ECLESIASTÉS 8 - Dios Rimashca Shimicunami

¹ ¿Pitaj yachaj shinaca cangari? ¿Pitaj pai shina tucui imatapish yachangari? Alli yachaica runapaj ñahuita achijyachinmi, p'iña ñahuitapish shujtajyachinllami.

Jatun mandajta cazunamanta

² Cantaca caitami cunani: Canca Diospaj ñaupajpimi, jatun mandajta cazunata ari nircangui. Pai mandashcata cazunami cangui.

³ Jatun mandajpaj ñaupajmantaca ama llujshishcahuan ringuichu. Ima mana allita rurashpapish ama chaillahuantaj catinguichu. Pai munashca shina llaquichingallatajmari.

⁴ Jatun mandaj mandashcataca, pi mana jarcai tucunchu. ¿Imamantataj chaita rurangui? nishpapish, pi mana ni tucunchu.

⁵ Mandashcata pajtachijtaca, ima llaqui mana japingachu. Yachaj runacarin, imalla rurashcata ricuna punlla chayamunata yachanmi.

⁶ Cai pachapi causajcunaca quiquinpajllatajmi jatun mana allita rurancuna. Ima munashcata rurangapaj shuj punlla tiyashca shinallataj, tucui chaicunata ricuna punllapish chayamungami.

⁷ Ima punlla, ima tucunataca mana yachanchu. Chaitaca ¿pitaj huillai tucungari?

Runaca causaitapish huañuitapish mana mandai tucunchu

⁸ Runaca alma ama llujshichunca, mana charirai tucunchu. Huañuna punlla chayamujpica, mana jarcai tucunchu. Chai punlla chayamujpica, ima macanacunacunahuanpish mana mishai tucunchu. Diosta mana manchajtapish, mana manchashcaca mana quishpichingachu.

⁹ Inti achijyachicun cai pachapi causajcuna tucui imallata ruracushcatami, shunguta churashpataj callarishpa ricurcani. Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna.

Millaicunatarajmi alli nincuna

¹⁰ Shinallataj caitapishmi ricuni: Millai runacuna huañujpirajmi, yupashpa yupashpa huacashpa pambancuna. Ashtahuanpish Diospaj huasiman shamuraj, alli runacuna huañujpica, paicuna causashca pueblopi causajcunaca paicuna alli cashcata cungarinllacunami. Chashna tigraman yangatami rurancuna.

¹¹ Millaita rurajpi mana utca llaquipi churajpica, shungupica ashtahuan millaita rurana yuyaillami purincuna.

¹² Juchata ruraj runaca, mashna cutin millaita rurashpapish, unita causanllami. Shina cashpapish ñucaca Diospaj munaita rurajcuna, paipaj ñaupajpi cazushpa causajcunapish alli llujshina cashcatapish yachanimi.

¹³ Ashtahuanpish Diosta mana manchajcunaca llaqui tucuna cashcata, paicunapaj causaipish llandu shina utca chingarina cashcatami yachani. Diosta mana manchashcamantami, chashna tucungacuna.

¹⁴ Huaquinpica cai pachapica, imapish manapish cana tucunllami. Cashcata rurajcunamari, Diosta mana manchaj cashca shina llaquita apancuna. Diosta mana manchajcunarajmi, cashcata rurajcuna shina cushicushpa sumajta causancuna. Chaipish mana cana yangami ninimi.

¹⁵ Chaimantami ñucaca cushicuna alli cashcata nini. Cai pachapica ñucanchij trabajomantaca micushpa, ubyashpa cushicunallatami charinchij. Causashcacamaca chaillatami rurai tucunchij.

¹⁶ Ñucaca tucui shunguhuanmi cai pachapi causajcuna imallata ruraj cashcataca yacharcani. Huaquincunaca tutapish, punllapish mana samarincunachu.

¹⁷ Ashtahuanpish Diosca inti achijyachicun cai pachapi chashna tucuchun, imamanta saquij cashcataca pi mana yachai tucuj cashcatami ricurcani. Ima shina cashcata yachaj chayasha nishpa, mashnata yuyashpapish manataj yachai tucuipajchu. Shuj jatun yachaj runa yachanimi nishpapish, tucuitaca mana yachanchu.