ESDRAS 6 - Dios Rimashca Shimicunami

¹ Chaimi jatun mandaj Darioca Babiloniapi sumaj charinacunata huaquichina huasipi quillcashcacuna tiyacunpi mashcachun mandarca.

² Chaipi mashcashpaca Media llajtapi caj Acmeta pueblopi mandana huasipimi ama cungaringapaj shuj libropi cashna nishpa quillcashcata japirca:

³ “Jatun mandaj Ciroca pai mandai callari huatapimi Jerusalenpi caj Diospaj huasita cutin shayachichun, chai huasipi Diosman sacrificiocunata cunapaj nishpa quillcachishca carca. Chai huasita cutin shayachingapaj callari rumicunata churashpaca, altomanca ishqui chunga metrota, anchomanpish chaillatataj rurachuncuna.

⁴ Chai huasitaca quimsa fila jatun rumicunahuan, shuj fila mushuj caspicunahuan pircachuncuna. Chai tucuicunapajca jatun mandajpaj cai huasimanta llujshichun.

⁵ Jerusalenpi caj Diospaj huasipi Diospajta rurangapaj curimanta, cullquimanta rurashcacunata jatun mandaj Nabucodonosor cai Babiloniaman apamushcacunata caimanta llujshichishpa cutinllataj apashpa Jerusalenpi caj Diospaj huasipi chaicuna maipi cashcallapitaj cutin churachuncuna” nishpa quillcashpa mandashcatami japishca carca.

⁶ Chaita japijpimi, jatun mandaj Darioca, jatun yacu chaininij llajtata mandaj Tatnai, jatun yacu chaininij llajtata mandaj Setar-boznai, cancunahuan caj caishuj mandajcunamanpish chai Jerusalenmanta anchuichij nishpa quillcashpa cacharca.

⁷ Judiocunata mandajcunapish, cunaj yuyajcunapish chai Diospaj huasi maipi cashcallapitaj cutin shayachishpa catichun saquichijlla.

⁸ Judiocunata cunaj yuyajcuna chai Diospaj huasita cutin shayachicujcunapajca cashnami mandani. Chai huasita ruracushca ama uniyachun jatun yacumanta ch'imba ladoman causaj llajtacuna jatun mandajman tributota pagana cashcata pagana punllapitaj cobrashpa chai huasita ruranapaj imalla minishtirishcapaj utca cunguichij.

⁹ Jahua pacha Diosman cushpa tucui rupachishpa cungapaj imalla minishtirishcacunataca malta huagracunata, carnerocunata, malta ovejacunata, trigota, cachita, vinota, aceitetapish Jerusalenpi causaj curacuna mañashca shinallataj punllanta cunguichijlla.

¹⁰ Jahua pacha Dios munashca shina chai sacrificiocunata cuchuncuna. Ñucamantapish ñuca churicunamantapish Diosta mañachuncuna.

¹¹ Cashnapishmi mandani: Maijanpish cai mandashcata mana cazujtaca, paipaj huasi shuj jatun caspita surcushpa chaipi huarcushca cachun. Paipaj huasipish jatun rumi montonlla saquirichun.

¹² Maijan jatun mandaj cashpa, maijan pueblopi causajcuna cashpapish, Jerusalenpi caj Diospaj huasita chingachisha nijta, mana cashpaca shujtajyachisha nijtaca chai huasipi paipaj shuti causachun churaj Diosllataj paicunatapish chingachichun. Jatun mandaj Dariotajmi chashna mandani. Chaitaca tucuita chashnataj pajtachishca cachun.

Diospaj huasita cutin shayachishpaca cushicushpa Diosman mingashcami

¹³ Jatun yacu chaininij llajtata mandaj Tatnaipish, Setar-boznaipish, paicunahuan caj mandajcunapish jatun mandaj Darío mandashca shinami tucuita chashnataj pajtachircacuna.

¹⁴ Chashnami judiocunapaj cunaj yuyajcunaca chai huasitaca utca tucuchircacuna. Paicunaca profeta Hageoman, Iddopaj churi profeta Zacariasman Dios huillachishca shinallatajmi rurarcacuna. Chai huasitaca israelcunata Mandaj Dios ruraichij nishpa mandashca shina, Persia llajtata jatun mandaj Ciro, Darío, Artajerjes mandashca shinallataj rurashpami tucuchircacuna.

¹⁵ Jatun mandaj Darío sujta huatata ña mandacujpi, Adar quillapaj quimsa punllapimi chai huasitaca tucuchircacuna.

¹⁶ Chashnami prezu apashcamanta tigramushca israelcunaca curacunapish, levitacunapish tucuicuna jatunta cushicushpa Diospaj huasitaca paipajlla cachun mingarcacuna.

¹⁷ Diospaj huasita paipajlla cachun mingangapajca 100 malta huagracunata, 200 carnerocunata, 400 malta ovejacunatami Diosman curcacuna. Chunga ishqui aillu israelcunapaj juchacunamanta cungapajpish chunga ishqui chivocunatami Diosman curcacuna.

¹⁸ Chai q'uipaca, Moisés mandashpa quillcashcapi nishca shinallatajmi Jerusalenpi Diospajta rurajcunataca curacunatapish, paicunapaj ima horasllapi rurana cashcapi ruranaman huashan huashan yaicuchun churarcacuna. Levitacunatapish, paicuna imallata rurana cashcapimi churarcacuna.

¹⁹ Huata callari quillapaj chunga chuscu punllapimi, prezu apashcamanta tigramushcacunaca Egiptomanta llujshimushcata yuyarishca Pascuata rurarcacuna.

²⁰ Paicunaca curacunapish, levitacunapish tucuicuna maillarishca chuyacunami Diosman sacrificiota curcacuna. Chashnami prezu apashcamanta tigramushcacunamantapish, caishuj curacunamantapish, paicuna quiquinllamantatajpish Pascuapi Diosman cuna cashcata curcacuna.

²¹ Chai Pascua punlla jatun micuitaca, prezu apashcamanta tigramushcacunami tandanacushpa micurcacuna. Judá llajtapi causacushcacunapish millaita ruracushcamanta ch'icanyashpami israelcunata Mandaj Diosman cutirircacuna. Chaicunandij tandanacushpami micurcacuna.

²² Israelcunapaj Mandaj Diospaj huasita ruranata ashtahuan fuerzarichun Asiria llajtata jatun mandajta Mandaj Diosllataj israelcunata llaquina yuyaita cushcamantami levadura illajlla tandata micuna jatun fiestatapish cushicushpa canchis punllata rurarcacuna.