Efesios 4 - Dios Rimashca Shimicunami

Diospaj Espiritumi shujllata ruran

¹ Ñucaca, Mandaj Jesuspi shujlla cashcamantami prezupi cani. Cancunataca Dios imapaj cayashca shinataj alli purichunmi cashna rogani:

² Ama jatun tucushpa, manso shunguhuan, c'uyaimantaca caishujmanta chaishujmanta ama p'iñarishpa llaquicunata apaichijlla.

³ Espíritu shujllata rurashpa, sumaj causaipi churashcapi chai yuyailla causaichij.

⁴ Shuj cuerpollami tiyan, Espiritupish shujllami. Chaimanta shujlla shuyanata shuyachun cayashcacunami canguichij.

⁵ Shinallataj shujlla Mandaj, shujlla crina, shujlla bautismo,

⁶ shujlla Dios tucuicunapaj Yayami. Paica tucuicunapaj jahuapimi, tucuicunallatatajmi imatapish rurachicun, tucuicunapipishmi.

⁷ Ashtahuanpish Cristoca mana c'uyaipajta c'uyashcamantami, ñucanchijmanca pai cusha nishca shina cada quiquinman rurai tucunallata curca.

⁸ Chaitami: “Jahua pachaman huichiyashpaca, prezu cajcunatami prezu aparca. Gentecunamanca Dios cusha nishca rurai tucunatami curca” ninmi.

⁹ “Huichiyarca” nishcaca ¿imataj? chaica, allpamanta ashtahuan ucumanraj uriyarca nisha ninmi.

¹⁰ Chai uriyajllatajmi, tucuipi junda cangapaj, tucui pachacunamanta jahuaman huichiyarca.

¹¹ Paillatajmi shujcunataca apostolcuna, caishujcunataca profetacuna, chaishujcunataca alli huillaita huillajcuna, maijancunataca michijcuna yachachijcunapish cachun churarca.

¹² Diospajta rurashpa Cristopaj cuerpota mirachichunmi, jucha illajcunataca chashna allichirca.

¹³ Chashna cashpami, ñucanchijca crinapi ashtahuan shujlla tucushpa, Diospaj Churita ashtahuan rijsishpa, sinchi crij tucushpa, Cristo ima shina cashcahuan junda canaman chayashun.

¹⁴ Chashna cashpami, caita chaita apaj huaira shina panda yachachinataca, huahuacuna shina mana crishun. Chaicunaca, umangapaj alli yachajcuna cashpami, ima shinapish panda yachachinata allichincuna.

¹⁵ Shina cajpipish Cristomari uma. Pai shina tucungacama mana llullapi, c'uyaipi huiñashunchij.

¹⁶ Tucui crijcunaca paihuan shujlla cuerpo cashpami, aicha mucucuna huatarishca shina alli churashca cashpa paillamantataj huiñangapaj chasquicunchij. Chashna cashpami, tucui crijcuna quiquin rurana cashcata alli rurashpa, c'uyaihuan huiñashpa miraricun.

Mushuj causaica Cristopimi

¹⁷ Mandaj Jesuspaj shutipimi, caita nisha nini: Caishuj mana judiocuna shina ña ama purichijchu. Paicunaca, paicunapaj yanga yuyaihuanmi causancuna.

¹⁸ Paicunapaj yuyaicuna amsa cashcamanta, mana yachashcamanta, shungucunapish sinchi cashcamanta, Dios cushca causaimantapish carupi cashcamantami mana chasquincuna.

¹⁹ Paicunaca mana pingaj, cacharishcacuna tucushpami, ashtahuan charijyanata munashcamanta tucui laya mapacunata rurancuna.

²⁰ Ashtahuanpish cancunaca mana chashna tucunatachu Cristomantaca yacharcanguichij.

²¹ Cancunaca Jesuspi tiyaj, mana llullatataj paimanta yachachishcata uyashcataj cashpaca, mana chashnachu cana canguichij.

²² Ñaupa ima shina causashca, mauca causaitaca saquichij. Chai causaica, umaj munaicunahuan ismushpa tucuricujmi.

²³ Cancunapaj shungutapish, yuyaitapish mushujyachichij.

²⁴ Mushuj causaita churarichij. Mana llullapi nishca shina, cashcata rurachun, jucha illaj cachun, Diosman rijchaj cachun mushujyachishcami canguichij.

²⁵ Chaimanta llullanata saquishpa, tucuicuna caishujta chaishujta ama llullanacushpa parlanacuichijchu. Tucuicunami chai cuerpopajlla miembrocuna canchij.

²⁶ P'iñarishpapish ama juchallichijchu. Inti huashicungacamaca ama p'iñalla caichijchu.

²⁷ Diablo millaita rurachichunpish ama saquichijchu.

²⁸ Maijan shuhua cashca cashpapish, ama ashtahuan shuhuachun. Chaipaj randica, trabajachun. Ima illajlla cajcunaman chaupinata charinapaj, quiquin maquihuan imatapish allita rurachun.

²⁹ Cancunapaj shimimantaca, ima mapa shimicuna ama llujshichun. Ashtahuanpish uyajcuna sinchiyachun allicunallata rimaichij.

³⁰ Diospaj jucha illaj Espirituta ama llaquichichijchu. Tucui imamantapish quishpichishpa pushana punllacama paihuan sellashcacunami canguichij.

³¹ Cancunamantaca shujtajcunahuan p'iñalla canata, p'iñarij canata, jahualla p'iñarinata, caparirinata, c'amij canata, millai shungu canatapish tucui anchuchichij.

³² Chaipaj randica, caishujhuan chaishujhuan alli caichij. Cristopi cancunata Dios perdonashca shinallataj, caishuj chaishuj llaquijcuna, perdonanacujcuna caichij.