Efesios 5 - Dios Rimashca Shimicunami

Diospaj huahuacuna shina purichij

¹ C'uyashca huahuacuna cashcamanta, Diosta ricushpa catijcuna caichij.

² Cristo ñucanchijta c'uyashca shina, c'uyanacushpa purichij. Ñucanchijmantami paillataj curirca. Chaica Diospajca, paiman cushpa rupachishca mishquiman ashnacuj shinami carca.

³ Ashtahuanpish cancunapurapica, apanacushpa causajcuna, tucui laya mapacuna, quiquinpajlla ashtahuan charij canata munajcunaca amataj uyarichunllapish. Jucha illajcuna cashcamantaca chai shinataj causaichij.

⁴ Cancunaca pinganayaj shimicunata, manapish rimana shimicunata, mapa shimicunatapish ama rimanguichij. Chaicunaca mana allichu. Chaipaj randica Diosta pagui nichij.

⁵ Maijanpish apanacushpa causaj, mapapi caj, mitsa cajpish, rurashcalla diosta catijllatajmi. Paicunaca Cristopish, Diospish mandanapica, ima japinata mana charishcataca yachanguichijmi.

⁶ Maijanpish cancunataca yanga parlocunahuan ama umachun. Chashna mana allita rurashcamantami, Diosca p'iñarishpa paita mana cazujcunataca jatunta llaquichinga.

⁷ Paicunapaj ruraicunapica amataj tandanacunguichij.

⁸ Ñaupaca amsami carcanguichij. Ashtahuanpish Mandaj Jesuspica, cunanca achijmi canguichij. Chaimanta luzpaj huahuacuna shina purichij.

⁹ (Espiritupaj granoca, tucuipi alli cajmi, cashcata rurajmi, mana llulla canapishmi).

¹⁰ Chaimanta alli ricushpa, Mandaj Jesús munashcata ruranata agllaichij.

¹¹ Amsapaj yanga ruraicunapica, ama tandanacuichijchu. Chaipaj randica mana allita rurajcunataca shinchita rimaichij.

¹² Paicuna pacalla rurashcata huillanataca pingananpishmi.

¹³ Luz achijyachijpica, tucui imapish ricuringami. Luzca tucuita ricuchij cashcamanta, tucuitami ricuchinga.

¹⁴ Chaimanta: “Dormicuj rijchari, huañushcacunapaj chaupimanta jatari. Cristomi cantaca achijyachinga” ninmi.

¹⁵ Riquichij, ima shina puricushcata alli yuyarichij. Ama ch'ahuancuna shina, ashtahuanpish yachajcuna shina caichij.

¹⁶ Mana alli punllacunapi cashcamanta, allita rurana tiyajpica, allita ruraichij.

¹⁷ Chaimanta ama yuyai illajcuna caichijchu. Ashtahuanpish Mandaj Jesuspaj munai ima cashcata entendijcuna caichij.

¹⁸ Ama machaichijchu. Chaihuanca llaquimi tucun. Chaipaj randica Espirituhuan junda caichij.

¹⁹ Cancunapura salmocunahuan, himnocunahuan, cantocunahuan yuyachinacushpa, cancunapaj shungucunapi, Mandaj Jesusta cantashpa alabaichij.

²⁰ Ñucanchijta Mandaj Jesucristopaj shutipi, Dios Yayata tucuimanta pagui nicuichijlla.

Caishuj chaishuj cazunacuichij

²¹ Diosta manchashcamanta, caishuj chaishuj cazunacuichij.

²² Cazadacunaca, Mandaj Jesusta shinallataj paicunapaj quiquin cusacunata cazuchun.

²³ Tandanacushca crijcunapajca, Cristoca umami. Chai shinallataj cusapish huarmipajca umami. Crijcunaca Cristopaj cuerpomi, paimi paicunapaj Quishpichij.

²⁴ Tandanacushca crijcuna Cristota cazuj shinallataj, cazadacunapish paicunapaj cusacunata tucuipi cazuchun.

²⁵ Cristoca tandanacushca crijcunata c'uyashpami, paillataj curirca. Chai shinallataj cusacunapish, quiquin huarmicunata c'uyaichij.

²⁶ Huillashca shimihuan yacupi maillashpa jucha illajta rurangapajmi, Cristoca chashna tucurca.

²⁷ Tandanacushca crijcunaca sumaj, imapi mana mapayashca, llambuglla, ima chai shinacunatapish mana charij, jucha illajta, mana mapayashcata ricuchingapajmi chashna tucurca.

²⁸ Chai shinallataj cusacunapish, quiquin cuerpota shina paicunapaj huarmicunata c'uyachun. Maijanpish paipaj huarmita c'uyajca, paillatajmi c'uyarin.

²⁹ Paipaj quiquin cuerpotaca, pi manataj p'iñanchu. Ashtahuanpish allimi micun, allimi cuidan, chashnallatajmi Cristopish tandanacushca crijcunapajca ruran.

³⁰ Ñucanchijca paipaj cuerpopaj miembrocunami canchij. Paipaj aichamanta, paipaj tullucunamantami canchij.

³¹ Shinallatajmi c'arica, yaya mamata saquishpa, paipaj huarmihuan tandanacunga. Ishqui cashcamanta shujlla aichami tucunga.

³² Cai huillashcaca, pi mana entendipaj jatunmari. Ashtahuanpish ñucaca Cristohuan, tandanacushca crijcunahuan ima shina cashcatami chashna nini.

³³ Chaimanta quiquin c'uyarij shinallataj, paicunapaj quiquin huarmitapish c'uyachun. Huarmipish, paipaj cusata respetachun ninimi.