamanca caitapishmi yachaj chayachinchij: Curacunata, levitacunata, cantajcunata, pungupi cuidajcunata, Diospaj huasipi imalla rurana cashcata rurajcunata, chai huasipi Diospajta rurajcunataca tributotapish, impuestotapish, imallamanta cuna cashcatapish pi mana mañai tucunchu.

²⁵ Esdras canca, jatun yacu chaininijman tucui causajcunata mandachunca juezcunata, mandajcunata cambaj Dios canman yachaita cushca shinallataj churangui. Cambaj Diospaj mandashcacunata alli yachajcunata chashna churangui. Manaraj yachajcunataca yachachingui.

²⁶ Cambaj Dios mandashcata, jatun mandaj mandashcata maijanpish mana pajtachijcunataca tucuicunata jatunta llaquichishca cachun. Huañuchina cajpica huañuchichun. Llajtamanta llujshichishpa cachana cajpica llujshichishpa cachachun. Pai ima charishcacunata quichuna cajpica quichuchun. Prezupi churana cajpi prezupi churachun” nishpa quillcashpami curca.

Esdrasca Diosta diosolopagui nishcami

²⁷ Jerusalenpi caj Mandaj Diospaj huasita sumajta shayachichun jatun mandajman yuyaita cuj ñucanchij ñaupa yayacunapaj Mandaj Diosca alli nishca cachun.

²⁸ Mandaj Diosca jatun mandajpaj, paiman yuyaita cujcunapaj, jatun mandaj churashca c'ari c'ari mandajcunapaj ñaupajpipish paipaj c'uyaihuanmi ñucataca alli cashcata ricuchirca. Chaimi ñucahuan Jerusalenman huichiyachunca ñuca Dios ñucahuan cajpi, israelcunata mandajcunataca c'ari c'ari tandachircani.