Efesios 1 - Dios Rimashca Shimicunami

Allillachu canguichij nishcami

¹ Taita Dios munashcamanta Jesucristopaj apóstol Pablomi cani. Cristo Jesushuan shujlla tucushpa, Éfeso pueblopi alli caticuj jucha illajcunahuanca:

² Dios ñucanchij Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninimi.

Cristomantami jahua pachapi tiyaj allicunata cushca

³ Ñucanchijta Mandaj Jesucristopaj Yaya Diostaca, alli nishca cachun. Cristomantami jahua pacha llajtacunapi tiyaj allicunata ñucanchijmanca cushca.

⁴ Cai pachata manaraj rurashpami, Cristohuan shujlla tucushpa, paipaj ñaupajpi jucha illaj, mapa illajcuna cachun ñucanchijtaca ña agllarca.

⁵ Pai c'uyashcamantami Jesucristohuan shujlla tucujpi ñucanchijtaca, paipaj huahuacunata rurangapaj, pai munashca shinallataj ñaupaman agllarca.

⁶ Paipaj sumaj mana c'uyaipajta c'uyaj cashcata alabachunmi, paipaj c'uyashca Churimanta ñucanchijtaca chasquirca.

⁷ Diosca, mana c'uyaipajta c'uyaj canata charij cashcahuanmi, juchacunata perdonashpa, Cristopaj yahuarhuan cutin randishpa quishpichirca.

⁸ Chai jahuami, ñucanchijmanca tucui yachaisapa canata, yuyaisapa canatapish yallitaj curca.

⁹ Alli yuyarishca pi mana yachashca pai munashca shina rurasha nicushcataca ñucanchijmanmi ricuchirca. Chaitaca ñaupamanmi paillataj rurasha nishca carca.

¹⁰ Pai yuyarishca punllacuna pajtajpimi, jahua pachacunapi cajcunata, cai pachapi cajcunata, tucui ima tiyajta tandachishpa Cristopaj ucupi churanga.

¹¹ Ñaupaman agllashca cashcamantami, Cristomantaca japina cashcata charircanchij. Tucui imatapish rurajca, pai munashpa yuyarishca shinallatajmi pajtachicun.

¹² Ñucanchijraj Cristota shuyacujcuna cashca cajpimi, pai sumaj cashcata alabachun chashna agllarca.

¹³ Cancunapish chai Jesusllatataj crishpa quishpirichunmi, mana llulla alli huillaitaca huillarcanchij. Chaita uyashpa crincami, Diosca pai cusha nishca jucha illaj Espirituhuan sellarca.

¹⁴ Tucuimanta quishpichishpa pushajpi ñucanchij japina cashcata japingacama ricuchij cachunmi, chai Espiritutaca churarca. Pai sumaj cashcata alabachunmi chashna rurarca.

Yachaisapa yuyaita cuchun Diosta mañashcami

¹⁵ Mandaj Jesusta crishcamanta cancunaca, jucha illaj tucuicunata c'uyacun nijta uyashpami ñucapish,

¹⁶ cancunamantaca Taita Diosta pagui ninata mana shaicuni. Diosta mañacushpaca cancunata mana cungashpami,

¹⁷ ñucanchijta Mandaj Jesucristopaj sumaj Yaya Diosca, yachaisapa cana yuyaiyujta rurashpa, paimanta ashtahuan alli yachajta rurachun mañacuni.

¹⁸ Pai Diosca, cancunapaj yuyaipaj ñahuita achijyachishca cachunmi mañacuni. Chashna achijyachijpimi, cancunaca imata shuyanapaj cayashca cashcata, jucha illajcunahuan achcata charina sumaj herenciapish ima cashcata yachanguichij.

¹⁹ Shinallataj mana ch'imbapuraipaj paipaj jatun poderta ñucanchij crijcunaman cushcaca, tucui imatapish rurai tucuj poder cashcata ricuchichunmi mañacuni.

²⁰ Cristotaca huañushcacunapaj chaupimanta causachishpami, jahua pacha paipaj alli ladoman tiyachishpa, chai poderyuj cashcataca ricuchirca.

²¹ Poderyujcunapaj, mandanata charijcunapaj, poderhuan mandajcunapaj, tucui laya shutichishcacunapaj jahuapipishmi paica mandacun. Mana cunan punllacunallapichu, ashtahuanpish q'uipa punllacunapipishmi mandanga.

²² Shinallataj tucui imatapish Cristo cazuchichunmi, paipaj chaquicuna ucupi churarca. Tandanacushca crijcunapajpish uma cachunmi, paillatataj churarca.

²³ Crijcunaca paipaj cuerpomi, paillatajmi tucuicunapi yallijta jundan.